گوستگیں دو دہائی آنی تہ ءَ پاکستان ءُ روس ءِ نیام ءَ سیادی ءَ را مزنیں کساسے ءَ مھکم بوتگ، وفاقی توانائی ءِ وزیر ویبینار ءَ گوں تران

اسلام آباد۔9جون  (اے پی پی): توانائی ءِ وفاقی وزیر سردار اویس احمد خان لغاری ءَ گوشت کہ گوستگیں دو دہائی آنی تہ ءَ پاکستان ءُ روس ءِ نیام ءَ سیادی آنی تہ ءَ مزنیں کساسے ءَ مھکمی بوتگ ءُ دوئیں ملک آنی نیام ءَ 2030ءَ تاں اقتصادی کمک ءِ یک سرجمیں پروگرام ءِ سر ءَ دستخط کنگ ءِ سر ءَ تپاک کنگ بوتگ کہ ایشی ءَ چہ 2030ءَ یک ھاسیں اقتصادی نوکیں جہت ءِ رنگ ءَ ثابت بیت۔ سئے شمبے ءِ روچ ءَ ’’بدل بوھوکیں جھان ءِ رھبند ءِ رد ءَ پاکستان ءُ روس ءِ نیام ءَ دو نیمگی سیادی‘‘ ءِ سرھال ءَ ویبینار 1 ءَ کلی اسپیکر ءِ بستار ءَ گشتانک دیان ءَ وفاقی وزیر ءَ گوشت کہ گوستگیں دو دہائی آنی ساھت ءَ پاکستان ءُ روس ءِ سیادی ءَ سک باز جوانیں، جوڑیشت ءُ عملی بنیات ءِ سر ءَ مزنیں دیمروئی کتگ۔ وفاقی وزیر ءَ جھان ءِ سیاست ءِ تہ ءَ بوھوکیں ڈھانچہ ءِ بدلی آنی حوالہ ءَ گوشت کہ سویت دور ءِ گوں ھمگرنچیں رند ءِ بے باوری کم کم ءَ گار بوتگ ءُ دوئیں ملک آنی نیام ءَ سیادی ”غیر دوستیں ملک“ ءِ تصور ءَ چہ دراتکگ ءُ ”معتبریں سنگت“ ءِ تک ءَ شتگ۔ دوئیں ملک آنی مزنیں سروکی ءَ تجارت، توانائی، دفاع ءُ ٹیکنالوجی ءَ ھوار جتا جتائیں شوبگ آنی تہ ءَ کمک ءِ دیمروئی ءِ تہ ءَ مزنیں کرد پیلو کتگ، اے گپ گوستگیں سال آنی تہ ءَ مزن وزیر محمد شہباز شریف ءُ روس ءِ صدر ولادیمیر پوٹن ءِ نیام ءَ بوتگیں چار گند ءُ نند آنی تہ ءَ پدر اِنت۔ روس ءُ پاکستان ءِ بین حکومتی کمیشن ءِ پاکستانی شریک چیئرمین ءِ بستار ءَ وفاقی وزیر ءَ روسی فیڈریشن ءِ توانائی ءِ وزیر ءُ آئی ءِ ہم منصب سرگئی تسویلیف ءِ گوما برجاھیں رابطہ ءِ سر ءَ زور پر دات ءُ گوشت کہ آئی جی سی دوئیں ملک آنی نیام ءَ کثیر جہتی ءُ جامع سیادی آنی بنیاتی بنیات ءِ رنگ ءَ مانیت۔ آئی ءَ گوشت کہ جتا جتائیں ادارگی فریم ورک ءِ وسیلگ ءَ دو نیمگی کمک ءَ را گیش مھکم کنگ بوتگ، ایشی ءِ تہ ءَ سیکورٹی ءَ گوں سیادی داروکیں شور ءُ سلاھ، اسٹریٹجک استحکام، انسداد ناشرکاری ءُ اے دگہ پڑ آنی تہ ءَ کمک ءِ واستہ باقاعدہ میکانزم ھوار انت۔ دوئیں ملک اقوام متحدہ ءُ شنگھائی کمک ءِ گل ءَ ھوار جتا جتائیں میاں اوستمانی دیوان آنی تہ ءَ ھم یکجاھیں موقف ءِ زورگ ءَ اَنت کہ یک جامع ءُ کثیر قطبی جھان ءِ نظام ءِ دیمروئی ءِ واستہ یکوئی ءِ ھمگرنچی ءِ گوما ھوار اِنت۔ وفاقی وزیر ءَ دمگی رابطہ ءِ دیمروئی ءَ را ھاسیں ارزشت دیان ءَ گوشت کہ پاکستان ءِ میاں اوستمانی شمال جنوب ٹرانسپورٹ راہداری ءَ ہوار بوھگ ءِ واھشت مند اِنت۔ آئی ءَ روس ءِ نائب مزن وزیر الیکسی اوچاروک ءِ بیان ءَ را وش اتک کت کہ آئی ءَ اے راہداری ءَ را پاکستان ءِ گوادر بندرگاہ ءَ گوں یکجا کنگ ءِ تجویز داتگ۔ وفاقی وزیر ءِ رد ءَ اے گامگیج چین ءِ بیلٹ اینڈ روڈ انیشیٹیو ءِ تہ ءَ یک ھاسیں لنک ءِ سرجم کنگ ءِ وسیلگ بوت کنت۔ آئی ءَ اے گپ ءِ ھم ھال دات کہ روسی سروکی ءَ ایران ءُ امریکہ ءِ نیام ءَ جیڈھ آناں کم کنگ ءِ واستہ پاکستان ءِ گوستگیں سفارتی کوشست آناں ساڑاتگ ، ایشی ءَ چہ اے گپ ءِ پدر بوھگ ءَ اِنت کہ صدر ولادیمیر پوٹن پاکستان ءَ را جھان ءِ پڑ ءَ یک ھاسیں ءُ ذمہ واریں شریک ءِ رنگ ءَ گندیت۔ وفاقی وزیر ءَ گوشت کہ پاکستان ءُ روس ءِ نیام ءَ دو نیمگی تجارت ءِ تہ ءَ مزنیں گیشی ءِ واستہ مزنیں گنجائش است انت ءُ دوئیں ملک ادائیگی ءِ نظام ءَ ھوار لھتیں ڈھانچہ ءِ رکاوٹ آنی گیواری ءِ واستہ سرگرمیں رنگ ءَ کار کنگ ءَ انت۔ اے درگت ءَ دوئیں نیمگ ءَ روس ءِ فیڈریشن ءُ پاکستان ءِ نیام ءَ 2030 ءَ تاں اقتصادی کمک پروگرام ءِ سر ءَ دستخط کنگ ءِ سر ءَ تپاک کنگ بوتگ ایشی ءَ چہ اقتصادی سیادی ءَ را گیش ودی کنگ ءِ تہ ءَ یک ھاسیں سنگ میل ءِ ثابت بیت۔ آئی ءَ گوشت کہ گوستگیں وھد ءَ بشکیک ءَ روس ءُ پاکستان ءِ دوبر داخلہ ءِ معاہدے ءِ سر ءَ دستخط کنگ ھم یک ھاسیں دیمروئی یے، ایشی ءِ آسر ءَ ویزا ءِ آسراتی گہتر بنت، کاروباری سیادی ءَ را گیش کنگ ءُ مردم آنی نیام ءَ مردم آنی تبادلہ ءَ را گیش گیش کنگ بیت۔ وفاقی وزیر ءَ گوشت کہ روس ءِ گوما پاکستان ءِ گیش بوھوکیں ادارگی سیادی گوستگیں ماہ ءَ کازان فورم 2026 ءَ مزنیں پاکستانی ڈل ءِ بھر زوری ءَ چہ ھم گندگ بوتگ، وھدیکہ پاکستان سینٹ پیٹرزبرگ انٹرنیشنل اکنامک فورم ءُ ماسکو انرجی ویک ءَ ھوار ایندگر ھاسیں میاں اوستمانی مراگش آنی تہ ءَ ھم باقاعدگی ءَ بھر زوری کنت۔ وتی گشتانک ءِ گڈ ءَ توان ءِ وفاقی وزیر سردار عویس احمد خان لغاری ءَ اے گپ ءِ سر ءَ زور پر دات کہ پاکستان ءُ روس ءِ سیادی ایوک ءَ دو نیمگی کمک ءَ گوں بندوک نہ اَنت بلکیں یوریشیا ءِ گیشیں اقتصادی یکوئی، دمگی رابطہ ءُ استحکام ءِ دیمروئی ءِ تہ ءَ ھم بنیاتی ارزشت ءِ واھند اَنت۔