برطانوی ہائی کمشنر ءَ موسمیاتی بدلی ءُ چاگردی ہم آہنگی ءِ وفاقی وزیر ءَ گوں گند ءُ نند کتگ، گرین کمپیکٹ ءِ نفاذ ءُ آیوکیں کارروائی ءِ بابت ءَ گپ ءُ تران

اسلام آباد۔ جون (اے پی پی) : پاکستان ءِ واستہ برطانیہ ءِ ہائی کمشنر جین میریٹ ءَ اسلام آباد ءَ موسمی بدلی ءُ چاگردی رابطہ ءِ وفاقی وزیر ڈاکٹر مصدق ملک ءَ گوں گند ءُ نند کت۔ سئے شمبے ءِ روچ ءَ وزارت موسمیاتی بدلی ءُ چاگردی ہم آہنگی ءِ نیمگ ءَ جاڑی بوتگیں بیان ءِ رد ءَ دیوان ءَ گرین کمپیکٹ ءِ سر ءَ عمل درآمد ءُ آیوکیں وھد ءِ کارروائی ءِ سر ءَ سرجمیں رنگ ءَ گپ ءُ تران کنگ بوتگ۔ گرین کمپیکٹ برطانیہ ءُ پاکستان ءِ نیام ءَ 35ملین پونڈ ءِ دو نیمگی موسمیاتی کمک ءِ فریم ورک اِنت کہ ایشی ءِ مول ءُ مراد پاکستان ءَ موسمی بدلی ءِ گیش بوھوکیں اثرات ءِ دیم ءَ دارگ ءُ موسمیاتی لچک ءَ را مھکم کنگ ءَ کمک کنگ اِنت۔ گند ءُ نند ءِ ساھت ءَ برطانوی ہائی کمشنر ءَ مزن وزیر ءَ را گرین کمپیکٹ ءِ ایکشن پلان ءِ بابت ءَ سرپد کت ءُ ایشی ءِ کلیدی مول ءُ مراد ءُ کمک ءِ تجویز کتگیں پڑ آنی سر ءَ چمشانک دات۔ اے موہ ءِ سر ءَ وفاقی وزیر ڈاکٹر مصدق ملک ءَ گوشت کہ گرین کمپیکٹ ءِ چیر دستی ءَ انچیں گامگیج ءُ منصوبگ جوڑ کنگ بہ بنت کہ ایشی ءَ چہ الس ءِ واستہ جوانیں ءُ برجمیں نتیجگ پیداک بہ بنت۔ وفاقی وزیر ءَ ہائی کمشنر ءَ را اسلام آباد ءَ گرین یونیورسٹی ءِ جوڑ کنگ ءِ ھوالگ ءَ پیشرفت ءِ بابت ءَ ھم سرپد کت۔ آئی ءَ گوشت کہ اے درگت ءَ اٹلی ءَ ھوار جتا جتائیں میاں اوستمانی شریک ءُ آرکٹک سرکل ءَ گوں سیادی داروکیں ادارگ آنی گوما شور ءُ سلاھ کنگ بوھگ ءَ انت۔ ڈاکٹر مصدق ملک ءَ مزن وزیر ءَ را نیشنل یونیورسٹی آف سائنسز اینڈ ٹیکنالوجی ءَ وزارت موسمیاتی مٹ ءُ بدلی ءُ چاگردی یکوئی ءِ کمک ءَ جوڑ بوتگیں گرین ٹیک ہب ءِ بابت ءَ ھم سرپد کت۔ اے گامگیج ءِ مول ءُ مراد سبز ٹیکنالوجی ءُ پائیدار کاروباری منصوبگ آنی سر ءَ کار کنوکیں ورنا کاروباری مردم آناں کمک کنگ اِنت۔ وفاقی وزیر ءَ گوشت کہ سبز کاروباری ءِ تہ ءَ ورنا آناں کمیں کمک ءِ پھجارینگ ءَ چہ گیش نہ اِنت بلے آھاں پٹ ءُ پول، نوکیں چیز ءُ عملی گیواری ءِ واستہ موہ ھم پجارینگ بہ بیت کہ ایشی ءَ چہ چاگردی ءُ موسمی چیلنج آنی گیواری ءَ کمک رسیت۔ جین میریٹ ءَ وفاقی وزیر ءَ را برطانیہ ءِ یوتھ انٹرپرینرشپ پروگرامز ءُ برٹش ہائی کمیشن ءِ کمک ءَ پاکستان ءَ بوھوکیں جتا جتائیں منصوبگ آنی بابت ءَ ھم سرپدی دات کہ ایشی ءِ تہ ءَ موسمیاتی لچک ءُ چاگرد دوستیں گیواری ءِ سر ءَ دلگوشی دیگ بیت۔ گند ءُ نند ءَ زوتیں ھال ءِ نظام ءَ را گیش موثر جوڑ کنگ ءُ موسمیاتی آفت آنی گوما گر ءُ چیل بوھگ ءِ واستہ تیاری ءَ را گہتر کنگ ءِ جیڈھ آنی سر ءَ ھم ھیال ریچی کنگ بوت۔ برطانوی ہائی کمشنر ءَ موسمیاتی بدلی ءُ چاگردی ہم آہنگی ءِ وفاقی وزیر ءَ گوں گند ءُ نند کتگ، گرین کمپیکٹ ءِ نفاذ ءُ آیوکیں کارروائی ءِ بابت ءَ گپ ءُ تران کتگ۔