تیزی ءَ گوں آباتی ءِ گیشی مزنیں چیلنج جوڑ بوتگ، وفاقی وزیر ءِ راجی جان سلامتی ءِ راجی آباتی ءِ استحکام ءِ پروگرام ءِ سر ءَ برجم داشتگیں مراگش ءَ گوں تران

اسلام آباد۔9جون  (اے پی پی): راجی جان سلامتی ءِ وفاقی وزیر سید مصطفیٰ کمال ءَ گوشت کہ پاکستان ءَ ھمک سال 5.6 ملین ءَ چہ گیش زھگ ودی بنت ءُ آباتی ءِ تہ ءَ ترندی ءَ گوں گیشی مزنیں چیلنج جوڑ بوتگ۔ وفاقی وزیر ءَ راجی آباتی ءِ استحکام ءِ پروگرام (2026-35) ءِ سر ءَ برجم داشتگیں مراگش ءَ گوں تران کنان ءَ گوشت کہ گیش بوھوکیں آباتی ءَ چہ ملک ءِ وسیلگ، روزگار، وانگ ءُ زانگ، جان سلامتی ءُ ایندگر بنیاتی آسراتی آنی سر ءَ سک باز زور دیگ بوھگ ءَ اِنت۔ آئی ءَ گوشت کہ حکومت آباتی ءِ تہ ءَ گیشی ءِ جیڈھ ءَ گوں گر ءُ چیل بوھگ ءِ واستہ عملی گامگیج کنگ ءَ انت ءُ اے درگت ءَ راجی تک ءَ ھمگرنچیں حکمت عملی جوڑ کنگ بوھگ ءَ انت۔ آئی ءَ گوشت کہ آباتی ءِ گیشی ءِ سبب ءَ ورنا سرکاری نوکری ءَ ھوار جتا جتائیں شوبگ آنی تہ ءَ مشکلات ءِ آماچ انت۔ آئی ءَ گوشت کہ خاندانی منصوبگ بندی جہانی جان سلامتی ءِ کوریج ءِ بنیات انت ءُ جان سلامتیں چاگرد ءِ جوڑیشت ءِ واستہ آباتی ءِ توازن المی انت۔ گند ءُ نند ءِ تہ ءَ کارندہ آں دیوان ءَ را بریفنگ دات ءُ گوشت کہ اگاں انوگیں رفتار ءَ آباتی ءِ تہ ءَ گیشی برجاہ بہ بیت گڈا پاکستان ءِ آباتی تاں 2050ءَ تاں 390 ملین ءَ سر بوت کنت ایشی ءَ چہ ملکی مڈّی آنی سر ءَ سک باز دباؤ اتک کنت۔ اے موہ ءِ سر ءَ وفاقی جان سلامتی ءِ وزیر ءَ اے گپ ءِ سر ءَ زور پر دات کہ آباتی ءِ استحکام ءِ راجی ٹارگٹ ءِ سر ءَ سر بوھگ ءِ واستہ سیاسی واھشت ، بین صوبائی ھمگرنچی ، موثر پالیسی سازی ءُ لوٹوکیں وسیلگ آنی پجارینگ المی اِنت۔ مراگش ءَ بہر زوروکیں دیمروئی شریکاں پاکستان ءِ آباتی ءِ استحکام ءِ ایجنڈا ءِ برجاھیں کمک ءِ جزم ءِ درشان کت ءُ آباتی ءِ استحکام ءِ راجی پروگرام 2026-35 ءِ مول ءُ مراد آنی سر ءَ سر بوھگ ءِ واستہ کمک ءِ دل یکیمی دات۔