پاک چین ءِ دوستی دنیا ءِ تہ ءَ یک انچیں مثالے، سی پیک پاکستان ءِ دیمروئی ءِ یک ھاسیں ستونے، وفاقی وزیر احسن اقبال

اسلام آباد۔9جون  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ پاکستان ءُ چین ءِ نیام ءَ دوستی دگنیا ءِ تہ ءَ یک بے دروریں مثال اِنت کہ ایشی ءِ ھچ وڑیں مثال نیست، وھدیکہ چین ءُ پاکستان اقتصادی راہداری پاکستان ءِ اقتصادی دیمروئی ءُ دمگی سیادی آنی یک ھاسیں ستون جوڑ بوتگ۔ چینی سفارتخانہ ءِ نیمگ ءَ دمگی جاور ھال آنی ھوالگ ءَ برجم داشتگیں سیمینار ءَ گوں تران کنان ءَ وفاقی وزیر ءَ گوشت کہ گوستگیں 75سال ءَ چہ پاک چین ءِ سیادی مدام مھکم بوھگ ءَ انت ءُ اے دوستی ءَ کدی ھم نزوری ءُ زوال ءِ دور ءِ تجربگ نہ بوتگ۔ آئی ءَ گوشت کہ پاک چین ءِ دوستی ہمالیہ ءَ چہ برز انت، سمندراں چہ جہل انت ءُ ہرچ چکاس ءَ گوں برداشت کنت۔ احسن اقبال ءَ گوشت کہ 2013 ءَ پاکستان مسلم لیگ ءِ سرکار ءَ نواز شریف ءِ سروکی ءَ گوں چین ءَ سی پیک ءِ معاہدہ کتگ ات۔ اے وھد ءَ اے منصوبہ یک وابے ات بلے لہتیں ماہ ءِ تہا اے منصوبہ یک عملی روڈ میپ ءِ تہا بدل بوت۔ آئی ءَ گوشت کہ سی پیک ءِ بنداتی بھر ءَ نزیک ءَ 46ارب ڈالر ءِ مفاہمت نامہ ءِ سر ءَ دستخط کنگ بوتگ ایشی ءِ تہ ءَ چہ 25ارب ڈالر ءِ چینی سرمایہ کاری ءَ عملی رنگ زرتگ۔ آئی ئَ گوشت کہ پاکستان ئُُ چین ئَ یکجائی کوشست ئَ گوں اے راجدپتری منصوبگ ئَ سوبمندیں رنگ ئَ دیم ئُُ برتگ ئُُ دوئیں ملک آنی نیمگ ئَ ایشی ئِ سرجمی ئِ واستہ ’’یک جان، دو بدن ‘‘ئِ رنگ ئَ کار کتگ۔ وفاقی وزیر ءَ گوشت کہ سی پیک نوں ایوک ءَ دیمروئی منصوبگ نہ بلکیں یک انٹرنیشنل برانڈ ءِ جوڑ بوتگ، ایشی ءِ تہ ءَ سرجمیں دگنیا ءِ کمپنی سرمایہ کاری ءُ شریکداری ءِ تہ ءَ دلگوش اَنت۔ آئی ءَ گوشت کہ علامہ محمد اقبال ءَ چین ءِ دیمروئی ءِ بابت ءَ نزیک ءَ 9 دہائی پیسر پیش گوئی کتگ ات کہ مرچی یک حقیقت ءِ جوڑ بوتگ۔ آئی ءَ گوشت کہ پاکستان ءِ اولی خلائی مشن ءِ تیاری چین ءِ کمک ءَ برجاہ انت ایش دوئیں ملک آنی نیام ءَ سائنسی ءُ ٹیکنالوجی ءِ کمک ءِ یک نوکیں درور ءِ ثابت بیت۔ احسن اقبال ءَ گوشت کہ سی پیک ءَ را نوکیں جزم ءِ گوما پدا فعال کنگ بوتگ ایشی ءِ دومی بھر ءِ سر ءَ پیشرفت بوھگ ءَ انت۔ آئی ءَ وتی جزم ءِ درشان کت کہ پاکستان سی پیک ءِ نوکیں دور ءَ چہ سیت زورگ ءِ واستہ سرجمی ءَ جزمیگ انت۔ آئی ءَ گوشت کہ دوئیں ملک سرمایہ کاری ءِ دیمروئی، اقتصادی کمک ءَ را مھکم کنگ ءُ دمگی دیمروئی ءِ یکجائی مکسد آنی سر ءَ سر بوھگ ءِ واستہ نزیکی ءَ گوں کمک برجاہ انت، ایشی ءَ چہ آیوکیں وھد ءَ پاک چین ءِ سیادی گیش مھکم بنت۔