پاک چین ءِ دوستی ءِ بنیات بے وھدیں، آزمائشی ءُ آہنی براتانی یک بے دروریں سیادی ءِ سر ءَ اِنت کہ نسل ءَ چہ نسل ءَ دیم ءَ اتکگ،  دوئیں ملکانی بے دروریں سیادی روایتی سفارتی سیادی ءَ چہ باز دیم ءَ روت، عطا اللہ تارڑ

اسلام آباد۔9جون  (اے پی پی): وفاقی وزیر برائے اطلاعات ءُ نشریات عطا اللہ تارڑ ءَ پاکستان ءُ چین ءِ نیام ءَ دو نیمگی کمک ءَ را گیش کنگ ءُ چین ءُ پاکستان ءِ اقتصادی راہداری ءَ را گیش دیمروئی دیگ ءِ حکومت ءِ عزم ءِ سر ءَ زور پر دیان ءَ گوشت کہ پاکستان ءُ چین ءِ دوستی ءِ بنیات یک انچیں سیادی ءِ سر ءَ اِنت۔ پدریچ. مزن وزیر شہباز شریف ءِ گوستگیں روچاں چین ءِ تر ءُ تاب ءَ پد پاکستان ءُ چین ءِ دوستی نوکیں بالاد ءَ سر بوتگ۔ پاکستان ءُ چین ءِ نیام ءَ یک انفرادی سیادی یے است کہ روایتی سفارتی سیادی ءَ چہ باز دیم ءَ انت۔ آئی ءَ سی پیک ءِ جوڑیشت، پاک چین ءِ 75سال دوستی ءُ گلوبل گورننس انیشیٹیو ءِ ھوالگ ءَ سئے شمبے ءِ روچ ءَ ’’شین ہوا نیوز ایجنسی‘‘ ءِ نیمگ ءَ برجم داشتگیں مراگش ءَ گوں گشتانک دیگ ءَ ات۔ اے موہ ءِ سر ءَ منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال، پاکستان ءَ چینی سفیر جیانگ ژیڈونگ ءُ ایندگر ھم ھوار اتنت۔ وفاقی وزیر ءِ اھوالکاری ءَ گوشت کہ اے نہ ایوک ءَ حکومت ءِ واستہ بلکینگ ءَ سرجمیں پاکستانی راج ءِ واستہ فخر ءِ گپ اِنت کہ ما انچیں ابدمانیں سیادی ءِ 75سال ءِ سرجمی ءِ جشن ءَ کنگ ءَ ایں کہ مئے واستہ یک راج ءِ بستار ءَ سک باز ارزشتی اِنت ءُ مئے دل آنی واستہ سک باز نزیک اِنت۔ آئی ئَ گوشت کہ ما انچیں مھکمیں ئُُ نا بروتیں بندوک ئِ گوں بندوک آں کہ وھد ئِ گوما گیش مھکم بوتگ۔ آئی ءَ گوشت کہ مارا اے بے دروریں شرف اِنت کہ پاکستان ءُ چین ءِ نیام ءَ ’’آہنی برات‘‘ ءِ سیادی استثنائی ءُ بے دروریں درجہ ءِ اِنت۔ وفاقی وزیر ءَ دوئیں ملک آنی سروکی ءُ الس آناں شگر ءُ منت درشان کت ءُ گوشت کہ ما گوستگیں روچاں چین ءِ تر ءُ تاب کتگ ات کہ اودا پاک چین دوستی ءِ عزم نوک کنگ بوتگ ات ءُ اے وژن ءَ را عملی حقیقت ءِ تہ ءَ بدل کنگ ءِ واستہ نوکیں الہام ءُ دلبڈی رستگ ات۔ آئی ءَ گوشت کہ مزن وزیر شہباز شریف ءِ گوستگیں چین ءِ تر ءُ تاب ءَ پاک چین ءِ دوستی ءَ را نوکیں کوڑھ آنی سر ءَ سر کتگ۔ من مدام وتی چینی سنگتاں گُشاں کہ اے دوستی نسل نسل ءَ مارا رستگ ءُ اے یک انچیں میراثے کہ مارا چہ وتی مزنیں مردماں رستگ، ہما کسہ کہ ما اشکنگ ءَ ایں ءُ ہما دیمروئی کہ ما یکجاہ کتگ آ غیر معمولی انت۔ عطا اللہ تارڑ ءَ گوشت کہ پاکستان ءُ چین ءِ نیام ءَ نا ایوک ءَ یکجائی سیمسر ءِ سر ءَ بلکینگ ءَ کوہ، دریا ھوار یک مھکمیں سیادی ءِ ھم است اِنت کہ ایشی ءَ را پہ دائمی فخر ءُ ارزشتی اِنت۔ وفاقی وزیر ءَ صدر شی جن پنگ ءِ وژنری سروکی ءَ گلوبل گورننس ءِ گامگیج ءَ را ساڑات ءُ گوشت کہ اے گامگیج ءَ کمیں وھد ءِ تہ ءَ جوانیں آسراتی دیگ بندات کتگ ایشی ءِ مول ءُ مراد گلوبل ساؤتھ ءِ الس آنی زندمان ءَ را گہتر کنگ ءُ آوانی نمائندگی ءَ را دیمروئی دیگ اِنت۔ آئی ءَ گوشت کہ چین پاکستان اقتصادی راہداری ءَ دوئیں ملک آنی اُلس ءَ را نزیک کنگ ءَ کلیدی کرد پیلو کتگ وھدیکہ صدر شی جن پنگ ءِ اسلام آباد ءِ تر ءُ تاب یک راجدپتری سنگ ءِ بوتگ ایشی ءَ چہ پاکستان ءُ چین ءِ اُلس آنی واستہ دیمروئی ءُ وشھالی ءِ نوکیں سفر ءِ بندات بوتگ۔ آئی ءَ گوشت کہ وفاقی وزیر ءِ اھوالکاری ءُ شنگکاری ءِ بستار ءَ منی گمان اِنت کہ دود ءُ ربیدگی تبادلہ، السی سیادی ءُ میڈیا ءِ کمک اے شریکداری ءُ سیادی ءَ را گیش مھکم کنگ ءَ ھاسیں کرد پیلو کت کنت۔ آئی ءَ گوشت کہ گوستگیں 75سال ءَ اے گپ ثابت کتگ کہ پاک چین ءِ دوستی ھما دوستی انت کہ برجم انت، آزمائش کنگ بیت ءُ ھمک موسم ءَ وھد ءِ چکاس ءَ برجم انت۔ وفاقی وزیر ءَ گوشت کہ جتا جتائیں دور ءُ دہائی آنی ساھت ءَ دو نیمگی سیادی جتا جتائیں پڑ ءَ چہ گوستگ انت بلے ھمک گوزوکیں سال ءِ گوما پاک چین ءِ دوستی گیش مھکم ءُ مھکم بوتگ۔ آئی ءَ گوشت کہ آ وت تعلقات عامہ ءِ تبادلہ ءِ عملی مثال اِنت۔ پنجاب حکومت ءِ یک ورنائیں افسرے ءِ بستار ءَ آ چین ءِ تر ءُ تاب کنوکیں ڈل آنی بہر بوتگ کہ اودا آئی ڈی سی پی سی ءِ گوما مدام رابطہ ءُ تبادلہ بوتگ۔ آئی ءَ گوشت کہ اے تجربت آناں اے گپ ثابت کتگ کہ اے رنگیں پبلک ریلیشنز ایکسچینج سک باز جوانیں، پائدگ مند بوت کنت ءُ دوئیں ملک آنی اُلس ءِ واستہ جوانیں آیوکیں باندات ءِ بنیات ثابت بوت کنت۔ وفاقی وزیر ءِ اھوالکاری ءَ سی پیک ءَ را دیم ءَ برگ ءِ واستہ پاکستان ءِ حکومت، مزن وزیر ءُ اھوالکاری ءِ وزارت ءِ جزم ءِ درشان کت۔ آئی ءَ گوشت کہ گلوبل گورننس ءِ گامگیج ءَ را دیمروئی دیگ ءِ تہ ءَ سرگرمیں کرد ءَ را برجاہ دار ایت۔ وفاقی وزیر ءَ وتی گشتانک ءِ گڈسرا ”پاک چین ءِ دوستی زندگ بات“ ءِ گپ ءِ سر ءَ آسر کت۔