پاکستان نا برطانیہ ٹی رہینگوک گڑاس پردیسی تا کنڈآن آزاد جموں و کشمیر نا بابت تروک آ غیرزموارانہ و راستی تیان لاعلم اشارہ و دوبہ غاتیا گڑتی نا درشان

اسلام آباد۔ 08 جون (اے پی پی ) پاکستان برطانیہ ٹی رہینگوک گڑاس پردیسی بندغ آتا کنڈآن آزاد جموں وکشمیر نا بابت تروک آ غیر زموارانہ و راستی تیان لاعلم اشارہ و دوبہ غاتیا گڑتی نا درشانی ءِ کرسا ہمو بندغ آتے مشورہ تسنے کہ او پاکستان و آزاد جموں وکشمیر نا اندرونی باندات آتیٹی نیام تمنگ آن پاناد کیر،جوان مریک کہ او ہراڑے رہینگ انگ ءُ اوملک انا شونداری و آسودہی ٹی مثبت کڑد ادا کیر۔ دوشنبے نادے آ دفترخارجہ غان جاری بیان نا رداٹ پاکستان گڑاس برطانوی پارلیمنٹ نا باسک آتا کنڈآن کروک آ بے گرج تران و چست کروک آ سوج آتا ہم نوٹس ءِ ہلکنے ہرا دا باندات نا تاریخی پس منظر آن ناواقفیت و بے چکاری نا عکاسی ءِ کیرہ۔ دفترخارجہ نا رداٹ ہرافک داسہ ہم نوآبادیاتی دور انا سوچ اٹی اختہ ءُ اوفتے یات ترفنگ المی ءِ کہ پاکستان برطانیہ ٹی رہینگوک گڑاس پردیسی بندغ آتا کنڈآن آزاد جموں وکشمیر نا بابت تروک آ غیرزموارانہ و راستکی تیان لاعلم اشارہ و دوبہ غاتا گڑتی اتون نوٹس ءِ ہلکنے۔ دا بندغ آتے مشورہ تننگک کہ او پاکستان و آزاد جموں و کشمیر نا اندرونی باندات آتیٹی نیام تمنگ آن پاناد کیر۔ پاکستان اسہ وتواجہ  وجمہوری ملک اسے ہرا ایلو ملک آتا اندرونی باندات آتیٹی عدم مداخلت نا اصول آ پکایخین تخک و ایلوفتیان ہم ہندا طرز عمل نااومیت کیک۔ پاکستان و آزاد جموں وکشمیر نا حکومت آک شاری تا پرامن اتجامعی، درشانی سلاہ نا آجوئی و جمہوری عمل اٹی بشخ ہلنگ نا آئینی حق ءِ پورو وڑاٹ امنا و شرف ءِ کیک ولے پرغ و بٹ ، سرکاری ملکیت و السی خذمت بشمول ہسپتال آتا بھسکاری، نیز بے گناہ شاری و کانود نافذ کروک آ کارندہ غاتا خون نا ہچ ءُ حالیت اسے ٹی موکل تننگ مفک۔ ترجمان دفترخارجہ پارے کہ نن برطانوی حکومت آ زور شاغنہ کہ او کالعدم تنظیم تا مخ تفی ءِ کروک آ زموار آتے معلومدار کے و متنبہ کے کہ او داوڑنا گام گیج آتیان پاناد کیر و آزاد جموں وکشمیر و پاکستان نا آئین اٹی نوشتہ جمہوری عمل ، عدالتی فیصلہ و کانود نا حکمرانی نا شرف ءِ کیر۔