بنجائی وزیر حوالکاری و شینکاری عطاء اللہ تارڑ تون ازبکستان نا سفیر علی شیر تختیوف نا اوڑدہی

اسلام آباد۔ 08 جون (اے پی پی ) بنجائی وزیر حوالکاری و شینکاری عطاء اللہ تارڑ پاکستان و ازبکستان نا اسیجائی تاریخ و دودوربیدہ ئی میرات ءِ تالان کننگ نا گرج آ زور شاغانے۔ اودوشنبے نادے آ داڑے اوڑدہی کن بروک آ ازبکستان نا سفیر علی شیر تختیوف تون گپ وتران کریکہ۔ اوڑدہی ٹی ہڑتوم آ ملک آتا نیام اٹ فلم سازی نا بشخ اٹی کمکاری ءِ ودفنگ تون اوار میڈیا، فلم و دودوربیدہ ئی کمکاری نا مون آ دننگ آ سرجمی اٹ گپ وتران مس۔ ازبکستان نا سفیر ڈیہہ اٹی امن و اسلام آباد امن مذاکرات اٹی پاکستان نا کڑد و کوشست آتا ستاءِ کرے۔ داوخت آ گپ وتران کرسا بنجائی وزیر حوالکاری پارے کہ پاکستان و ازبکستان تون تینا تعلقداری تے قدر انا نظر اٹ ہرک۔ اوپارے کہ ازبکستان تون اواری اٹ گونڈ ءُ فلم، دستاویزی فلم یا راگ سیریز نا آپشن تیا سجفنگ انگ ءِ، داوڑنا ڈٹ آتیکن آزموندہ کار پروڈکشن ادارہ غاتا شمولیت المی ءِ۔ عطاء اللہ تارڑ پارے کہ اسیجائی فنڈنگ نا کمک اٹ بھلو کچ اسے آ فلمی ڈٹ آتے مون آ دننگ مریک۔ بنجائی وزیر حوالکاری پاکستان و ازبکستان نا اسیجائی تاریخ و دودوربیدہ ئی میرات ءِ تالان کننگ آ زور شاغا ، دامسخت کن ہڑتوم آ کنڈآن سوشل میڈیا ٹیم تا نیام اٹ رابطہ غاتا مون آ دننگ ، اسیجائی ڈیجیٹل مواد آتا تیاری و سوگو آن لائن تشہیری حکمت عملی اس تینا کننگ آ امنا کننگا۔ بنجائی وزیر پارے کہ پاکستان و ازبکستان نا نیام اٹ میڈیا ادارہ غاتا نیام اٹ کمکاری ءِ پین ودفنگک، دارداٹ ہڑتوم آکنڈآن صحافی تا مطالعاتی دورہ ہم اہم پیش رفت پک مریک۔ اوہڑتوم آ ملک آتا نیام اٹ دودوربیدہ ئی و میڈیا تعلقداری تے پوسکن ءُ جہت اس تننگ نا عزم انا درشانی ءِ کرے۔