زمین  ءِ رکھینگ ءُ موسمیاتی ڈکال ءِ ھلاپ ءَ جنگ ءِ ھاترا اجتماعی کوشست آناں مھکم کنگ وھد ءِ لوٹ اِنت، سینیٹر محمد اسحاق  ڈار

اسلام آباد۔5جون  (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ موسمیاتی ڈکال ءِ ھلاپ ءَ جنگ ءِ واستہ یکجائی کوشست آناں گیش مھکم کنگ ءِ ضلورت ءِ سر ءَ زور پر دات ءُ گوشت کہ پاکستان سیارہ ءِ رکھینگ ءُ موسمیاتی ڈکال ءِ ھلاپ ءَ جوانیں رنگ ءَ جنگ ءِ واستہ یکجائی گامگیج آناں مھکم کنگ ءِ واستہ جزم اِنت۔ جمعہ ءِ روچ ءَ درئی کارانی کارگس ءِ رد ءَ آئی ءَ اے ھیالانی درشانی چاگرد ءِ جھان ءِ روچ ءِ موہ ءَ وتی کلوہ ءِ تہ ءَ کت۔ نائب مزن وزیر ءَ گوشت کہ پاکستان موسمی مٹ ءُ بدلی ءَ چہ گیش آماچیں ملک آنی تہ ءَ ھوار اِنت، پدا ھم برجاھیں سیلاب، گلیشیر آنی ترندی ءَ گوں پگھل بوھگ، ھشک سالی، سکیں گرم ءُ گیش بوھوکیں آپی زور ءِ وڑیں چیلنج آنی دیم ءَ مھکم ءُ جزم ءِ درشان کنگ ءَ اِنت۔ آئی ءَ گوشت کہ سیارہ ءِ رکھینگ ءُ موسمی ڈکال ءِ ھلاپ ءَ جنگ ءِ واستہ یکجائی کوشست آناں مھکم کنگ وھد ءِ ضلورت اِنت۔ سینیٹر محمد اسحاق ڈار ءَ گوشت کہ موسمی بدلی، زندمان ءِ تنوع ءِ ھلاسی ءُ چاگردی ھرابکاری ءِ وڑیں یکے دومی ءَ گوں سیادی داروکیں جھان ءِ جیڈھ آناں گیواری ءِ واستہ میاں اوستمانی کمک ءَ را گیش گیش کنگ المی اِنت، اے درگت ءَ ’’مشترکہ بلے جتا جتائیں ذمہ واری ءُ وتی وتی توانائی‘‘ ءِ اصول ءَ را ھیال ءَ دارگ بہ بیت۔ آئی ءَ گوشت کہ راجی تک ءَ پاکستان ءِ حکومت چاگردی رکھینگ ءَ را وتی پالیشی ءِ اولیت آنی تہ ءَ یک مرکزی بھر جوڑ کنگ ءِ واستہ جزم اِنت، اے درگت ءَ یک ھاسیں سنگ میل ءِ ھمک شہری ءِ بنیاتی آئینی ھک ءِ رنگ ءَ ساپ ءُ سلہ ءُ پائیدار چاگرد ءِ ھک ءِ منگ اِنت۔ نائب مزن وزیر ءَ گوشت کہ پاکستان موسم دوستیں ہاؤسنگ منصوبگ آناں دیمروئی دیگ ءِ واستہ ھم عملی گامگیج کنگ ءَ اِنت، ساپیں توان ءُ چاگرد دوست ءُ پائیداریں جوڑیشت ءِ رھبند آنی تہ ءَ ترندیں ردوم ءِ واستہ، البت موسمیاتی ڈکال ءِ سنگینی ءِ واستہ میاں اوستمانی براتی ءَ را یکجائی ءُ موثر گامگیج آناں دل یکیمی کنگ ءِ ضلورت اِنت۔ اے موہ ءِ سر ءَ آئی ءَ آذربائیجان ءِ حکومت ءِ منت گپت کہ آئی ءَ 2026 ءِ جھان ءِ چاگردی روچ ءِ میزبانی کتگ ءُ گوشت کہ پاکستان جھان ءِ چاگردی چیلنج آناں گیواری ءِ واستہ میاں اوستمانی کمک ءُ جوڑیشت ءِ گپ ءُ تران ءِ دیمروئی ءِ تہ ءَ آذربائیجان ءِ سروکی ءِ کوشست آنی ستا ءَ کنت۔