مسلم لیگ ن ءِ دیمروئی، اقتصادی استحکام ءُ سرکاری خدمت ءِ یک مدامیں سنت ءِ واھند اِنت، ڈاکٹر طارق فضل چوہدری

اسلام آباد۔4جون  (اے پی پی): پارلیمانی کارانی وفاقی وزیر ڈاکٹر طارق فضل چوہدری ءَ گوشت کہ پاکستان مسلم لیگ ن ایوک ءَ سیاسی گل ءِ نام نہ اِنت بلکیں سرجمیں ملک ءَ دیمروئی، اقتصادی برجائی ءُ سرکاری ھزمت ءِ برجاھیں روایت اِنت۔ پنچ شمبے ءِ روچ ءَ سوشل نیٹ ورک ویب سائٹ ایکس ءِ سر ءَ وتی بیان ءِ تہ ءَ آئی ءَ گوشت کہ گوستگیں وھد گواہ اِنت کہ ھر وھد ءَ کہ سروکی ءَ موہ رست گڑا ما الس ءَ را سفری مشکل، بجلی ءِ لوڈ شیڈنگ ءُ جان سلامتی ءُ وانگ ءُ زانگ ءِ وڑیں بنیاتی جیڈھ آناں چہ رکینتگ۔ گلگت بلتستان ءِ سربلندیں مردم اے گپ ءِ گواہ اَنت کہ بلتستان یونیورسٹی، گلگت کارڈیک ہسپتال، گلگت اسکارڈو موٹروے، سیف سٹی، ڈینش اسکول ءُ کینسر ہسپتال ءِ وڑیں بے کساسیں میگا پروجیکٹ اے وژن ءِ گواہ اَنت۔ اگاں سرکاری ھزمت ءِ اے سفر ءَ سیاسی اڑاند ایر کنگ مہ بنت گڈا اے پارٹی ءِ سرجمیں توان است انت کہ آ پاکستان ءَ دنیا ءِ نامدار تریں ءُ دیمروئی کتگیں ملکانی لڑ ءَ جاہ بہ دنت۔