پاکستان ایتھوپیا ءِ گوما دود ءُ ربیدگ ءُ سیل ءُ سواد ءِ سیادی ءَ را گیش دیمروئی دیگ ءِ واھشت مند اِنت، راجی ورثہ ءُ دود ءُ ربیدگ ءِ وفاقی وزیر اورنگزیب خان کھچی

اسلام آباد۔4جون  (اے پی پی): راجی ورثہ ءُ دود ءُ ربیدگ ءِ وفاقی وزیر اورنگزیب خان کھچی ءَ گوشت کہ پاکستان ایتھوپیا ءِ گوما دود ءُ ربیدگ ءُ سیل ءُ سواد ءِ سیادی ءَ را گیش دیمروئی دیگ ءِ واھشت مند اِنت ءُ پاکستان ءِ مزن وزیر ءِ ہدایت ءِ رد ءَ دوئیں ملک آنی نیام ءَ مردم آنی نیام ءَ مردم آنی رابطہ آناں گیش مھکم کنگ ءِ واستہ ھمک رنگیں کمک پجاری کنگ بیت۔ آئی ءَ اے گپ پنچ شمبے ءِ روچ ءَ پاکستان ءَ ایتھوپیا ءِ سفیر ڈاکٹر عمر حسین اوبا ءَ گوں راجی میراث ءُ دود ءُ ربیدگ ءِ وزارت اسلام آباد ءَ گند ءُ نند ءِ ساھت ءَ کت۔ وفاقی وزیر ءَ گوشت کہ پاکستان ایتھوپیا ءِ گوما وتی سیادی آناں سک باز ارزشت دنت ءُ دود ءُ ربیدگ ءُ میراث ءِ شوبگ ءَ کمک ءَ را گیش کنگ ءِ واھشت مند اِنت۔ آئی ءَ گوشت کہ ڈل آنی مٹ ءُ بدلی، دود ءُ ربیدگی گل آنی تر ءُ تاب ءُ یکجائی دود ءُ ربیدگی مراگش آنی برجائی دود ءُ ربیدگ ءِ سفارتکاری ءَ را دیمروئی دیگ ءِ واستہ وھد ءِ ضلورت انت۔ آئی ءَ سوج دات کہ پاکستان ءَ ایتھوپیا ءِ دود ءُ ربیدگ ءِ روچ بندات کنگ بہ بنت وھدیکہ دوئیں ملک آنی دود ءُ ربیدگ ءِ ڈل آنی وت مہ وتی تر ءُ تاب ءِ ھم برجم دارگ بہ بیت۔ آئی ءَ گوشت کہ پاکستان ءَ پیسر ءَ چہ ترکی ءُ تاجکستان ءَ ھوار جتا جتائیں ملک آنی گوما دود ءُ ربیدگ ءِ ھپتگ آنی برجم دارگ بوتگ ءُ ایتھوپیا ءِ دود ءُ ربیدگ ءِ ڈل ءَ را ھم لوک ورسا ءَ برجم داشتگیں مراگش آنی تہ ءَ بھر زوری ءِ دعوت دیگ بیت کہ ایشی ءِ تہ ءَ پاکستان ءِ دمگی دود ءُ ربیدگ ءِ رنگ وشھالیں رنگ ءَ پیش کنگ بنت۔ ایتھوپیا ءِ سفیر ءَ پاکستان ءِ مہمانداری ءِ توسیپ کنان ءَ وتی ملک ءِ وشیں دود ءُ ربیدگ ءِ ورثہ، منفردیں کیلنڈر ءِ نظام، روایتی میلہ ءُ زبانی ءُ نسلی تنوع ءِ بابت ءَ سرجمیں بریفنگ داتگ۔ آئی ءَ ایتھوپین ایئر لائنز ءِ ارزشت ءِ سر ءَ ھم زور پر دات ءُ گوشت کہ اے ایئر لائن پاکستان ءُ ایتھوپیا ءِ ھوار افریقہ ءِ نیام ءَ ھم سیادی ءَ را گیش مھکم کنگ ءَ اِنت ایشی ءَ چہ سیل ءُ سواد ءُ دود ءُ ربیدگی تبادلہ ءَ را دیمروئی دیگ بوھگ ءَ اِنت۔ سفیر ءَ دوئیں ملک آنی وزارت آنی نیام ءَ دود ءُ ربیدگی کمک ءَ را ادارگ جوڑ کنگ ءِ واستہ یک مفاہمت نامہ ءِ سر ءَ دستخط کنگ ءِ ھم تجویز پیش کتگ۔ وفاقی وزیر ءَ تجویز ءِ وش اتک کنان ءَ سرجمیں رنگ ءَ کمک ءِ دل یکیمی دات ءُ گوشت کہ پاکستان ایتھوپیا ءِ گوما دود ءُ ربیدگی سیادی ءَ را نوکیں بالاد ءَ سر کنگ ءِ واستہ تیار انت۔ سیکرٹری راجی میراث ءُ دود ءُ ربیدگ ڈویژن اسد رحمان گیلانی ءَ ھم گند ءُ نند ءَ بھر زرتگ ءُ گوشت کہ ایتھوپیا ءِ دود ءُ ربیدگ ءِ ڈل آنی پاکستان ءِ تر ءُ تاب ءَ چہ دوئیں ملک آنی نیام ءَ سیادی گیش مھکم بنت۔