وزیراعظم نا سلاہکار امور کشمیر و گلگت بلتستان نا انجینئر امیر مقام تون اوڑدہی

گلگت۔ 03 جون (اے پی پی ) وزیراعظم نا سلاہکار امور کشمیر ، گلگت بلتستان و ریاستی سیمی امور شبیر احمد عثمانی گلگت اٹی بنجائی وزیر انجینئر امیر مقام تون اوڑدہی کرے ہراٹی جی بی ٹی برجا گچین کاری سرجز ، سیاسی حالیت، تنظیمی باندات و السی رابطہ مہم نا بابت امور نا بارواٹی گپ وتران کرے۔ او گچین کاری عمل نا چندی پلوآتا جاچ ءِ ہلسا سیاسی کارندہ و ہندی سرکڑدہ غاتون رابطہ غاتے پین گچین و سوگو کننگ نا گرج آ زور شاغا۔ داوخت آ گلگت بلتستان اٹی پارٹی نا گچین کاری حکمت عملی، السی ویل آتا ایسری و تنظیمی پنجر ءِ پین فعال جوڑ کننگ نا بابت چندی سلاہ تیا ہم سجفنگا ۔ ہڑتوم آ راہشونک داعزم انا درشانی ءِ کریر کہ الس تون خڑکی رابطہ ءِ برقرار تخسا ڈیہہ انا شونداری، شونہالی و جمہوری عمل نا مون آ دننگ کن کوشست آتے برجاتخنگک۔ اوڑدہی ٹی گلگت بلتستان نا جم سیاسی حالیت و بروک آ گچین کاری تا رداٹ پارٹی نا تیاری تا ہم جاچ ءِ ہلنگا۔ بشخ ہلوک آک گچین کاری عمل ناشفاف، انصاف اٹ و پرامن اڈتننگ نا اہمیت آ زورشاغسا کارندہ غاتے پبی وڑاٹ متحرک تخنگ نا گرج آ امنا کریر۔