وزیرمملکت جان جوڑی گلوبل مینٹل ہیلتھ سمرانسٹیٹیوٹ اٹی بشخ ہلنگ کن امریکہ غا سرمس

اسلام آباد۔ 03 جون (اے پی پی ) وزیر مملکت جان جوڑی ڈاکٹر مختار بھرتھ گلوبل مینٹل ہیلتھ سمرانسٹیٹیوٹ اٹی بشخ ہلنگ کن امریکہ غا سرمس، ہراڑے او واشنگٹن ڈی سی ٹی واقع چلڈرن نیشنل ہسپتال نا دورہ ءِ کرے۔ داوخت آ ہسپتال نا سینئر کمامدار آک اودے بخیرکریر۔ دورہ ٹی ڈاکٹر مختار بھرتھ ہسپتال نا کمانڈ سینٹر و شیخ زید انسٹیٹیوٹ آف پیڈیا ٹریک سرجیکل انوویشن نا ہم دورہ ءِ کرے۔ اوڑتون اوار گلوبل انسٹیٹیوٹ آف ہیومن ڈویلپمنٹ نا بانی ڈائریکٹر عثمان ہمدانی ہم ساڑی ئس۔ وزیر مملکت ءِ چناتا درمان نا پوسکن آ وڑوڈول، ڈیجیٹل ہیلتھ سسٹمز، ٹیلی میڈیسن و پوسکن آ ٹیکنالوجی نا کمک اٹ ناجوڑ آتے فراوان کروک آ آسراتی تیا سرجمی اٹ حوال تننگا۔ دورہ نا وخت آ چنا و ورناتا ذہنی جان جوڑی نا بشخ اٹی کمکاری نا مون آ دننگ نا بابت اسہ خصوصی دیوان اس ہم اڈ ہلک، ہراٹی بنائی تشخیص، جوان درمان، اسکول کہول آ ذہنی جان جوڑی نا پروگرام و کمیونٹی بیسڈ سروسز آ سرجمی اٹ گپ وتران کننگا۔ ڈاکٹر مختار بھرتھ پارے کہ پاکستان و امریکہ نا نیام اٹ چنا وورناتا ذہنی جان جوڑی، پٹ وپول و ٹیلی مینٹل ہیلتھ انا بشخ آتیٹی کمکاری ءِ پین ودفنگ آ امنا مسنے۔ اوپارے کہ ذہنی جان جوڑی نا نظام ءِ سوگو کننگ کن ہیلکاری پروگرام و کاریم نا کچ اٹی ودکی نا گام گیج ہم المی ءِ۔ اوپارے کہ چناتا ذہنی جان جوڑی ٹی زرکاری ملک انا راجی و زرگزرانی آخبت کن بے کچ اہم ءِ، وخت اس کہ پاکستان اٹ ذہنی جان جوڑی نا نظام ءِ سوگو کننگ کن نیشنل مینٹل ہیلتھ پالیسی درستی راستی کرفنگ انگ ءِ۔ وزیر مملکت داہیت آ زور شاغا کہ ذہنی جان جوڑی ءِ جان جوڑی نا اولیت آتیٹی اوار کننگ وخت انا اہم گرج ءِ۔ اوپارے کہ چنا و ورناتا ذہنی جان جوڑی نا مون آ دننگ کن ہرممکن گام گیج کننگک، ہرافتے ٹی اسکول آتیٹی کونسلنگ ، سروسز، استاد آتا تربیت و لمہ وباوہ کن آگاہی پروگرام تا بناخاص اہمیت تخک۔ اوپارے کہ چناتا ذہنی جان جوڑی ٹی زرکاری اسہ روشنا ، رکھوک و سوگو آخبت اسے نا ضمانت ءِ و حکومت دا بشخ اٹی گچین و دیرپا اصلاحات کن سنبرینگوک ءِ۔