مشکل زرگزرانی حالیت آتیٹی حکومت تون تفنگ آ کاروباری برادری نا منت وار، حکومت و نجی بشخ انا سوگو شریداری زرگزرانی شونداری نا ضمانت ءِ، وزیراعظم

اسلام آباد۔ 03 جون (اے پی پی ): وزیراعظم محمد شہباز شریف مشکل زرگزرانی حالیت آتیٹی حکومت تون تفنگ آ کاروباری برادری نا منت واری ءِ ہرفسا پارینے کہ حکومت و نجی بشخ انا سوگو شریداری زرگزرانی شونداری نا ضمانت ءِ ، غیررسمی زرگزران ءِ خراج نیٹ اٹ اتنگ کن گام گیج کننگ انگ ءِ، کاروبار دوست پالیسی تا سوب ملکی زرگزران سوگو و پیشن نا زرکار آتا پت بحال مس۔ داخیال آتا درشانی ءِ او ملک انا پنی آ صنعتکار و پنی آکاروباری شخصیت آتا ڈل اتون گپ وتران کرساکرے ہرا چارشنبے نادے آ داڑے اوڑتون اوڑدہی کریر۔ پی ایم آفس نا میڈیا ونگ آن جاری بیان نا رداٹ دا اوڑدہی ملک انا جم زرگزرانی شونداری نا رفتار ءِ ترند کننگ و مالی سال 2026-27نا بجٹ نا بابت کاروباری برادری تون سلابت نا رداٹ ئس۔ ڈل اٹی میاں محمد منشا، عارف حبیب، عاطف باجوہ، محمد علی تبہ ، مصدق ذوالقرنین، زیاد بشیر، شہزاد سلیم، زیلاف منیر، عمر سعید، عمر منشا، یوسف سعید، کامران ارشد، خرم مختار ، آصف پیر، سلطان گوہر اعجاز، فواد انور، ذوالفقار حیات، جاوید اقبال ، یوسف حسین ، عامر ابراہیم ، خواجہ مسعود اختر و اعجاز نبی ئسک اوار ئسر۔ وزیراعظم ڈل ءِ بخیرکرسا پارے کہ نم پاکستان نا سفیر و دنیا ٹی ننا پہچان اورے۔ اومشکل زرگزرانی حالیت آتیٹی حکومت تون تفنگ آ کاروباری برادری نا منت واری ءِ ہرفسا پارے کہ حکومت و نجی بشخ انا سوگو شریداری زرگزرانی شونداری نا ضمانت ءِ، پاکستان نا زرگزران نا بابت پالیسی سازی ٹی کاروباری برادری تون سلابت بے کچ اہمیت تخک۔ اوپارے کہ برآمد آتیا تالان شونداری نا کنڈآ ہِننگ ءِ، ہندا ننا زرگزرانی پالیسی نا محور ءِ، غیررسمی زرگزران ءِ خراج نیٹ اٹ اتنگ کن گام گیج کننگ انگ ءِ، بجٹ اٹ الس ءِ ریلیف تننگ کن گام گیج آتے اوار کننگ انگ ءِ، کاروبار دوست پالیسی تا سوب ملکی زرگزران سوگو مس و پیشن نا زرکار آتا پت بحال مس۔ اوپارے کہ حکومت ہمو صنعت آتا مون آ دننگ کن کوشست کننگ ءِ ہرافتیان ملکی پیدوار ودے، برآمدات آتیٹی ودکی مرے، ملازمت آتا زیات آن زیات وارخواہی ودی مرے، صنعت، کشت وکشار، انفارمیشن ٹیکنالوجی نا بشخ آتیٹی شونداری آن زرگزران ءِ پین سوگوی ملک و روزگار نا پوسکن وارخواہی ودی مریک، ورناتیکن تکنیکی و فنی تربیت نا پروگرام تا بناءِ کرینن تانکہ اوفتے روزگار ملنگ اٹی آسانی مرے و او قومی شونداری ٹی پبی کڑد ادا کننگ کیر۔ ڈل ءِ کاروبار، صنعت و واپار نا مون آ دننگ نا بابت حکومتی گام گیج آتیا حوال تننگا ہراٹی پاننگا کہ خراج مقدمہ غاتون زوت مون تننگ کن خراج ٹریبونلز اٹی اصلاحات کننگانے، دا ٹریبونلز آتیٹی بھاز شفاف وڑوڈول نا کمک اٹ بھرتی کننگانے، اسپیشل کمرشل کورٹس انا جوڑ کننگ نا بابت کمیٹی اس جوڑ کننگانے، کراچی نا بندرگاہ تیان ملک انا تہہ ٹی رسینگ گچین جوڑ کننگ کن موٹروے ایم۔ 10 نا اپ گریڈیشن و پیپری فریٹ کوریڈور آ کاریم برجاءِ، موٹروے ایم13(کھاریاں۔راولپنڈی)نا جوڑ کننگ آن لاہور و اسلام آباد نا نیام اٹ فاصلہ کم مریک، پاکستان ریلوائی نا ایم۔ ایل ون و ایم ایل ۔ٹو نا اپ گریڈیشن آن ریلوائی نا انفراسٹرکچر گچین مریک ہراڑآن واپاری گڑاتا فراوانی گچین مریک۔ حوال نا رداٹ نیشنل اے آئی ٹرانسفارمیشن پلان اس جوڑ کننگ انگ ءِ، شوگر و سرمٹ سیکٹر نا پیدوار نا بابت دا صنعت آتیٹی ویڈیو اینالیٹیکس نا خلنگ آن ریونیو نا مد اٹی گچینی بس۔ ڈل ڈیہہ اٹی امن نا بحالی کن پاکستان نا سفارتی کوشست آتیا وزیراعظم و اونا ٹیم ءِ پبی خراج تحسین پیش کرے۔ کاروباری راہشونک وزیراعظم نا کماشی ٹی زرگزرانی بحالی نا سفر و گچین مالیاتی بست وبند آتیا پت انا درشانی ءِ کریر۔ ڈل ملکی زرگزران نا درست سمت اٹی گامزن کننگ و کاروبار و زرکاری کن جوان ءُ چاگڑد اس فراوان کننگ آ وزیراعظم و اونا ٹیم انا منت واری ءِ ہرفے۔ ڈل انا باسک آک ڈیجیٹل ادائیگی و دستاویزی زرگزران نا مون آ دننگ نا حکومتی وژن نا ستاءِ کرسا خراج اصلاحات و کاروباری آسانی تا مون آ دننگ نا گام گیج آتا خیرمقدم ءِ کریر۔ کاروباری راہشونک صنعت آتیکن بجلی نانرخ آتیٹی کمتی اتنگ، ایکسپورٹ ڈویلپمنٹ لیوی نا چٹفنگ ، و خراج ریفنڈ نا وخت آ ادائیگی تیا وزیراعظم نا منت واری ءِ ہرفیر و بروک آ بجٹ نا تیاری ٹی کاروباری برادری ءِ پت اٹ ہلنگ نا گام انا ستاءِ کرے۔ اووزیراعظم ءِ قومی زرگزران نا سوگوی و بجٹ نا بابت تینا سلاہ پیش کریر۔ کاروباری برادری زرگزرانی بحالی و شونداری کن حکومت تون پورو کمکاری ءِ برجاتخنگ نا عزم انا درشانی ءِ کریر۔ ڈل انا بشخ ہلوک آک صنعتی شونداری، برآمدات آتیٹی ودکی و روزگار نا پوسکن وارخواہی ودی کننگ نا حکومتی عزم اناستاءِ کریر۔ دیوان اٹی بنجائی وزیر مصدق ملک، بنجائی وزیر اقتصادی امور احدخان چیمہ، بنجائی وزیر حوالکاری و شینکاری عطاء اللہ تارڑ، بنجائی وزیر انفارمیشن ٹیکنالوجی و ٹیلی کام شزافاطمہ ، وزیرپیٹرولیم علی پرویز ملک، بنجائی وزیر پاور ڈویژن سردار اویس احمد لغاری، وزیر مملکت خزانہ بلال اظہرکیانی، خصوصی کمکار صنعت وپیدوار ہارون اخترخان، اٹارنی جنرل منصورر اعوان ، گورنر اسٹیٹ بینک جمیل احمد و تعلقدار بڑزکو سرکاری آفیسر آک بشخ ہلکر۔