نواز شریف نا گلگت اٹی السی مچی آن تران، شونداری ڈٹ آتا بے پوروی نا زمواری مسکوہی حکومت آ بیٹ

گلگت۔ 02 جون (اے پی پی )مسکوہی وزیراعظم پاکستان و پاکستان مسلم لیگ (ن) نا صدر میاں نواز شریف گلگت اٹی السی مچی آن تران کرساپارے کہ اودے گلگت بلتستان تون مہرومریبت ءِ و او دا ڈیہہ ءِ شون ہلوک جوڑ کننگ خواہسکہ ولے اونا رداٹ اودے کاریم کننگ کن اِلنگتو، اوپارے کہ تھاکوٹ آن گلگت بلتستان اسکان سڑک پورو انت اکن متو و ڈیہہ ءِ داخہ انت اکن گوجالنگا، اوپارے کہ اونا دور اٹی گلگت سکردو شاہراہ غا 50 ارب روپئی نا خڑچ آن ڈٹ بناکننگا ، مچ آملک اٹی موٹروے  تا جال اس تالان کننگا و لوڈشیڈنگ نا چٹفنگ کن گام گیج کننگا، اوپارے کہ لواری ٹنل پورو کننگا و دیامربھاشا ڈیم اکن 100 ارب روپئی جتا کننگا ولے دا ڈٹ داسکان پورو متنے ہرانا زمواری ءِ او مسکوہی حکومت آتا بے پرواہی آ بیٹ کرے، اوپارے کہ ہائیڈل ڈٹ انا ہم بناءِ کننگا ولے پورو مننگ کتو۔ اوگلگت اٹی است انا مرض آتا ہسپتال نا بناءِ اہم ءُ گام اس گوندسا دا ڈٹ آ مریم نواز ءِ شاباشی تس۔ اوپارے کہ مانسہرہ غان گلگت اسکان موٹروے جوڑ کننگک، خنجر اب روڈ انا گچینی آن پاک چین واپار پین ودک، گلگت بلتستان اٹی بے روزگار ورناتے کن بے سود وام و اُراتا تفنگ کن آسان وام تننگک۔ لیپ ٹاپ اسکیم اٹی ودکی کننگک و ہرہُشار و حقدار طالب علم ءِ لیپ ٹاپ تننگک۔ زالبول آتیکن جتا یونیورسٹی جوڑ کننگ آ سجفنگک۔ اوپارے کہ گلگت استور شاہراہ نا اپ گریڈیشن نا جاچ ءِ ہلنگک۔ مچ آملک آنبار گلگت بلتستان اٹی ہم الیکٹرک بس چلیفنگک و کینسر نا ناجوڑ آتا درمان ہندی کہول آ پورو کننگ نا کوشست کننگک۔