بنجائی کابینہ دوائی تیا ٹریک اینڈ ٹریس سسٹم نا نفاذ نا باضابطہ منظوری ءِ تسنے، ہر دوا ءِ ڈیجیٹل وڑاٹ ٹریک و ویریفائی کننگ مریک، بنجائی وزیر جان جوڑی

اسلام آباد۔ 02 جون (اے پی پی ) بنجائی وزیر جان جوڑی مصطفیٰ کمال پارینے کہ بنجائی کابینہ مچ آملک اٹی دوائی تیا ٹریک اینڈ ٹریس سسٹم نا نفاذ نا باضابطہ منظوری ءِ تسنے۔ دا چرجوئی ٹی ڈرگ لیبلنگ اینڈ پیکنگ رولز 1978 اٹی المی ترمیم آتا ہم منظوری ءِ تننگانے۔ سے شنبے نادے آ جاری بیان نا رداٹ بنجائی وزیر جان جوڑی پارے کہ دا فیصلہ پاکستان اٹ جعلی دوائی تا چٹفنگ نا کنڈآ اسہ بھلو و تاریخی گام اسے۔ اولیکو وار ملک اٹی ہر دواءِ ڈیجیٹل وڑاٹ ٹریک و ویریفائی کننگ مریک، ہراڑآن جعلی،بے آب اٹ و نقلی دوائی تا گچین پیدواری و اوفتا چٹفنگ اٹ کمک رسینگک۔ اوپارے کہ پوسکن آ نظام نا نفاذ آن پد لس صارف باآسانی دوانا کاریم اٹ اتنگ نا میعاد ، نہاد و ایلو اہم معلومداری تے پک کننگ کیک، ہراڑآن الس نا دوائی تا نظام آ پت پین سوگو مریک۔ مصطفیٰ کمال پارے کہ ڈرگ ریگولیٹری اتھارٹی آف پاکستان دا پوسکن آنظام ءِ مچ آملک اٹی نافذ کیک۔ پوسکن آ قاعدہ غاتا رداٹ غٹ دواجوڑ کروک کمپنی و درآمد کنندگان کن المی مریک کہ او ہر دوانا پیک آ آب اٹ ٹوڈی بارکوڈ و سیریلائزیشن ڈیٹا نوشتہ کیر۔ بنجائی وزیرجان جوڑی پارے کہ داہم گام پاکستان اٹ دوائی تا سپلائی چین ءِ رکھ ، شفاف و آب اٹ جوڑ کننگ کن کننگانے۔ حکومت دوائی تا بشخ ءِ پوسکن آ وڑتتون ہم گرنچ کننگ کن عملی گام گیج کننگ ءِ و ٹریک اینڈ ٹریس سسٹم نا نفاذ آن جعلی دوائی تا برخلاف اسہ سوگو و گچین دیوال اس جوڑمریک۔ اومستی پارے کہ پاکستان پوسکن آ ٹیکنالوجی نا کاریم اٹ اتنگ اٹی ڈیہہ انا نمان ملک آتیٹی اوار مریک۔ دانظام نا کمک اٹ چاروکی نا روایتی وڑوڈول آتا جاگہ غا پوسکن آ ڈیجیٹل نظام ہلیک ہراڑآن الس نا جان جوڑی، زند و پت انا پورو رکھ ءِ پک کننگ مریک۔ بنجائی وزیر جان جوڑی نا رداٹ ڈریپ نا کنڈآن صنعت ءِ آسراتی فراوان کننگ کن زوت تکنیکی راہشون اصول جاری کننگک، وخت اس کہ تعلقدار فریق آتون سلابتی دیوان اس ہم اڈتننگانے تانکہ نظام نا گچین و ریسہ وار نفاذ ءِ پک کننگ مرے۔