مانسہرہ، کاغان، ناران، جھالکنڈ و چلاس اٹی پوسکنءُ موٹروے جوڑ مریک، بنجائی وزیر مواصلات

اسلام آباد۔ 02 جون (اے پی پی ) بنجائی وزیر مواصلات عبدالعلیم خان پارینے کہ مانسہرہ ، کاغان ، ناران، جھالکنڈ و چلاس اٹی پوسکن ءُ موٹروے جوڑ مریک، پوسکن آموٹروے تے براہ راست چین اتون گنڈنگک و دا ڈٹ اِرا ریسہ غاتیٹی پورو مریک۔ سے شنبے نادے آ وزارت مواصلات آن جاری بیان نا رداٹ بنجائی وزیر مواصلات عبدالعلیم خان نا کماشی ٹی این ایچ اے نا اہم دیوان اس اڈ ہلک۔ دیوان اٹی بنجائی سیکرٹری مواصلات و چیئرمین این ایچ اے بنجائی وزیر مواصلات ءِ اہم امور تیا حوال تس۔ دیوان اٹی حوال اٹی پاننگاکہ ایم این جے سی موٹروے نا کل مرغنی 172 کلومیٹر مریک، ڈٹ اٹی 13.5 کلومیٹر مرغن بابو سر ٹنل جوڑ مریک ہرا پاکستان نا مرغن انگا ٹنل مریک۔ دیوان اٹی گپ وتران کرسا بنجائی وزیرپارے کہ ڈٹ انا اولیکو ریسہ ٹی موٹروے مانسہرہ غان کاغان ، ناران و بابو سرٹاپ اسکان جوڑ کننگک، ارٹ میکو ریسہ ٹی دا موٹروے ڈٹ ءِ بابو سرٹاپ آن چلاس اسکان پورو کننگک۔ اوپارے کہ داموٹروے شاہراہ قراقرم نا گیگ بدل نا وڑاٹ گچین و رکھوک کسر فراوان کیک۔ ایم این جے سی موٹروے آن شاہراہ قراقرم نا سفر 120 کلومیٹر اسکان کم مریک ، موٹروے نا دا نیٹ ورک دیکی چین ءِ کراچی و گوادر نا بندرگاہ آتون گنڈک۔ عبدالعلیم خان پارے کہ دا پوسکن آ موٹروے دیکی چین آن بحیرہ عرب اسکان تیز، گوند و جوان انگا روٹ مریک، گوادر بندرگاہ نا پائیدار شونداری کن داموٹروے ڈٹ حقی گیم چینجر جوڑمریک۔ بنجائی وزیرپارے کہ آخبت اٹ 4 لین آ تالان دا موٹروے ءِ 6 لین اسکان ودفنگ نا گنجائشت تخنگک، ایم این جے سی موٹروے آ ہر 25 آن 30 کلومیٹر پد ریسٹ ایریہ جوڑ مریک، داموٹروے نا ہڑتوم آ کنڈ گڈز ٹرانسپورٹ کن ٹرکنگ ٹرمینل جوڑمریک۔