زرگزران نا پائیدار شونداری کن صنعت و حرفت نا مون آ دننگ و پیشن نا زرکاری ٹی ودکی المی ءِ، وزیراعظم

اسلام آباد۔ 02 جون (اے پی پی ) وزیراعظم محمد شہباز شریف پارینے کہ زرگزران نا پائیدار شونداری کن صنعت و حرفت نا مون آ دننگ و پیشن نا زرکاری ٹی ودکی المی ءِ، صنعتی مصنوعات نا ملکی پیدوار اٹی ودکی اتون اوار اوار برآمد آتے ودفنگ کن گچین پالیسی گام گیج حکومت نا پالیسی اولیت آتا بشخ ءِ۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی زرکاری ٹی ودکی و زرگزران نا جم شونداری کن شعبہ جاتی اصلاحات و پالیسی گام گیج آتا جاچ دیوان اس مس۔ دیوان اٹی تعلقدار وزارت آتا کنڈآن چندی زیرغور پالیسی سلاہ تیا حوال تننگا۔ وزیراعظم پارے کہ ملکی زرگزران نا پائیدار شونداری کن صنعت و حرفت نا مون آ دننگ و پیشن نا زرکاری ٹی ودکی المی ءِ، صنعتی مصنوعات آتا، ملکی پیدوار اٹی ودکی اتون اوار اوار، برآمد آتے ودفنگ کن گچین پالیسی گام گیج حکومت پالیسی اولیت آتا بشخ ءِ۔ وزیراعظم پارے کہ صنعت و واپار و زرگزران نا چندی بشخ آتیٹی اصلاحات مریس مدی زرگزرانی افادیت و السی آسودہی آ بایدے مرکوز مرے، آخبت نا توانائی نا گرج آتے گیگ بدل توانائی نا ذریعہ اٹ پورو کننگ کن جوان حکمت عملی آ پبی وڑاٹ کاریم مننگ ءِ۔ وزیراعظم پارے کہ توانائی نا بچت و اڑزان ٹرانسپورٹ نا ملکی گرج آتے پورو کننگ کن جوان و گچین الیکٹرک وہیکلز پالیسی وخت انا اہم گرج ءِ، پوسکن آ ٹیکنالوجی نا چندی بشخ آتیٹی شمولیت کن غٹ وزارت و چاہندار آتا بامعنی سلابتءِ پک کیر، گچین شونداری پالیسی تا ٹہیفنگ و نفاذ کن غٹ وزارت آک تین پہ تینی کمکاری و ہم گرنچی اٹ کاریم کیر۔ وزیراعظم پارے کہ غٹ اصلاحات و گام گیج آتیٹی انتظامی شفافیت و گچین کارکڑد حکومت نا اولیت ءِ ۔ دیوان اٹی نائب وزیراعظم و وزیرخارجہ محمد اسحاق ڈار، بنجائی وزیر خزانہ محمد اورنگزیب، بنجائی وزیر اقتصادی امور احدخان چیمہ، بنجائی وزیر حوالکاری و شینکاری عطاء اللہ تارڑ، بنجائی وزیر موسمیاتی بدلی مصدق ملک، بنجائی وزیر پاور ڈویژن سردار اویس لغاری، بنجائی وزیر پیٹرولیم علی پرویز ملک ، وزیراعظم نا خصوصی کمکار صنعت وپیداوار ہارون اختر و ڈائریکٹر جنرل ایس آئی ایف سی میجر جنرل اسدالرحمان چیمہ و تعلقدار ادارہ غاتا عہدیدار آک بشخ ہلکر۔