ورناتا لائخی تیان پبی فائدہ ہرفنگ کن پدریسہ زرکاری و گچین گام گیج المی ءِ، چیئرمین وزیراعظم یوتھ پروگرام

اسلام آباد۔ 02 جون (اے پی پی ) چیئرمین وزیراعظم یوتھ پروگرام رانامشہود احمد خان پارینے کہ ورناتا لائخی تیان پبی فائدہ ہرفنگ کن پدریسہ زرکاری و گچین گام گیج المی ءِ۔ سے شنبے نادے آ وزیراعظم یوتھ پروگرام آن جاری بیان نا رداٹ رانا مشہود احمد خان تون جنریشن ان لمیٹڈ نا چیف ایگزیکٹیو آفیسر (سی ای او ) کیون فری و پاکستان اٹ یونیسیف نا کنٹری نمائندہ پرنیل آئرن سائیڈ اوڑدہی کرے۔ داوخت آ وزیراعظم یوتھ پروگرام و یونیسیف نا سینئر نمائندہ ہم ساڑی ئس۔ اوڑدہی ٹی پاکستان اٹ ورناتا شونداری و آسودہی کن تین پہ تینی کمکاری ءِ پین سوگو کننگ آ گپ وتران کننگا۔ اوڑدہی ٹی ورناتیکن ڈیجیٹل شمولیت، کسبکاری و روزگار نا وارخواہی تے ودفنگ نا بابت چندی امور تیا گپ وتران مس۔ اوڑدہی نا اسہ اہم پلو ڈیجیٹل یوتھ ہب(ڈی وائے ایچ) نا نمان سرسہبی ئس۔ ہرانا رجسٹرڈ صارف آتا کچ داسہ 800,000آن گدرینگانے۔ داورناتا پبی است خواہی و ڈیجیٹل پلیٹ فارم آتا کمک اٹ ہیل کننگ و وارخواہی دوئی کننگ نا ودوک آ رجحان نا عکاسی ءِ کیک۔ داوخت آ چیئرمین وزیراعظم یوتھ پروگرام پارے کہ پاکستان نا بھلا ورناآبادی اسہ اہم قومی میرات ءِ ، ہرانا لائخی تیان پبی فائدہ ہرفنگ کن پدریسہ زرکاری و گچین گام گیج المی ءِ۔ اوڈل ءِ وزیراعظم یوتھ پروگرام نا رداٹ برجا اہم پالیسی گام گیج، بشمول نیشنل یوتھ ایمپلائمنٹ پالیسی و نیشنل ایڈولیسنٹ اینڈ یوتھ پالیسی، نا بارواٹی ہم معلومدار کرے ہرانا مسخت ورناتیکن سازگار چاگڑد و گچین وارخواہی فراوان کننگ ءِ۔ داوخت آ کیون فری ڈیجیٹل یوتھ ہب انا پیش رفت انا ستاءِ کرسا پارے کہ داپلیٹ فارم نا ترندی اٹ ودوک آ رسینگ پاکستان نا ورناتا لائخی، است خواہی و فعال شریداری نا درشانی ءِ۔ اوداہیت آ زور شاغا کہ ورناتے انٹرپرینیور شپ ، ڈیجیٹل و آخبت نا خواست آتون ہم گرنچ مہارت آتیان شپ کننگ وخت انا اہم گرج ءِ تانکہ اوفتے کن روزگار و شونداری نا پین وارخواہی ودی کننگ مرے۔