وزیر ریلوائی نا اطالوی قومی دے آ اٹلی نا حکومت و الس ءِ مبارکباد

اسلام آباد۔ 02 جون (اے پی پی ) وزیرریلوائی محمد حنیف عباسی اطالوی قومی دے انا وخت آ اٹلی نا حکومت و الس ءِ مبارکبادی پیش کرسا پارینے کہ پاکستان و اٹلی نانیام اٹ متکن آ دوستانہ تعلقداری تین پہ تینی شرف، پت و کمکاری آ تالان ءِ۔ سے شنبے نادے آ تینا بیان اٹی اوپارے کہ اٹلی پاکستان نا اسہ اہم یورپی شریدار ءِ و ہڑتوم آملک آتا تعلقداری وخت اتون پین سوگو مسنے۔ وزیرریلوائی پارے کہ پاکستان اٹلی تون واپار، زرکاری، تعلیم و دودوربیدہ ئی رابطہ غاتا مون آ دننگ ءِ خصوصی اہمیت ایتک۔ اواٹلی ٹی رہینگوک  پاکستانی برادری ناکڑد انا ستاءِ کرسا پارے کہ دا برادری ہڑتوم آملک آتا نیام اٹ تعلقداری تے سوگو کننگ اٹ اہم کڑد ادا کننگ ءِ۔ وزیرریلوائی پارے کہ پاکستان اٹلی تون اقتصادی، واپاری و السی کہول انا رابطہ غاتے پین ودفنگ نا خواہندار ءِ وخت اس کہ ہڑتوم آملک آتا نیام اٹ چندی بشخ آتیٹی کمکاری نا گیشتر گمان ساڑی ءِ ہرا اسیجائی شونداری و شونہالی نا ذریعہ جوڑ مننگ کیک۔ اوپارے کہ پاکستان و اٹلی نا سوگو تعلقداری تین پہ تینی فائدہ غاتا رکھ و جہانی کمکاری نا مون آ دننگ اٹ اہم کڑد ادا کننگ ءِ و دا متکن آ سنگتی آخبت اٹ پین سوگو و بھرمی شریداری ٹی بدل مریک۔ اواطالوی قومی دے آ پاکستان و اٹلی نا الس کن امن، شونداری و شونہالی نا نیک است خواہی نا درشانی ءِ کرے۔