گورنر خیبرپختونخوا تون کیئرک انسٹی ٹیوٹ نا ہیڈ آف ریسرچ نا اوڑدہی

اسلام آباد۔ 02 جون (اے پی پی ) گورنر خیبرپختونخوا فیصل کریم کنڈی تون اسلام آباد اٹی ایشیائی شونداری بینک (اے ڈی بی) نا رداٹ کاریم کروک آ کیئرک انسٹی ٹیوٹ نا ہیڈ آف ریسرچ ڈاکٹر غلام صمد اوڑدہی کرے۔ گورنر ہاؤس اسلام آباد اٹی مروک آ اوڑدہی ٹی ڈاکٹر غلام صمد گورنر ءِ علاقائی رابطہ، واپار و زرکاری نا وارخواہی خاص کر خیبرپختونخوا نا رداٹ سرجمی اٹ حوال تس۔ گورنر خیبرپختونخوا فیصل کریم کنڈی علاقائی رابطہ غاتا اسٹریٹجک اہمیت آ زور شاغسا پارینے کہ علاقائی رابطہ غاتا مون آ دننگ نئے بیرہ خیبرپختونخوا بلکن مچ آپاکستان نا زرگزرانی شونداری ءِ ترند کننگ اٹ اہم کڑد ادا کننگ کیک۔ اوواپاری رابطہ غاتا سوگوی، کشاری ویلیو چینز نا گچینی، بنداوی پنجر نا شونداری و زرکاری نا وارخواہی تے ودفنگ نا گرج آ زور شاغا۔ گورنر فیصل کریم کنڈی پارے کہ سرکاری ادارہ، نجی بشخ و شونداری شریدار آتا نیام اٹ سوگو حکمت عملی نا کمک اٹ صوبہ نا پورو زرگزرانی کچ ءِ کاریم اٹ اتنگ مریک، خیبرپختونخوا واپار، زرکاری و صنعتی شونداری نا مرکز نا وڑاٹ مون آ برسا پاکستان نا مریس مدی اقتصادی شونہالی و علاقائی کمکاری نا ہدف آتا دوئی کننگ اٹ اہم کڑد ادا کننگ کیک۔ اوڑدہی ٹی داہیت آ امنا کننگاکہ علاقائی رابطہ غاتا مون آ دننگ بیرہ بنداوی پنجر نا جوڑ کننگ اسکان محدود اف بلکن دا اسہ جوان ءُ زرگزرانی شونداری اسے نا حکمت عملی ءِ۔ فریق آک داہیت انا درشانی ءِ کریر کہ تینا جغرافیائی اہمیت آن فائدہ ہرفسا خیبرپختونخوا پاکستان ءِ علاقائی منڈی تتون گنڈنگ، زرگزرانی انضمام ءِ مون آ دننگ، زرکاری نا پوسکن وارخواہی ودی کننگ و جوان زرگزرانی شونداری نا دوئی کننگ اٹ اہم کڑد ادا کننگ کیک۔