صدر مملکت نا اٹلی نا سرکڑدہ غاتے جمہوریہ دے آ مبارکباد

اسلام آباد۔ 02 جون (اے پی پی ) صدر مملکت آصف علی زرداری اٹلی نا صدر سرجیومیتار یلا و اٹلی نا الس ءِ جمہوریہ دے آ مبارکبادی ترسا دایقین نا درشانی ءِ کرینے کہ بروک آ سال آتیٹی پاکستان و اٹلی نا نیام اٹ ہڑتوم آ کنڈآتا تعلقداری پین شون ہلیک۔ سے شنبے نادے آ ایوانِ صدر نا پریس ونگ انا رداٹ صدر مملکت تینا تہنیتی کلہو اٹی پارے کہ پاکستان اٹلی تون تینا متکن آ دوستانہ تعلقداری تے بھاز قدر انا نظر اٹ ہرک ہراکہ تین پہ تینی پت، کمکاری و امن و شونہالی کن اسیجائی عزم آ تالان ءِ۔ اودایقین نا درشانی ءِ کرے کہ بروک آ سال آتیٹی دا ہڑتوم آ کنڈآتا تعلقداری پین شون ہلیک۔ صدر آصف علی زرداری پارے کہ پاکستان یورپی یونین تون تینا رابطہ غاتے بھا ز اہمیت ایتک و جہانی کمکاری، مذاکرات و امن و سوگوی نا مون آدننگ کن یورپی یونین اٹی اٹلی نا تعمیری کڑد انا بھاز ستاءِ کیک۔ اوتین پہ تینی است خواہی نا بشخ آتیٹی پاکستان و یورپی یونین نا تعلقداری تے پین سوگو کننگ کن پاکستان نا عزم انا درشانی ءِ کرے۔