وفاقی وزیر احسن اقبال ءَ سالانہ منصوبہ ءِ یکوئی کمیٹی ءِ دیوان ءَ گوں تران کنان ءَ بجٹ ءِ مزنیں بہرے ءِ قرضہ ءِ پچ گرگ ءِ سبب ءَ دیمروئی منصوبگ آناں متاثر بوھگ ءَ انت

اسلام آباد۔1جون  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ بجٹ ءِ مزنیں بھرے وام ءِ پچ گرگ ءِ سر ءَ ھرچ کنگ بوھگ ءِ سبب ءَ دیمروئی منصوبگ آناں تاوان رسگ ءَ اِنت، البت حکومت کمیں وسیلگ آنی ابیدS راجی ارزشت ءِ منصوبگ آناں سرجم کنگ ءِ سر ءَ جزم اِنت۔ سالانہ منصوبہ کوآرڈینیشن کمیٹی ءِ دیوان ءَ گوں تران کنان ءَ آئی ءَ گوشت کہ گوستگیں 8سال آنی تہ ءَ وفاقی دیمروئی بجٹ ءِ تہ ءَ 1000ارب کلدار ءِ تک ءَ جمود بوتگ وھدیکہ ھمے وھد ءِ تہ ءَ صوبگ آنی دیمروئی بجٹ 1000ارب کلدار ءَ چہ 2869ارب کلدار ءَ گیشی بوتگ ایشی ءِ سبب ءَ 2869ارب کلدار ءِ ھرچ ءُ درچ ءِ تہ ءَ مزنیں کساسے ءَ فرق بوتگ۔ فدراسیون ءُ استاناں چہ دیم ءَ اتکگ۔ احسن اقبال ءَ گوشت کہ دیمروئی منصوبگ آنی کلیں ھرچ ءُ درچ ءُ تھرو فارورڈ 10ہزار 818ارب کلدار ءَ سر بوتگ۔ آیوکیں مالی سال 2026-27 ءِ واستہ 1126ارب کلدار ءِ دیمروئی پروگرام پیش کنگ بوتگ۔ وزارت آنی نیمگ ءَ جاری ءُ نوکیں منصوبگ آنی واستہ 4097ارب کلدار ءِ کلیں لوٹ پیش کنگ بوتگ بلے کمیں وسیلگ آنی سبب ءَ نزیک ءَ 3000ارب کلدار ءِ گیشیں لوٹ ءِ پیلو کنگ ممکن نہ اِنت۔ آئی ءَ گوشت کہ حکومت استیں وسیلگ آناں جوانیں رنگ ءَ کارمرد کنگ ءِ کوشست ءَ کنگ ءَ انت ءُ مزنیں ترجیحی منصوبگ آنی سر ءَ دلگوشی دیگ ءَ انت۔ بلوچستان ءِ دیمروئی منصوبگ آناں ھاسیں ارزشت دیگ بوھگ ءَ اِنت ایشی ءِ تہ ءَ این 25 (پاکستان ایکسپریس وے) ءِ واستہ 125ارب کلدار ایر کنگ ءِ سفارش کنگ بوتگ۔ وفاقی وزیر ءَ گوشت کہ حکومت وتی اتحادی گل آنی دیمروئی منصوبگ آنی واستہ 87ارب کلدار ءِ ھرچ ءُ درچ ءَ کنت وھدیکہ آزات جموں ءُ کشمیر، گلگت بلتستان ءُ یکجاھیں ضلع آنی واستہ 153ارب کلدار ءِ واستہ ایر کنگ ءِ تجویز پیش کنگ بوتگ۔ آئی ءَ گوشت کہ فیڈریشن این ایف سی ءِ تہ ءَ وتی 40درسد بھر ءَ چہ آزات جموں کشمیر ءُ گلگت بلتستان ءَ را مالی کمک کنت۔ احسن اقبال ءَ گوشت کہ پاکستان ءَ را اقتصادی برجائی ءِ نیمگ ءَ رھادگ کنگ ءِ واستہ مھکم، متوازن ءُ برجمیں دیمروئی ءِ راہ ءَ را زیرگ لوٹ ایت۔ آئی ءِ رد ءَ برآمدات ءَ را گیش کنگ ءَ ابید مزنیں ءُ برجمیں اقتصادی دیمروئی ممکن نہ اِنت۔ مزن وزیر شہباز شریف انچیں دیمروئی لوٹیت کہ پائیدار بہ بیت آئی ءِ پائدگ الس ءَ سر بہ بنت۔ آئی ءَ گوشت کہ کشت ءُ کشار ءِ شوبگ ءَ اصلاحات ءُ پیداوار ءِ تہ ءَ گیشی ءِ سر ءَ ھاسیں دلگوشی دیگ بوھگ ءَ انت وھدیکہ نوکیں ٹیکنالوجی، صنعت ءُ برآمدات ءِ دیمروئی ءَ را راجی دیمروئی ءِ حکمت عملی ءِ یک ھاسیں بھرے جوڑ کنگ بوتگ۔ وفاقی وزیر ءَ گوشت کہ اپریل 2026 ءَ پاکستان ءِ درملکی زرّ ءِ ذخیرہ 21.3ارب ڈالر ءَ سر بوتگ، وھدیکہ سود ءِ شرح 23درسد ءَ چہ 10درسد ءَ کم بوتگ کہ اے مزنیں اقتصادی سوبمندی اِنت۔ آئی ءَ گوشت کہ 2019 ءَ چہ 2022 ءِ نیام ءَ زرتگیں وام آنی پچ گرگ اے وھد ءَ راجی معیشت ءِ سر ءَ مزنیں بار جوڑ بوھگ ءَ انت۔ آئی ءَ جزم ءِ درشان کت کہ دیمروئی بجٹ ءِ تہ ءَ گیشی حکومتی اولی ترجی انت ءُ ملک ءَ را وت واجہ جوڑ کنگ ءِ واستہ ھمک شوبگ ءَ اصلاحات ءِ عمل برجاہ دارگ بیت۔ آئی ءَ گوشت کہ ورنا آناں وانگ ءُ زانگ ءُ ہنر ءِ موہ پجاری، مزنیں انفراسٹرکچر منصوبگ آناں وھد ءِ سر ءَ سرجم کنگ، سی پیک منصوبگ آناں دیم ءَ برگ ءُ الس آناں بنیاتی آسراتی پجاری حکومت ءِ ھاسیں مول ءُ مراد اَنت۔ احسن اقبال ءَ گوشت کہ راجی تک ءَ پاکستان ءَ را دیمروئی کتگیں ملک آنی لڑ آنی تہ ءَ ھوار کنگ ءِ واستہ یک ھمگرنچیں حکمت عملی ءِ سازگ بوھگ ءَ انت ءُ اے سفر ءَ توامیں ادارگ آناں یکجائی ءَ وتی کرد پیلو کنگی انت۔