پاکستان ءُ یورپی یونین ءَ دو نیمگی سیادی ءَ را یک جامع ءُ دوئیں نیمگ ءَ چہ فائدگ مندیں شریکداری ءِ تہ ءَ بدل کنگ ءِ وتی عزم ءِ پدا پدر کنگ ءَ انت، نائب مزن وزیر محمد اسحاق ڈار ءَ یورپی کمیشن ءِ نائب صدر کاجا کالس  ءِ گوما یکجائی پریس کانفرنس

اسلام آباد۔1جون  (اے پی پی): پاکستان ءُ یورپی یونین ءَ دو نیمگی سیادی آناں یک جامع ءُ وت مہ وتی پائدگ مندیں شریکداری ءِ تہ ءَ بدل کنگ ءِ وتی عزم ءِ یک رندے پدر کتگ ءُ دو شمبے ءَ ادا برجم داشتگیں ھشتمی پاکستان ءُ یورپی یونین ءِ اسٹریٹجک گپ ءُ تران ءِ ساھت ءَ کمک ءِ مزنیں گنجائش آناں پدر کتگ۔ نائب مزن وزیر ءُ دری کارانی وزیر سینیٹر محمد اسحاق ڈار ڈار ءَ یورپی یونین ءِ درئی کار ءُ سلامتی پالیسی ءِ مزنیں نمائندہ / یورپی کمیشن ءِ نائب صدر کاجا کلاس ءِ گوما یکجائی پریس کانفرنس ءَ گوں تران کنان ءَ اے گپ ءُ تران ءِ عمل ءَ را پاکستان ءُ یورپی یونین ءِ نیام ءَ مستریں ادارگی فورم لیک اتگ۔

آئی ءَ گوشت کہ گوستگیں ھپتمی جائزہ ءِ دیوان نومبر ءَ برسلز ءَ برجم دارگ بوتگ ات، اے دوئیں نیمگ آنی نیام ءَ اے رنگیں سیادی آنی راجدپتر ءِ تہ ءَ کم ترین فرق ات۔ دوئیں نیمگاں پاکستان ءُ یورپی یونین ءِ اسٹریٹجک انگیجمنٹ ءِ سر ءَ چار ءُ تپاسی کت گند ءُ نند ءَ 2019ءِ منصوبگ ءِ چیر دستی ءَ کمک ءِ ھوالگ ءَ پیشرفت ءِ سر ءَ چار ءُ تپاسی کنگ بوت ایشی ءِ تہ ءَ تجارت، سرمایہ کاری ءُ دیمروئی، انسانی ھک ءُ کانود ءِ حاکمیت، ہجرت ءُ نقل و حرکت ءِ ھواری ءَ ایمنی ءُ انسداد ناشرکاری ءِ وڑیں پڑ ھوار اَنت۔ محمد اسحاق ڈار ڈار ءَ گوشت کہ یورپی یونین پاکستان ءِ مزنیں تجارتی شریک آنی تہ ءَ ھوار اِنت ءُ جی ایس پی پلس فریم ورک ءِ چیر دستی ءَ پاکستان ءُ یورپی یونین ءِ نیام ءَ تجارتی کمک ءَ را دوئیں نیمگ آنی واستہ پائدگ مند لیک اِتگ۔ آئی ءَ گوشت کہ گپ ءُ تران ءَ وت مہ وتی بیپاری ءُ سرمایہ کاری سیادی ءَ را گیش مھکم کنگ ءِ سر ءَ ھم دلگوشی دیگ بوتگ۔

نائب مزن وزیر محمد اسحاق ڈار ڈار ءُ یورپی یونین ءِ مزنیں نمائندہ ءَ دمگی ءُ جھان ءِ جیڈھ آنی سر ءَ ھم سرجمیں ءَ گپ ءُ تران کت، ایشی ءِ تہ ءَ امریکہ ءُ ایران ءِ جیڈھ، جنوبی ایشیا، اوگانستان، یورپ ءُ میاں اوستمانی تک ءِ سیکورٹی ءِ جاور ھال ھوار اَنت۔ محمد اسحاق ڈار دار ءَ یورپی یونین ءِ منت گپت کہ آئی ءَ امریکہ ءُ ایران ءِ نیام ءَ جیڈھ آناں کم کنگ ءِ واستہ پاکستان ءِ میانجی داری ءِ کوشست آناں ستا کرتگ ءُ کمکی کرد پیلو کتگ۔ آئی ءَ بھارت ءِ بے سوبیں زوراکی ءِ سر ءَ جیڈھ ءِ درشانی کت ءُ جموں ءُ کشمیر ءِ جیڈھ ءِ سر ءَ پاکستان ءِ اصولی موقف ءِ پدا زور دات ءُ گوشت کہ اے جیڈھ ءِ گیواری کشمیری الس ءِ واھشت ءُ اقوام متحدہ ءِ سلامتی کونسل ءِ قرارداد آنی رد ءَ بہ بیت۔ آئی ءَ اے ھم گوشت کہ سندھ ءِ آپانی معاہدے ءِ سر ءَ پاکستان ءِ موقف ثالثی آمید گس ءِ گیشیں پیسلہ ءَ پد راست ثابت بوتگ کہ آئی ءَ اے گپ پدر کتگ کہ اے معاہدہ ءَ مغربی دریا آنی سر ءَ آپ ءِ کنٹرول کنگ ءِ بھارت ءِ توانائی ءِ سر ءَ بنیاتی سیمسر ایر کنگ بوتگ اَنت۔ سیکورٹی ءِ جیڈھ آنی سر ءَ محمد اسحاق ڈار دار ءَ اوگان سرزمین ءِ سر ءَ خوارج ءُ ہندوتوا ءِ عناصر آنی ھست بوھگ ءِ ھال داتگ۔ طالبان ءِ ھست بوھگ ءُ پاکستان ءِ ھلاپ ءَ آھانی برجاھیں اُرشانی سر ءَ دلپدردی ءِ درشان کنان ءَ آئی ءَ کثیر نیمگی نظام ءَ را مھکم کنگ ءُ اقوام متحدہ ءِ منشور ءِ سر ءَ عمل کنگ ءِ ضلورت ءِ سر ءَ زور پر دات۔

وتی گشتانک ءِ تہ ءَ یورپی یونین ءِ مزنیں نمائندہ کاجہ کالس ءَ پاکستان ءَ را یک ھاسیں دمگی طاقت ءُ یورپی یونین ءِ ھاسیں شریک لیک اتگ۔ آئی ءَ گوشت کہ یورپی یونین پاکستان ءِ مستریں برآمداتی مارکیٹ اِنت ءُ پاکستان یورپی یونین ءِ جی ایس پی پلس پروگرام ءِ مستریں سیت مند اِنت۔ کاجا کالس ءَ امریکہ ءُ ایران ءِ نیام ءَ پاکستان ءِ میانجی داری ءِ کوشست آناں ستا کرتگ ءُ گوشت کہ اے گامگیجاں سرجمیں جنگ ءِ ھترہ ءَ چہ رکّینگ ءَ کمک کتگ۔ آئی ءَ گوشت کہ یورپی یونین یک پائیدار ءُ پرامن گیواری ءِ واستہ وتی کرد ءَ پیلو کنگ ءَ تیار انت۔ افغانستان ءِ جاور ھال ءِ ھوالگ ءَ آئی ءَ گوشت کہ پاکستان ءَ را میاں اوستمانی کانود ءِ رد ءَ وتی الس ءُ سرڈگار ءِ رکھینگ ءِ ھک است انت۔ دوئیں رہشوناں پاکستان ءُ یورپی یونین ءِ سیادی ءَ را تجارت، موسمیاتی بدلی ءِ دیم ءَ دارگ، ڈیجیٹل انفراسٹرکچر، ساپیں توانائی، ہجرت، نقل و حرکت ءُ مردم آنی نیام ءَ رابطہ ءِ وڑیں پڑ آنی تہ ءَ گیش مھکم کنگ ءِ واستہ وتی جزم ءِ درشان کت، ھاسیں رنگ ءَ ایراسمس منڈس اسکالرشپ پروگرام ءِ وسیلگ ءَپاکستان ءُ یورپی یونین ءِ  یکوئی آناں گیش مھکم کنگ ءِ جزم ءِ درشان کت۔