دیمروئی بجٹ ءِ سر ءَ سکیں زور ءِ سبب ءَ غیر ضروری منصوبگ آنی دائرہ کار ھلاس بوھگ ءَ اِنت، پی ایس ڈی پی ءِ کساس 1126 ارب کلدار ءَ دارگ بوھگ ءَ اِنت، احسن اقبال

اسلام آباد۔1جون  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر احسن اقبال ءَ گوشت کہ ملک ءِ مالیات ءِ مزنیں بھرے وام ءِ پچ گرگ ءِ سر ءَ ھرچ کنگ بوھگ ءَ اِنت، ایشی ءِ سبب ءَ دیمروئی بجٹ ءِ سر ءَ سکیں زور ءِ تہ ءَ اِنت، وھدیکہ فیڈریشن ءِ واستہ دیمروئی منصوبگ ءِ دیمروئی ءِ واستہ گیش ءُ گیوار بوھگ ءَ اِنت۔ سالانہ منصوبہ کوآرڈینیشن کمیٹی ءِ دیوان ءِ سروکی ءَ کنان ءَ ءُ ایشی ءَ پد میڈیا ءَ گوں گپ ءُ تران کنان ءَ آئی ءَ گوشت کہ گوستگیں ہشت سال ءَ چہ وفاقی دیمروئی بجٹ ءِ تہ ءَ رکاوٹ بوتگ ءُ مرچی ھم اے 2018 ءِ وڑ ءَ تقریباً ھمے تک ءَ اِنت۔ آیوکیں مالی سال ءِ واستہ جاری منصوبگ آنی واستہ 4ہزار ارب کلدار ءِ زرّ دیگ بیت بلے مالی وسیلگ آنی کمیں دستیابی ءِ سبب ءَ 3ہزار ارب کلدار ءِ لوٹ پیلو کنگ نہ بیت۔ احسن اقبال ءَ گوشت کہ وفاق ءُ صوبگ آنی دیمروئی بجٹ آنی نیام ءَ مزنیں تپاوتے ودی بوتگ۔ گوستگیں ہشت سال آنی تہ ءَ صوبگ آنی دیمروئی بجٹ یک ہزار ارب کلدار ءَ چہ 3ہزار کلدار ءَ سر بوتگ وھدیکہ وفاقی دیمروئی بجٹ ءِ کساس یک ہزار ارب کلدار ءِ کچ ءَ است انت۔ آئی ءَ جار جتگ کہ آیوکیں مالی سال ءِ واستہ دیمروئی پروگرام ءِ حجم 1126ارب کلدار ءِ تہ ءَ دارگ بوھگ ءَ اِنت۔ آزات کشمیر ءُ گلگت بلتستان ءِ واستہ 153ارب کلدار ایر کنگ بیت۔ آئی ءَ گوشت کہ آزات کشمیر ءُ گلگت بلتستان ءَ را نیشنل فنانس کمیشن ءِ تہ ءَ شیئر رسگ لوٹ ایت ءُ فیڈریشن وتی این ایف سی ءِ شیئر ءَ چہ اے دمگ آناں مالی کمک دیم ءَ روان کنت۔ وفاقی وزیر ئَ گوشت کہ حکومت بلوچستان ئِ دیمروئی ئَ ھاسیں ارزشت دیگ ئَ اِنت ءُ آیوکیں بجٹ ئِ تہ ئَ بلوچستان ئِ واستہ 100 ارب کلدار ئِ منصوبگ ھوار کنگ ئِ شور دیگ بوتگ۔ آئی ءَ گوشت کہ این 25 شاہراہ ءِ واستہ 25ارب کلدار ءِ منصوبگ بندی بوھگ ءَ انت، وھدیکہ اتحادی گل آنی نیمگ ءَ پیش کرتگیں 87ارب کلدار ءِ دیمروئی منصوبگ آنی سر ءَ ھم دلگوشی دیگ بیت۔ اقتصادی جاور ھالانی بابت ءَ گپ جنان ءَ احسن اقبال ءَ گوشت کہ حکومت بے وسی ءُ موقتی اقتصادی دیمروئی ءِ بدل ءَ پائیدار ءُ مھکمیں دیمروئی ءِ سر ءَ ایمان داریت۔ آئی ءِ گشگ ءِ رد ءَ ھرچ ءُ درچ ءِ تہ ءَ یک غیر معمولی گیشی یے دیمروئی ءِ رفتار ءَ را موقتی رنگ ءَ گیش کنت بلے اے وڑیں دیمروئی پائیدار نہ اِنت۔ آئی ءَ اے گپ ءِ سر ءَ زور پر دات کہ پاکستان ءِ برجمیں اقتصادی دیمروئی ءِ واستہ برآمدات ءِ تہ ءَ گیشی المی اِنت۔ آئی ءَ گوشت کہ کشت ءُ کشاری ءِ شوبگ ءَ را نوکیں لیکہ آنی سر ءَ دیمروئی حکومت ءِ اولی ترجی آنی تہ ءَ ھوار انت ءُ سی پیک ءِ دومی بھر ءِ چیر دستی ءَ کشت ءُ کشاری ءِ پٹ ءُ پول ءُ نوکیں تکنیک آنی دیمروئی ءِ واستہ چین ءَ پاکستانی ماہرین تربیت دیگ بوھگ ءَ انت۔ اے درگت ءَ یک ہزار زرعی کارندہ آنی واستہ تربیتی پروگرام جاری انت۔ احسن اقبال ءَ گوشت کہ 2019ءَ چہ 2022ءِ ساھت ءَ زورگ بوتگیں مزنیں وام آناں پدا دیگ ءِ واستہ نوں مزنیں کساسے ءَ زرّ ءِ ھرچ کنگ لوٹ ایت کہ ایشی ءَ چہ دیمروئی ھرچ ءُ درچ ءَ را تاوان رسیت۔ البت حکومت ءَ اقتصادی برجائی ءِ پڑ ءَ مزنیں سوبمندی یے رستگ ۔ آئی ءَ گوشت کہ مہنگائی ءِ شرح ءَ را دو ہندسہ ءَ چہ یک ہندسہ ءَ آرگ مزنیں سوبمندی یے، اگاں چہ میاں اوستمانی تک ءَ برجاھیں بحران ءِ سبب ءَ مہنگائی ءِ سر ءَ دباؤ برجاہ بوتگ۔ آئی ءَ گوشت کہ رواں مالی سال ءِ جولائی اپریل ءِ ساھت ءَ مہنگائی ءِ تہ ءَ اوسط شرح 6.2درسد بوتگ وھدیکہ زرّ ءِ دیم دیگ 34ارب ڈالر ءَ سر بوتگ۔ اپریل 2026 ءِ ھساب ءَ پاکستان ءِ زرّ ءِ ذخیرہ 21.3ارب ڈالر بوتگ۔ وفاقی وزیر ءَ گوشت کہ مزن وزیر شہباز شریف ءِ سروکی ءَ سود ءِ شرح 23درسد ءَ چہ 10درسد ءَ کم بوتگ۔ مزن وزیر ءِ واھشت اِنت کہ اقتصادی دیمروئی مھکم، متوازن ءُ پائیدار بہ بیت ءُ برآمدات، پیداواری شوبگ آنی دیمروئی ءُ سرمایہ کاری ءِ دیمروئی ءِ سر ءَ بنیات بہ بیت۔