وفاقی وزیر جان سلامتی ءِ سروکی ءَ مزن تک ءِ دیوان کتگ، دمگی ویکسین ءِ پیداوار ءَ را ترند کنگ ءِ پنت ءُ شون

اسلام آباد۔1جون  (اے پی پی): وزارت ءِ جان سلامتی ءَ وفاقی وزیر جان سلامتی مصطفیٰ کمال ءِ سروکی ءَ مزن تک ءِ دیوان برجم دارگ بوت کہ ایشی ءِ تہ ءَ وفاقی سیکرٹری جان سلامتی، ایڈیشنل سیکرٹری، سی ای او ڈی آر اے پی، سی ای او نیشنل انسٹی ٹیوٹ آف ہیلتھ (NIH) ءَ ھوار وزارت جان سلامتی ءِ مزنیں کارندہ آنی تہ ءَ بھر زوری بوت۔ دیوان ءَ جنیوا ءَ برجم داشتگیں ورلڈ ہیلتھ اسمبلی ءِ ساھت ءَ میاں اوستمانی شریکداری ءِ سر ءَ عمل کنگ ءِ تہ ءَ ھاسیں دیوان، پیسلہ ءُ پیشرفت ءِ سر ءَ سرجمیں چار ءُ تپاسی کنگ بوتگ۔ اے موہ ءِ سر ءَ وفاقی جان سلامتی ءِ وزیر مصطفیٰ کمال ءَ پنت ءُ شون کت کہ جھان ءِ تک ءَ کتگیں وعدہ ءُ جوڑ بوتگیں شریکداری آناں وھد ءُ پاس ءِ سر ءَ عمل کنگ بہ بیت تانکہ پاکستان ءِ جان سلامتی ءِ شوبگ ءَ را گیش ءَ چہ گیش نپ رس ایت۔ گند ءُ نند ءَ پاکستان ءَ لوکل ویکسین ءِ پیداوار ءِ ھوالگ ءَ برجاھیں پیشرفت ءِ سر ءَ ھم چار ءُ تپاسی کنگ بوت۔ وزیر جان سلامتی ءَ پنت ءُ شون کت کہ ویکسین جوڑ کنگ ءِ شوبگ ءَ انڈونیشیا ءِ گوما معاہدے ءَ را گڈی رنگ ءَ سرجم کنگ ءِ واستہ درستیں المی ئیں گامگیج زوتاں چہ زوت سرجم کنگ بہ بنت۔ مصطفیٰ کمال ءَ گوشت کہ انڈونیشیا لوکل ویکسین جوڑ کنگ ءِ واستہ پاکستان ءِ یک ھاسیں ءُ بھروسہ مندیں شریک انت۔ آئی ءَ ڈی آر اے پی ءُ نیشنل انسٹی ٹیوٹ آف ہیلتھ ءَ را پنت ءُ شون کت کہ آ بنجاھی تک ءَ ویکسین ءِ پیداوار ءِ واستہ درستیں المی گامگیج ءُ بندوبست آناں ترند بہ کن اَنت۔ وفاقی جان سلامتی ءِ وزیر ءَ گوشت کہ ملک ءَ سیزدہ مزنیں نادراھی آنی ھلاپ ءَ ویکسین ءِ بنجاہی پیداوار وھد ءِ ضلورت جوڑ بوتگ ایشی ءَ چہ نا ایوک ءَ راجی جان سلامتی ءِ نظام ءَ را مھکم کنگ بیت بلکینگ ءَ ویکسین ءِ دستیابی ءُ وت واجہی ءَ را ھم گیش کنگ بیت۔ دیوان ءَ گاوی ءِ چیر دستی ءَ جاری ویکسین پروگرام آنی آیوکیں فنڈنگ ​​ءُ برجائی ءِ جتا جتائیں تک آنی سر ءَ ھم چار ءُ تپاسی کنگ بوت۔ ایشی ءَ ابید وزیر جان سلامتی ءَ راجی جان سلامتی کمک پروگرام ءِ پیشرفت ءِ چار ءُ تپاسی کنان ءَ ایشی ءَ را حکومت ءِ پرچم بردار پروگرام لیک اتگ ءُ گوشت کہ اے پروگرام ءِ وسیلگ ءَ الس آناں کوالٹی ءُ گہتریں جان سلامتی آسراتی آنی پھجارینگ ءَ را دل یکیمی کنگ بیت۔ آئی ءَ اے عزم ءِ یک رندے پدا گوشت کہ وزارت جان سلامتی الس ءِ وشھالی ءُ جان سلامتی ءِ شوبگ ءَ پائیدار اصلاحات ءِ واستہ درستیں دستیابیں وسیلگ آناں کارمرد کنت۔