حکومت بزگریں کسٹومر ءَ را ریلیف ءِ پجارینگ ءَ برجاہ دار ایت، توانائی ءِ وفاقی وزیر سردار اویس احمد خان لغاری

اسلام آباد۔31مئی  (اے پی پی): توانائی ءِ وفاقی وزیر سردار اویس احمد خان لغاری ءَ چہ رکینگ بوتگیں صارف آنی واستہ بجلی ءِ سبسڈی ءِ ھلاسی ءِ ھال رد کنگ ءِ وھد ءَ گوشت کہ حکومت مستحقیں صارف آناں ریلیف ءِ پجارینگ ءَ برجاہ دار ایت۔ توانائی ءِ شوبگ ءَ اصلاحات، آئی پی پیز ءِ معاہدہ آنی چار ءُ تپاسی ءُ ڈسٹری بیوشن کمپنی آنی تاوان ءِ تہ ءَ کمی ءِ سبب ءَ ارباں کلدار ءِ بچت بوتگ کہ ایشی ءِ جوانیں اثر صارفین ءَ سر بوھگ ءَ انت۔ رجسٹریشن ءُ کیو آر کوڈ سسٹم ءِ وسیلگ ءَ سبسڈی ءِ شفاف ءُ موثر پھجاری ءَ را دل یکیمی کنگ بوھگ ءَ اِنت وھدیکہ بجلی ءِ ٹیرف ءِ تہ ءَ کمی، شمسی نظام ءِ تہ ءَ قابل تجدید توانائی ءِ دیمروئی ءُ آسراتی آنی وسیلگ ءَ الس ءَ را گیش ریلیف پجارینگ بوھگ ءَ اِنت۔ یک شمبے ءِ روچ ءَ پریس کانفرنس ءَ گوں تران کنان ءَ وفاقی وزیر ءَ گوشت کہ گوستگیں لھتیں ھپتگ آنی تہ ءَ میڈیا ءُ سوشل میڈیا ءِ سر ءَ بجلی ءِ شوبگ ءَ ھوالگ ءَ جتا جتائیں جیڈھ آنی سر ءَ گپ ءُ تران بوتگ، ایشی ءِ ھوالگ ءَ راستی آناں الس ءِ دیم ءَ ایر کنگ المی اِنت تانکہ مردم وت پیسلہ بہ کن اَنت کہ برجاھیں بجلی ءِ شوبگ ءَ اصلاحات کنگ بہ بنت یا نہ؟ آئی ءَ گوشت کہ 200 یونٹ ءَ چہ کم بجلی ءِ کارمرد کنوکیں صارف آناں داتگیں سبسڈی ءِ تفصیل بل آنی سر ءَ ریکارڈ کنگ بوھگ ءَ انت ءُ صارف آناں لوٹ کنگ بوھگ ءَ انت کہ آ کیو آر کوڈ ءِ وسیلگ ءَ بل دیوکیں مردم ءِ شناختی کارڈ ءَ گوں میٹر ءَ ھمگرنچ بہ کن انت۔ آئی ءَ گوشت کہ گوستگیں چار سال آنی تہ ءَ 200ءَ چہ کم یونٹ ءِ کارمرد کنوکیں صارف آنی کساس 9.5ملین ءَ چہ 21.5ملین ءَ سر بوتگ، وھدیکہ اے صارف آناں سالی 527ارب کلدار ءِ رعایت دیگ بوھگ ءَ اِنت، ایشی ءِ تہ ءَ 249ارب کلدار حکومت پاکستان ءُ دگہ 278ارب کلدار ای الیکٹرک صارف آناں برداشت کنگ ءَ اِنت۔ وفاقی وزیر ءَ گوشت کہ گوستگیں دو سال آنی تہ ءَ بجلی ءِ نرخ آنی تہ ءَ سک باز کمیگ بوتگ۔ آئی ءَ گوشت کہ آئی پی پیز ءِ گوما معاہدہ آنی چار ءُ تپاسی ءِ آسر ءَ آیوکیں وھد ءَ 3500ارب کلدار ءِ ادائیگی صارف آناں دیم دیگ بوتگ۔ بندیں بجلی گس آنی غیر ضروری مشینری 47ارب کلدار ءَ نیلام کنگ بوتگ وھدیکہ اے ادارگ آنی کارندہ آناں ڈسٹری بیوشن کمپنی آناں دیم دیگ بوتگ۔ آئی ءَ گوشت کہ یک سال ءِ ساھت ءَ ڈسٹری بیوشن کمپنی آنی تاوان 193ارب کلدار کمی بوتگ ءُ سرکلر ڈیبٹ 780ارب کلدار کمی بوتگ۔ سردار اویس لیغاری ءَ گوشت کہ گوستگیں وھد ءَ پاور ڈویژن ءَ را سالانہ بجٹ ءِ کمک 1287ارب کلدار رسگ ءَ ات کہ رواں مالی سال ءَ 890ارب کلدار ءَ تاں تحدود بوتگ وھدیکہ آیوکیں بجٹ ءَ ایشی ءِ لوٹ 830ارب کلدار ءَ چہ کم کنگ بیت۔ وفاقی وزیر ءَ گوشت کہ دو سال ءِ ساھت ءَ بجلی ءِ شوبگ ءَ راجی خزانہ ءِ سر ءَ 457ارب کلدار ءِ بار کم کتگ۔ آئی ءَ گوشت کہ کراس سبسڈی ءِ تہ ءَ کمی ءِ سبب ءَ صنعتی صارف آنی شرح کم کنگ بوتگ انت۔ آئی ءِ رد ءَ مارچ 2024ءَ ملکی صارف آنی واستہ اوسط ٹیرف 43.44کلدار بوتگ کہ نوں 36.35کلے ءَ چہ کم بوتگ وھدیکہ صنعتی ٹیرف 62.99کلے ءَ چہ کم بوتگ ءُ 42.40کلے بوتگ۔ وفاقی وزیر ءَ گوشت کہ 2025 ءَ پاکستان ءِ بجلی ءِ شوبگ ءَ چہ پیداک بوتگیں 55درسد بجلی ساپیں توانائی ءَ چہ جوڑ بوتگ، وھدیکہ اے تناسب ءَ را 2035 ءَ تاں 90درسد ءَ سر کنگ ءِ ٹارگٹ ایر کنگ بوتگ۔ گوستگیں سال ءَ 9ہزار میگاواٹ ءِ گیشیں بجلی ءِ گرگ ءِ منصوبگ آنی تجویز داتگ ات، ایشی ءَ چہ 15ارب ڈالر ءِ سرمایہ کاری ءُ آیوکیں وھد ءَ صارفین ءِ سر ءَ سالانہ 400ارب کلدار ءِ گیشیں بوجھ بند بوتگ ات۔ آئی ءِ رد ءَ اے پیسلہ ءَ چہ بجلی ءِ نھاد ءَ را 4 کلدار فی یونٹ ءِ ممکنہ گیشی ءَ چہ رکّینگ بوت کنت۔ سردار اویس لیگاری ءَ گوشت کہ حکومت ایوک ءَ ھما منصوبگ آنی گوما دیم ءَ روگ ءَ اِنت کہ آھانی سر ءَ پیسر ءَ چہ سرمایہ کاری کنگ بوتگ، ایشی ءِ تہ ءَ دیامر بھاشا، داسو، محمند ڈیم ءُ چشمہ ایٹمی بجلی گس ھوار اَنت۔ آئی ءَ گوشت کہ دیامر بھاشا ڈیم ءِ ٹرانسمیشن لائن ءِ ھرچ ءُ درچ ءَ را حکومت وت زور ایت تانکہ ایشی ءِ بار صارف آنی سر ءَ مہ روت۔ آئی ءَ گوشت کہ حکومت ءَ بجلی ءِ گرگ ءِ روایتی نظام ءَ چہ دور بوھگ ءِ پیسلہ کتگ ءُ مسابقتی مارکیٹ آنی جوڑیشت ءَ را کانودی جوڑ کتگ ءُ آیوکیں وھد ءَ حکومت بجلی ءِ گرگ ءِ کاروبار ءَ چہ ڈن مانیت۔ وفاقی وزیر ءَ گوشت کہ حکومت سولرائزیشن ءِ ھلاپ نہ انت بلکینگ ءَ ایشی ءِ دیمروئی ءِ حق ءَ انت۔ نیٹ میٹرنگ ءُ سولرائزیشن ءِ پالیشی مسلم لیگ ن ءِ سرکار ءَ کتگ ءُ مرچی ھم ملک ءَ سولر انرجی ءِ تیزی ءَ گوں دیمروئی کنگ ءَ انت۔ آئی ءَ گوشت کہ احتیاطی اندازگ ءِ رد ءَ صارف آنی نیمگ ءَ چہ وتی سرمایہ کاری ءَ چہ 50ہزار میگاواٹ ءِ کساس ءَ شمسی توان ایر کنگ بوتگ۔ آئی ءَ گوشت کہ نیٹ میٹرنگ پالیسی ءِ تہ بدلی ءَ ابید ھم درخواست آنی تہ ءَ کمی نہ بوتگ بلکینگ ءَ گیشی بوتگ۔ آئی ءَ گوشت کہ صارف آنی شکایت آناں گیواری ءِ واستہ 118 ہیلپ لائن ءِ بندات کنگ بوتگ ءُ درستیں شکایت باقاعدگی ءَ ریکارڈ ءُ نگرانی کنگ بنت۔ وفاقی وزیر ءَ گوشت کہ گوستگیں سال ءَ 2.3ملین شکایت رستگ اَنت، وھدیکہ اے سال ءَ اے کساس 6.1ملین ءَ سر بوتگ، ایشی ءِ تہ ءَ 4.6ملین شکایت ایر کتگیں وھد ءِ تہ ءَ گیش ءُ گیوار کنگ بوتگ اَنت، وھدیکہ 1.49ملین شکایت ایر کتگیں وھد ءِ تہ ءَ گیش ءُ گیوار کنگ نہ بوتگ اَنت۔ وفاقی وزیر ءَ گوشت کہ گوستگیں روچ آنی تہ ءَ ٹرانسفارمر ءِ جوڑ کنگ ءِ واستہ دمگی مردم آناں چہ 80 ہزار کلدار زورگ ءِ وئیل ءِ سر ءَ سکیں گامگیج چست کنگ بوتگ۔ آئی ءَ گوشت کہ حکومت ءَ را احتساب ءِ سر ءَ ایمان انت ءُ الس ءِ نمائندگ آنی نیمگ ءَ چست بوتگیں جست آنی پسو ءُ کارکردگی ءَ را گہتر کنگ ءِ واستہ برجاھیں گامگیج چست کنگ بیت۔ وفاقی وزیر ءَ گوشت کہ حکومت ایوک ءَ ھما منصوبگ آنی گوما دیم ءَ روگ ءَ اِنت کہ ایشی ءِ سر ءَ پیسر ءَ چہ سرمایہ کاری کنگ بوتگ، ایشی ءِ تہ ءَ ڈائمر بھاشا، داسو ءُ محمند ڈیم، جتا جتائیں ہائیڈرو منصوبگ ءُ چشمہ ایٹمی بجلی گس ھوار اَنت۔ آئی ءَ گوشت کہ اے منصوبگ آنی سرجمیں پیداواری گنجائش 2000 اِنت۔