پاک ءُ امریکہ ءِ سیادی پاکستان ءِ دری پالیشی ءِ یک ھاسیں ستونے، یوسف رضا گیلانی

لاہور۔30مئی  (اے پی پی): سینیٹ ءِ چیئرمین سید یوسف رضا گیلانی ءَ پاکستان ءُ امریکہ ءِ نیام ءَ دیریں سیادی آناں پاکستان ءِ دری پالیشی ءِ یک ھاسیں ستون لیک اِتگ ءُ گوشت کہ دوئیں ملک آنی نیام ءَ سیادی وت مہ وتی ءِ شرپ ءُ شرپ، یکجائی مول ءُ مراد ءُ آیوکیں وھد ءِ ھاترا کمک ءِ سر ءَ بندوک اَنت۔ امریکی قونصل جنرل اسٹیٹسن سینڈرز ءَ لاہور ءَ سینیٹ ءِ چیئرمین سید یوسف رضا گیلانی ءَ گوں گند ءُ نند کتگ، ایشی ءِ تہ ءَ پاک امریکہ ءِ سیادی، بیپاری سیادی، سرمایہ کاری، ڈل آنی بدلی ءُ دمگ ءِ سرجمیں جاور ھال ءِ سر ءَ سرجمیں رنگ ءَ گپ ءُ تران کنگ بوتگ۔ سینیٹ سیکرٹریٹ میڈیا ڈائریکٹوریٹ ءِ نیمگ ءَ شمبے ءِ روچ ءَ جاڑی بوتگیں بیان ءِ رد ءَ چیئرمین سینیٹ ءَ امریکی صدر ڈونلڈ ٹرمپ ءُ آئی ءِ انتظامیہ ءِ دمگ ءَ امن ءُ ایمنی ءِ واستہ پاکستان ءِ جوانیں کرد ءِ سر ءَ اعتماد ءِ توسیپ کنان ءَ گوشت کہ پاکستان ءَ را راجدپتری اسلام آباد گپ ءُ تران ءِ میزبانی کنگ ءَ وش اِنت ءُ ایشی ءَ چہ ایران ءُ ایران ءِ نیام ءَ یک ھاسیں موہ ءِ رسگ ءَ انت۔ سینیٹ ءِ چیئرمین سید یوسف رضا گیلانی ءَ دوئیں ملک آنی نیام ءَ انوگیں مزن تک ءِ رابطہ آناں وش اتک کنان ءَ تجارت، سرمایہ کاری، انفارمیشن ٹیکنالوجی، توانائی، معدنیات، جان سلامتی، وانگ ءُ زانگ ءُ کشت ءُ کشاری ءِ شوبگ آنی تہ ءَ کمک ءَ را گیش دیمروئی دیگ ءِ ضلورت ءِ سر ءَ زور پر دات۔ آئی ءَ گوشت کہ امریکہ پاکستان ءِ یک ھاسیں اقتصادی شریک ءُ پاکستانی برآمدات ءِ مستریں مارکیٹ انت۔ آئی ءَ دو نیمگی تجارت ءِ تہ ءَ گیشی ءُ تجارتی کمک ءِ تہ ءَ پیشرفت ءَ را وش اتک کت ءُ امریکی سرمایہ کار آناں پاکستان ءِ کشت ءُ کشاری، آئی ٹی، معدنیات ءُ توانائی ءِ شوبگ آنی تہ ءَ سرمایہ کاری ءِ دعوت دات۔ چیئرمین سینیٹ ءَ گشتگ کہ پاکستان ءَ روزگار ءِ موہ پیداک کنگ ءُ اقتصادی دیمروئی ءَ امریکی کمپنی ھاسیں کرد پیلو کنگ ءَ انت ءُ دوئیں ملکانی نیام ءَ اقتصادی سیادی ءَ را گیش مھکم کنگ بہ بیت۔ دمگی جاور ھال آنی سر ءَ تران کنان ءَ آئی ءَ اپریل ءُ مئی 2025 ءِ جیڈھ ءَ پد پاکستان ءُ بھارت ءِ نیام ءَ جنگ بندی ءِ دلالی ءِ تہ ءَ امریکی انتظامیہ ءِ کرد ءَ را ساڑات۔ آئی ءَ اے گپ پدر کت کہ پاکستان خطہ ءِ توامیں ملک آنی گوما جوانیں ءُ جوڑیشت ءِ واھشت مند اِنت بلے راجی سلامتی ءُ وت واجہی ءِ سر ءَ ھچ وڑیں سوگند بوت نہ کنت۔ آئی ءَ سندھ آپانی معاہدہ ءِ ھوالگ ءَ بھارتی کارروائی آنی سر ءَ دلپروشی ءِ درشان کت ءُ گوشت کہ آپ ءِ پریشر ءُ سیاسی مول ءُ مراد آنی واستہ کارمرد کنگ دمگ ءِ امن، برجائی ءُ لاکھوں پاکستانی آنی وردن ءُ اقتصادی ایمنی ءِ واستہ ھترہ انت۔ آئی ءَ میاں اوستمانی براتی ءَ را زور پر دات کہ آ میاں اوستمانی کانود ءِ احترام ءَ را دل یکیمی کنگ ءِ واستہ وتی کرد ءَ پیلو بہ کنت۔ چیئرمین سینیٹ ءَ پارلیمانی سفارتکاری ءِ ارزشت ءَ را پدر کنان ءَ پاکستان ءُ امریکہ ءِ کانود ساز ادارگ آنی نیام ءَ سیادی ءَ را گیش مھکم کنگ ءِ ضلورت ءِ سر ءَ زور پر دات ءُ دوئیں ملک آنی نیام ءَ پارلیمانی ڈل آنی مٹ ءُ بدلی ءَ را وش اتک کت۔ مہلوک ءِ نیام ءَ رابطہ پاکستان ءُ امریکہ ءِ سیادی ءِ یک ھاسیں کنٹگ انت۔ امریکہ ءَ نندوکیں پاکستانی کمیونٹی دوئیں ملکانی نیام ءَ یک مھکمیں پُل ءِ کرد ءَ پیلو کنگ ءَ اِنت وھدیکہ امریکی یونیورسٹی آنی تہ ءَ وانگ ءَ پاکستانی نودربر آیوکیں وھد ءَ دوئیں ملک آنی نیام ءَ نیک راھی ءِ سفیر ثابت بنت۔ چیئرمین سینیٹ ءَ امیت سہرا کت کہ آیوکیں وھد ءَ پاکستان ءُ امریکا ءِ سیادی گیش مھکم بنت ءُ دوئیں ملک جتا جتائیں شوبگ آنی تہ ءَ وت مہ وتی سیت مندیں کمک ءَ را دیم ءَ بران کن اَنت۔