امریکی قونصل جنرل ءَ لاہور ءَ سینیٹ ءِ چیئرمین ءَ گوں گند ءُ نند کتگ، پاک امریکہ ءِ سیادی، بیپار، سرمایہ کاری ءُ دمگی جاور ھال آنی سر ءَ گپ ءُ تران

اسلام آباد۔30مئی  (اے پی پی): امریکی قونصل جنرل اسٹیٹسن سینڈرز ءَ لاہور ءَ سینیٹ ءِ چیئرمین سید یوسف رضا گیلانی ءَ گوں گند ءُ نند کت۔ اے موہ ءِ سر ءَ پاک امریکہ ءِ سیادی، بیپار، سرمایہ کاری ءُ دمگی جاور ھال آنی سر ءَ گپ ءُ تران کنگ بوت۔ سینیٹ سیکرٹریٹ میڈیا ڈائریکٹریٹ ءِ نیمگ ءَ جاڑی بوتگیں بیان ءِ رد ءَ سینیٹ ءِ چیئرمین ءَ پاکستان ءُ امریکا ءِ نیام ءَ دیریں سیادی ءَ را گیش مھکم کنگ ءِ جزم ءِ پدا زور پر دات ءُ گوشت کہ پاکستان امریکا ءِ گوما وت مہ وتی احترام ءُ یکجائی نپ آنی بنیاد ءَ سیادی ءَ را ارزشت دنت۔ سید یوسف رضا گیلانی ءَ تجارت، آئی ٹی، توانائی، معدنیات، کشت ءُ کشار، وانگ ءُ زانگ ءُ جان سلامتی ءِ شوبگاں گیش کمک ءِ سر ءَ زور پر دات ءُ گوشت کہ پاکستان امریکی سرمایہ کاری ءَ را وش اتک کنت ءُ امریکی کمپنی آنی کرد ءَ را ساڑائیت۔ سینیٹ ءِ چیئرمین ءَ گوشت کہ امریکہ پاکستان ءِ ھاسیں اقتصادی شریک ءُ پاکستانی برآمدات ءِ مستریں مارکیٹ انت۔ چیئرمین سینیٹ ءَ خطہ ءِ امن ءُ ایمنی ءِ واستہ سفارتکاری ءُ گپ ءُ تران ءِ ارزشت ءِ سر ءَ زور پر دات ءُ گوشت کہ پاکستان خطہ ءِ توامیں ملک آنی گوما جوڑیشت ءُ جوانیں سیادی ءِ کوشست ءَ کنت۔ چیئرمین سینیٹ ءَ سندھ ءِ آپانی معاہدے ءِ ھوالگ ءَ بھارتی کارروائی آنی سر ءَ دلپدردی ءِ درشان کت ءُ گوشت کہ آپ ءَ را سیاسی زور ءُ جبر ءِ وسیلگ ءِ رنگ ءَ کارمرد کنگ دمگی امن ءِ واستہ ھترہ اِنت۔ چیئرمین سینیٹ ءَ میاں اوستمانی کانود آنی احترام کنگ ءِ ضلورت ءِ سر ءَ زور پر دات۔ گند ءُ نند ءِ تہا پاکستان ءُ امریکہ ءِ نیام ءَ پارلیمانی سیادی ءَ را گیش کنگ ءُ ڈلانی مٹ ءُ بدلی ءِ سرا تپاک کنگ بوت۔ سینیٹ ءِ چیئرمین سید یوسف رضا گیلانی ءَ گوشت کہ امریکہ ءَ نندوکیں پاکستانی کمیونٹی دوئیں ملک آنی نیام ءَ یک مھکمیں پُل ءِ کرد ءَ پیلو کنگ ءَ انت، مردم ءِ نیام ءَ مردم آنی رابطہ پاکستان ءُ امریکہ ءِ سیادی آنی ھاسیں کنٹگ انت۔