امریکی قونصل جنرل اسٹیٹسن سینڈرز ءَ لاہور ءَ سینیٹ ءِ چیئرمین سید یوسف رضا گیلانی ءَ گوں گند ءُ نند کتگ، دو نیمگی سیادی ءِ بابت ءَ گپ ءُ تران

لاہور۔30مئی  (اے پی پی): امریکی قونصل جنرل اسٹیٹسن سینڈرز ءَ شمبے ءِ روچ ءَ لاہور ءَ سینیٹ ءِ چیئرمین سید یوسف رضا گیلانی ءَ گوں گند ءُ نند کت۔ گند ءُ نند ءِ تہ ءَ پاکستان ءُ امریکہ ءِ وت مہ وتی سیادی، تجارت، سرمایہ کاری ءُ دمگی جاور ھال آنی سر ءَ ھیال ریچی کنگ بوت۔ اے موہ ءِ سر ءَ سینیٹ ءِ چیئرمین ءَ پاکستان ءُ امریکا ءِ نیام ءَ دیریں سیادی ءَ را گیش مھکم کنگ ءِ جزم ءِ پدا زور دات ءُ گوشت کہ پاکستان امریکہ ءِ گوما سیادی ءَ را وت مہ وتی شرپ ءُ شرپ ءُ یکجائی نپ آنی بنیاد ءَ ارزشت دنت۔ آئی ءَ تجارت، آئی ٹی، توانائی، معدنیات، کشت ءُ کشاری، وانگ ءُ زانگ ءُ جان سلامتی ءِ شوبگ آنی تہ ءَ کمک ءَ را گیش کنگ ءِ سر ءَ زور پر دات۔ چیئرمین سینیٹ ءَ گوشت کہ مردم آنی نیام ءَ مردم آنی رابطہ پاکستان ءُ امریکہ ءِ سیادی آنی یک ھاسیں کنٹگ انت ءُ امریکہ ءَ نندوکیں پاکستانی کمیونٹی دوئیں ملک آنی نیام ءَ یک مھکمیں پُل ءِ کرد ءَ پیلو کنگ ءَ انت۔ سید یوسف رضا گیلانی ءَ گوشت کہ امریکہ پاکستان ءِ ھاسیں اقتصادی شریک ءُ پاکستانی برآمدات ءِ مستریں مارکیٹ انت۔ پاکستان امریکی سرمایہ کاری ءَ را وش اتک کنت ءُ ما امریکی کمپنی آنی کرد ءَ را ساڑاھیں۔ چیئرمین سینیٹ ءَ خطہ ءِ امن ءُ ایمنی ءِ واستہ سفارتکاری ءُ گپ ءُ تران ءِ ارزشت ءِ سر ءَ زور پر دیان ءَ گوشت کہ پاکستان خطہ ءِ توامیں ملک آنی گوما جوڑیشت ءُ جوانیں سیادی ءِ کوشست ءَ کنت۔ میاں اوستمانی کانود ءِ احترام کنگ ءِ ضلورت ءِ سر ءَ زور پر دیان ءَ سینیٹ ءِ چیئرمین سید یوسف رضا گیلانی ءَ سندھ ءِ آپانی معاہدے ءَ گوں ھوالگ ءَ ھندی کارروائی آنی سر ءَ دلپروشی ءِ درشانی کت ءُ گوشت کہ آپ ءَ را سیاسی زور ءُ جبر ءِ وسیلگ ءِ رنگ ءَ کارمرد کنگ دمگی امن ءِ واستہ ھترہ اِنت۔ گڈسرا پاکستان ءُ امریکہ ءِ نیام ءَ پارلیمانی رابطہ ءُ ڈلانی تبادلہ ءِ تہا گیشی ءِ سرا تپاک کنگ بوت۔