270,000 پاکستانی کارندہ آں زالبولاں ھوار چار براعظم آنی تہ ءَ اقوام متحدہ ءِ 48 مشن آنی تہ ءَ خدمت کتگ، اقوام متحدہ ءِ امن ءِ رکھینگ ءِ میاں اوستمانی روچ ءِ سر ءَ صدر ءِ کلوہ

اسلام آباد۔29مئی  (اے پی پی): صدر آصف علی زرداری ءَ گوشت کہ پاکستان سرجمیں دگنیا ءَ مشکلیں جاور آنی تہ ءَ خدمت کنگ ءَ اقوام متحدہ ءِ امن براہکار آنی نظم و ضبط، پیشہ وارانہ ءُ قربانی آناں شرپ مند انت۔ آئی ءَ گوشت کہ ما اے 183 پاکستانی کارندہ آنی بہادری ءُ لگنی ءَ را سلام پیش کن ایں ایشاں میاں اوستمانی امن ءُ ایمنی ءِ واستہ وتی سر ندر کتگ انت۔ صدارت ءِ پریس ونگ ءِ رد ءَ صدر ءِ مملکت ءَ جمعہ ءِ روچ ءَ اقوام متحدہ ءِ امن برک آنی میاں اوستمانی روچ ءِ موہ ءَ وتی کلوہ ءِ تہ ءَ گوشت کہ شش دہائی ءَ چہ پاکستان ھما ملک آنی تہ ءَ ھوار اِنت کہ آ اقوام متحدہ ءِ امن برجائی مشن آنی تہ ءَ گیش ءَ چہ گیش کارندہ روان دیان اَنت۔ آئی ءَ گوشت کہ چار براعظم آنی تہ ءَ اقوام متحدہ ءِ 48 مشن آنی تہ ءَ 270ہزار ءَ چہ گیش پاکستانی کارندہ آناں جوانیں ازمت کتگ، اے مشن آنی تہ ءَ پاکستانی زالبول ھم ھاسیں کرد پیلو کنگ ءَ اَنت۔ صدر آصف علی زرداری ءَ گوشت کہ اے ازمت اقوام متحدہ ءِ منشور ءِ مول ءُ مراد ءُ اصول آنی سر ءَ پاکستان ءِ برجاھیں جزم ءِ آدینک اَنت۔ آئی ءَ گوشت کہ پاکستان اقوام متحدہ ءِ کوھن تریں امن مشن آنی تہ ءَ یکے ’’ھندوستان ءُ پاکستان ءِ واستہ اقوام متحدہ ءِ فوجی مبصر گروپ‘‘ ءِ میزبان ھم اِنت ءُ اے مشن ءِ برجاھیں ھست بوھگ ءَ چہ اے گپ ءِ پدر کنگ بیت کہ میاں اوستمانی براتی جموں ءُ کشمیر ءِ جیڈھ ءِ انصاف ءُ دائمی گیواری ءِ واستہ وتی کرد ءَ پیلو کنگ ءَ اِنت۔ صدر ءِ مملکت ءَ گوشت کہ جیڈھ آماچیں دمگ آنی تہ ءَ اقوام متحدہ ءِ امن برجائی ءِ فورسز شہری آنی رکھینگ ءُ انسانی کمک ءِ پجاری ءِ وسیلگ ءَ جوڑ کن اَنت تانکہ نادراھجاہ، اسکول ءُ سرکاری بنجاھی ادارگ وتی کار ءَ را برجاہ دارگ ءَ توانمند بہ بنت۔ ایشانی کار چہ جنگ ءُ آوار جنگ ءَ آماچیں چاگرداں اُمیت ءِ دیم ءَ کاریت۔ آئی ءَ گوشت کہ جھان ءِ تہ ءَ گیش بوھوکیں بے وسی ءُ جیڈھ آنی اے دور ءَ اقوام متحدہ ءِ امن مشن میاں اوستمانی امن ءُ ایمنی ءِ برجائی ءِ یک ھاسیں وسیلگ انت۔ صدر ءِ مملکت ءَ گوشت کہ پاکستان اقوام متحدہ ءِ امن مشن آنی واستہ وتی مھکمیں کمک ءِ یک رندے پدا کنت ءُ سرجمیں دگنیا ءَ امن ءُ ایمنی ءِ واستہ اقوام متحدہ ءِ بیرک ءِ چیر دستی ءَ کار کنوکیں توامیں امن برجائی آں گوں یکوئی ءِ درشان کنت