پاکستان ءَ اقوام متحدہ ءِ امن ءِ کارندہ، پاکستانی ” ’’بلیو ہیلمٹس “ ءَ را  توسیپ ءُ ستا

راولپنڈی۔29مئی  (اے پی پی): اقوام متحدہ ءِ امن ٹروپ آنی میاں اوستمانی روچ 2026 ءِ موہ ءَ پاکستان ءَ اقوام متحدہ ءِ امن رکھینگ ءِ کارندہ آناں ھاسیں رنگ ءَ پاکستانی ”نیلیں ہیلمٹ“ آناں شرپ ءُ شان ءِ درشانی کتگ کہ آھاں جھان ءِ امن ءِ برجائی ءِ واستہ کار کتگ۔ انٹر سروسز پبلک ریلیشنز ءِ رد ءَ پاکستان شش دہائی ءَ چہ گیش اقوام متحدہ ءِ امن مشن آنی تہ ءَ سرجمیں کرد پیلو کنگ ءَ اِنت کہ اے جھان ءِ امن ءُ ایمنی ءِ واستہ آئی ءِ بے دروریں جزم ءِ درشان اِنت۔ آئی ایس پی آر ءِ نیمگ ءَ چہ جاڑی بوتگیں بیان ءِ رد ءَ 1960 ءَ چہ 237 ہزار ءَ چہ گیش پاکستانی امن ءِ کارندہ آں سرجمیں دگنیا ءَ اقوام متحدہ ءِ جتا جتائیں مشن آنی تہ ءَ خدمت کتگ وھدیکہ 183 پاکستانی کارندہ آں جھان ءِ امن ءِ برجائی ءِ کوشست آنی تہ ءَ وتی جان ندر کتگ۔ بیان ءِ تہ ءَ گوشت کہ پاکستانی امن ءِ کارندہ اے وھد ءَ جمہوریہ کانگو، جنوبی سوڈان ءُ میان اُستمانی افریقہ ءِ جمہوریہ ءَ ھوار جتا جتائیں ھترناکیں دمگ آنی تہ ءَ ھوار اَنت، اودا آ جتا جتائیں فوجی آپریشن آنی تہ ءَ خدمت کنگ ءَ اَنت ءُ ھمے رنگ ءَ موسمی بدلی ءِ سبب ءَ پیداکیں چیلنج آنی گیواری ءِ واستہ ھم ھوار اَنت۔ آئی ایس پی آر ءِ رد ءَ نوکیں جنگی جاور پیسر ءَ چہ گیش پیچیدہ، نا مھکم ءُ بے توازن بوتگ اَنت کہ اودا امن ءِ رھشوناں سائبر سیکورٹی ءِ ھترہ، ڈیجیٹل ردیں ھال ءُ اھوال ءِ مہم، سیاسی بھر ءُ بانگ ءُ موسمیاتی بحران ءِ وڑیں نوکیں چیلنج آنی دیمپانی کنگ ءَ اِنت۔ بیان ءِ تہ ءَ گوشت کہ اقوام متحدہ ءِ امن ءِ برجائی ءِ میاں اوستمانی روچ 2026 ءِ بنگپ ”امن ءِ تہ ءَ سرمایہ کاری“ اے گپ ءِ پدر کنگ اِنت کہ دگنیا ءَ را ایوک ءَ جیڈھ آنی پسو دیگ ءَ گوں بندوک بوھگ ءِ بدل ءَ دائمی ءُ پائیدار امن ءِ برجائی ءِ واستہ سرگرمیں گامگیج چست کنگ لوٹ ایت۔ آئی ایس پی آر ءِ رد ءَ انوگیں دور ءَ ”امن ءِ تہ ءَ سرمایہ کاری“ ءِ واستہ نوکیں انٹیلی جنس سسٹم، سول رکھینگ ءِ موثر بندوبست ءُ موسمیاتی ءِ رد ءَ آپریشنل فریم ورک ءِ ضلورت اِنت تانکہ نزوریں آبادی ءَ را جوانیں رنگ ءَ رکھینگ بہ بیت۔ بیان ءِ تہ ءَ گیش گوشت کہ حکومت پاکستان ءُ سلاہ بندیں اُرد اقوام متحدہ ءِ امن مشن آنی مول ءُ مراد ءُ اصول آنی سر ءَ وتی بے مٹیں جزم ءِ یک رندے پدا پدر کن اَنت، ایشی ءِ چیر دستی ءَ انسانی وسیلگ، نوکیں تربیتی آسراتی ءُ ادارگی گنجائش ءِ تہ ءَ سرمایہ کاری برجاہ بیت۔ آئی ایس پی آر ءَ گوشت کہ پاکستان اقوام متحدہ ءِ گوما اوشتاتگ ءُ میاں اوستمانی براتی ءَ را اے کلوہ ءَ دیم دیئگ ءَ انت کہ پائیدار امن وت ماں وت نہ بیت بلکیں ایشی ءِ واستہ برجاھیں یکجائی کوشست ءُ سرمایہ کاری ءِ ضلورت انت۔ پاکستان ءَ اے گپ ءِ ھم پدا پدر کت کہ آ وتی کرد ءَ را جھان ءِ استحکام، ایمنی ءُ انسانیت دوستی ءِ بنیات ءَ اقوام متحدہ ءِ بیرک ءِ چیر ءَ برجاہ دار ایت۔