پاکستان دمگ ءُ دگنیا ءَ امن ءِ دیمروئی ءِ واستہ فعال ءُ جوانیں کرد پیلو کنگ ءَ انت، نائب مزن وزیر محمد اسحاق ڈار نیویارک ءَ پاکستانی امریکی کمیونٹی ءِ شرپ ءَ ائید ءِ شپ ءِ ورگ ءَ گوں تران

نیویارک۔28مئی  (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ پاکستان خطہ ءُ دگنیا ءَ امن ءِ دیمروئی ءِ واستہ فعال ءُ جوانیں کرد پیلو کنگ ءَ انت۔ مزن وزیر محمد شہباز شریف ءِ سرکار ءَ ملک ءَ را سکیں اقتصادی چیلنجاں چہ کش اتگ ءُ استحکام ءِ راہ ءَ ایر کتگ ءُ نوں پاکستان پجائی ءُ ترندیں اقتصادی دیمروئی ءِ نیمگ ءَ گام جنان انت۔ اوورسیز پاکستانی ھاسیں رنگ ءَ امریکہ ءَ نندوکیں پاکستانی ملک ءِ ارزشتی ایں سرمایہ انت کہ آ امریکہ ءِ گوما سفارتی کمک، سرمایہ کاری ءُ راجی سیادی ءَ را مھکم کنگ ءِ تہ ءَ ھاسیں کرد پیلو کنگ ءَ انت۔ پنچ شمبے ءِ روچ ءَ درئی کارانی کارگس ءِ رد ءَ نائب مزن وزیر ءَ اے ھیالانی درشانی نیویارک ءَ پاکستانی امریکی کمیونٹی ءِ شرپ ءَ برجم داشتگیں ائید ءِ شپ ءِ ورگ ءَ گوں تران کنان ءَ کت۔ شام ءِ ورگ ءَ پاکستانی امریکی کمیونٹی ءِ نامداریں راہشون ءُ جتاجتائیں پڑ ءِ مردماں بہر زرتگ۔ نائب مزن وزیر ءَ اے موہ ءِ سر ءَ وتی گشتانک ءِ تہ ءَ پاکستان ءِ راجدپتر ءِ یک ھاسیں باب ءِ ذکر کت ءُ گوشت کہ مئی ءِ ماہ راجی راجدپتر ءِ تہ ءَ بازیں پڑ ءَ ھاسیں ارزشت ءِ واھند اِنت۔ آئی ءَ گوشت کہ 28سال پیسر مرچی 28مئی 1998ءَ مزن وزیر محمد نواز شریف ءِ سروکی ءَ پاکستان ءَ راجی جزم ءُ توانائی ءِ درشان کتگ ءُ ایٹمی طاقت جوڑ بوھگ ءِ شرف رستگ ءُ ھما راج آنی تہ ءَ وتی ھک ءِ جاگہ ​​جوڑ کتگ کہ آھاں گلوبل سیکورٹی ءِ رھبند ءِ ٹھینگ ءَ انت۔ آئی ءَ گوشت کہ درست یک سال پیسر مئی 2025 ءَ پاکستان ءِ بہادریں سلاہ بندیں اُرد ءِ سروکی ءَ آرمی اسٹاف ءِ سروک فیلڈ مارشل ءُ دیمپانیی اُرد ءِ سروک سید عاصم منیر، ائیر اسٹاف ءِ سروک ظہیر احمد بابر سدھو ءُ چیف آف نیول اسٹاف ایڈمرل نوید اشرف ءِ سروکی ءَ پاکستان ءِ دیم پہ دیم انت۔ آئی ءَ گوشت کہ اے جنز ئِ آسر راجی شان ئِ یک بے وھدیں نیمون ئِ جوڑ بوت کہ دائم ءَ یات کنگ بیت۔ نائب مزن وزیر ءَ اے وھد ءَ پاکستانی الس ءُ سلاہ بندیں اُرد ءِ یکوئی، دلی ءُ یکجائی ءَ را ساڑات۔ نائب مزن وزیر ءَ گوشت کہ مزن وزیر محمد شہباز شریف ءِ سروکی ءَ پاکستان دمگ ءُ دگنیا ءَ امن ءِ دیمروئی ءِ واستہ فعال ءُ جوانیں کرد پیلو کنگ ءَ انت ایشی ءَ چہ پاکستان ءِ سنگینی، اعتبار ءُ جھان ءِ امن ءُ ایمنی ءِ واستہ مھکمیں جزم ءِ درشان انت۔ آئی ءَ گوشت کہ ھما راج کہ وت ءَ را رکھینگ ءِ سرجمیں توان ءَ دار ایت آ ھم موثر ءُ مخلصیں امن ءِ کوشست آنی تہ ءَ معتبریں کرد پیلو کت کنت۔ آئی ءَ گوشت کہ پاکستان بے دروریں توانائی ءِ واھندیں ملک اِنت ایشی ءِ جوانیں دور انگت ءَ دیم ءَ اِنت۔ آئی ءَ گوشت کہ مزن وزیر محمد شہباز شریف ءِ حکومت ءَ ملک ءَ را سکیں اقتصادی چیلنج آنی تہ ءَ چہ کش اِتگ ءُ استحکام ءِ راہ ءَ ایر کتگ ءُ نوں پاکستان پائیدار ءُ ترندیں اقتصادی دیمروئی ءِ نیمگ ءَ رھادگ اِنت ایشی ءِ مول ءُ مراد الس ءِ زندمان ءِ تک ءُ پھنات ءَ را گہتر کنگ اِنت۔ آئی ءَ افراط زر ءِ تہ ءَ کمی، کریڈٹ ریٹنگ ءِ تہ ءَ گہتری، درائیں مالیاتی جاور ھال آنی تہ ءَ مھکم بوھگ ءُ سرمایہ کار آنی دلبڈی ءِ تہ ءَ گیشی ءَ را اے جوانیں پیشرفت ءِ نشانی لیک اِت۔ نائب مزن وزیر ءَ گوشت کہ دیمروئی ئِ آیوکیں بھر ئِ بنیات ءَ برآمد کنگ بیت ئُُ حکومت دیم ءَ برآمد کنگ ئِ بنجاہ ئِ اقتصادی ماڈل ءَ را دیم ءَ برگ ءَ اِنت تانکہ درملک ءَ زرّ ئِ تہ ءَ گیشی، روزگار ئِ موہ پجارینگ ئُُ پاکستان ءَ را جھان ءِ معیشت ئُُ سپلائی چینز ئِ یک مھکمیں بھرے جوڑ کنگ ءَ اِنت۔ پاکستانی امریکی کمیونٹی ءِ کرد ءَ را ساڑاتگ ءَ نائب مزن وزیر ءَ گوشت کہ اوورسیز پاکستانی ھاسیں رنگ ءَ امریکہ ءَ نندوکیں پاکستانی ملک ءِ ارزشتی ایں سرڈگار اَنت ءُ امریکا ءِ گوما سفارتی کمک، سرمایہ کاری ءُ مردم آنی سیادی ءَ را گیش مھکم کنگ ءَ ھاسیں کرد پیلو کنگ ءَ اَنت۔ نائب مزن وزیر ءَ پاکستانی امریکی کمیونٹی ءَ را زور پر دات کہ آ وتی رِد ءُ بند آنی سر ءَ پابند بہ بنت، پاکستان ءَ سرمایہ کاری بہ کن اَنت، ءُ ملک ءِ دیمروئی ءِ سفر ءَ بھر بہ زور اَنت۔