مزن وزیر شہباز شریف ءَ چینی ہم منصب لی چیانگ  ءَ گوں گند ءُ نند کت، وت مہ وتی مفاد ءِ توامیں جیڈھ آنی سر ءَ یک دومی ءِ سرجمیں کمک ءِ جزم ءِ  درشان

بیجنگ۔25مئی  (اے پی پی): پاکستان ءُ چین ءَ وت مہ وتی مفاد ءِ توامیں جیڈھ آنی سر ءَ یک دومی ءِ سرجمیں رنگ ءَ کمک کنگ ءِ وتی جزم ءِ پدا پدر کتگ، پاکستان ءُ چین ءِ شریکداری ءَ را عملی، پائدگ مند ءُ مزنیں کوالٹی ءِ کمک ءِ نوکیں پڑ ءَ سر کنگ ءِ سر ءَ تپاک کتگ ءُ آیوکیں سی پی ای سی ءِ بھر ءِ سر ءَ عمل کنگ ءِ واستہ وتی اُمیت ءُ جزم ءِ درشان کتگ۔ مزن وزیر محمد شہباز شریف ءَ دو شمبے ءَ بیجنگ ءَ چین ءِ مزن وزیر لی کی کیانگ ءَ گوں گند ءُ نند کتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ اے گند ءُ نند پاکستان ءُ چین ءِ نیام ءَ سفارتی سیادی ءِ 75سال ءِ درگت ءَ بوتگ۔ مزن وزیر شہباز شریف ءَ مزن وزیر لی چونینگ ءِ گرمیں وش آتک ءِ سر ءَ منت گپت ءُ اے گپ ءِ سر ءَ زور پر دات کہ پاکستان ءُ چین ءِ دیریں اسٹریٹجک کوآپریٹو شریکداری پاکستان ءِ دری پالیشی ءِ بُن ھشت اِنت۔ آئی ءَ گوشت کہ دوئیں ملک آنی نیام ءَ آہنی دوستی وت مہ وتی ءِ سر ءَ بھروسہ، اسٹریٹجک کمک، امن، دیمروئی ءُ وشھالی ءِ سر ءَ انت۔ دوئیں رہشوناں وتی بنیاتی راجی مفاد آنی ھوالگ ءَ درستیں جیڈھ آنی سر ءَ دوئیں ملک آناں سرجمیں کمک ءِ پدرائی کت۔ ایشاں اے گپ ءِ سر ءَ ھم تپاک کت کہ چین ءُ پاکستان ءِ اقتصادی راہداری ءَ پاکستان ءِ چاگردی ءُ اقتصادی دیمروئی ءِ تہ ءَ انقلابی کرد پیلو کتگ۔ دوئیں بامرد آں سی پیک ءِ آیوکیں بھر ءِ سرجمی ءِ واستہ وتی امیت ءُ جزم ءِ درشان کت۔ دوئیں راہشوناں پاکستان ءُ چین ءِ سیادی ءِ توامیں تک ءُ پھنات چار ءُ تپاس کتگ ءُ سیاست، معیشت، حکمت عملی، ایمنی ءُ مردم ءِ نیام ءَ مہلوک ءِ تبادلہ ءِ شوبگ ءَ دو نیمگی کمک ءِ برجاھیں دیمروئی ءِ سر ءَ دل یکیمی ءِ درشان کتگ۔ مزن وزیر ءَ اے گپ ءِ سر ءَ زور پر دات کہ پاکستان ءُ چین ءِ نیام ءَ سفارتی سیادی ءِ 75می سالروچ ءِ ھاسیں موہ ءَ دوئیں ملک آنی نیام ءَ راجدپتری سیادی آناں عملی ، الس دوست ءُ آیوکیں وھد ءِ رد ءَ آسر آنی تہ ءَ بدل کنگ ءِ واستہ کارمرد کنگ بہ بیت۔ آئی ءَ دو نیمگی شریکداری ءَ را گیش مھکم کنگ ءِ واستہ مزن تک ءِ تبادلہ ءُ نزیکیں رابطہ ءِ ارزشت ءِ سر ءَ زور پر دات۔ مزن وزیر ءَ سی پیک ءِ دیمروئی ءُ آئی ءِ آیوکیں مرحلہ ءِ مزن تک ءِ تبادلہ ءِ واستہ پاکستان ءِ جزم ءِ یک رندے پدا گوشت کہ ایشی ءِ تہ ءَ صنعتی کنگ، دو نیمگی سیادی، کشت ءُ کشاری، سائنس ءُ ٹیکنالوجی، ڈیٹا ٹرانسفارمیشن، ساپیں توانائی ءُ چاگردی ءُ اقتصادی دیمروئی ءِ سر ءَ ھاسیں دلگوشی دیگ بیت۔ مزن وزیر ءَ چین ءِ 15می پنچ سالی منصوبگ ءُ پاکستان ءِ دیمروئی فریم ورک ’’اُدان پاکستان‘‘ ءِ نیام ءَ یکوئی ءَ را گیش کنگ ءِ ارزشت ءِ سر ءَ زور پر دات تانکہ پاکستان ءِ دیمروئی ءِ اولویت آناں گیش دیم ءَ برگ ءُ وت مہ وتی فائدہ مندیں کمک ءَ را گیش دیمروئی دیگ بہ بیت۔ مزن وزیر ءَ پاکستان ءِ راجی دیمروئی ءُ اقتصادی برجائی ءِ واستہ چین ءِ برجاھیں کمک ءَ را ساڑات۔ آئی ءَ پاکستان ءَ وتی شہری، ادارگ ءُ منصوبگ آنی واستہ فول پروف سیکورٹی ءَ را دل یکیمی کنگ ءِ واستہ پاکستان ءِ مھکمیں جزم ءِ سر ءَ زور پر دات۔ مزن وزیر ءَ خلائی ریسرچ، مصنوعی ذہانت ءُ جدید ٹیکنالوجی ءِ دیمروئی ءِ وڑیں نوکیں شوبگ آنی تہ ءَ کمک ءَ را گیش کنگ ءِ سر ءَ ھم زور پر دات۔ آئی ءَ گوشت کہ چین ءِ خلائی اسٹیشن پروگرام ءِ واستہ پاکستانی خلاباز آنی گچین کاری نوکیں ءُ اسٹریٹجک شوبگ آنی تہ ءَ پاکستان ءُ چین ءِ کمک ءِ گیش بوھوکیں گہتری ءِ پدر اِنت۔ دوئیں نیمگ ءَ نزیکیں ھمگرنچی ءِ برجاہ دارگ، تپاک کتگیں منصوبگ آنی سرجمی ءَ را تیز کنگ ءُ پاکستان ءُ چین ءِ شریکداری ءَ را عملی، پائدگ مند ءُ مزن تک ءِ کمک ءِ نوکیں پڑ ءَ سر کنگ ءِ سر ءَ تپاک کت۔ گند ءُ نند ءَ سینیٹرمحمد اسحاق ڈار، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، وزیر منصوبہ بندی  ءُ  دیمروئی  احسن اقبال، وزیر قومی غذائی تحفظ رانا تنویر حسین، وزیر اھوالکاری ءُ شنگ کاری  عطا اللہ تارڑ، وزیر آئی ٹی شزہ فاطمہ خواجہ، وزیر ریلوے حنیف عباسی، مشیرِ  مزن وزیرِ   ہارون اختر  ءُ   مزن وزیر    ءِ  ھاسیں کمکار    سید طارق فاطمی   ھم ساڑی اتنت۔