مزن وزیر محمد شہباز شریف ءَ چین ءِ صدر شی جن پنگ ءَ گوں سک باز جوش ءُ وشیں چاگرد ءَ گند ءُ نند کتگ، سفارتی سیادی ءِ 75 سالی روچ ءَ را اسٹریٹجک، عملی ءُ آیوکیں وھد ءِ رد ءَ کمک ءِ نوکیں دور ءَ بدل کنگ ءِ سر ءَ تپاک

بیجنگ۔25مئی  (اے پی پی): پاکستان ءُ چین ءَ دوئیں ملک آنی نیام ءَ دوستی ءِ راجدپتری میراث ءَ را دیم ءَ برگ ءُ سفارتی سیادی ءِ جوڑیشت ءِ 75 سالی روچ ءَ را اسٹریٹجک، عملی ءُ آیوکیں وھد ءِ رد ءَ کمک ءِ نوکیں دور ءَ بدل کنگ ءِ سر ءَ تپاک کتگ وھدیکہ مزن وزیر محمد شہباز شریف ءَ گیش زور پر داتگ کہ مھکم کنگ بہ بیت، سی پیک ءِ دیمروئی ءَ را دیم ءَ برگ بہ بیت ءُ چین ءِ 15می پنچ سالی منصوبگ ءَ را ”اُدان پاکستان“ پروگرام ءِ گوما ھمگرنچ کنگ بہ بیت تانکہ صنعتی کاری، یکے دومی ءِ کمک، سائنس ءُ ٹیکنالوجی، کشت ءُ کشاری، قابل تجدید ءُ ساپیں بدلی توانائی ءُ ڈیجیٹل بدلی ءِ پڑ ءَ جامع کمک ءَ را گیش دیمروئی دیگ بہ بیت۔ دو شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ بیجنگ ءَ چین ءِ صدر شی جن پنگ ءَ گوں سک باز جوش ءُ وشیں چاگرد ءَ گند ءُ نند کتگ۔ اے گند ءُ نند پاکستان ءُ چین ءِ نیام ءَ سفارتی سیادی ءِ 75 سال سرجم بوھگ ءِ درگت ءَ بوتگ۔ گند ءُ نند ءَ نائب مزن وزیر ءُ دری کارانی وزیر سینیٹر محمد اسحاق ڈار، چیف آف آرمی ءُ چیف آف ڈیفنس فورسز فیلڈ مارشل سید عاصم منیر ءِ ہمراہی ءَ ایندگہ مزنیں وزیر ءُ سرکاری کارندہ ہم ساڑی اتنت۔ مزن وزیر ءَ گرمیں وش اتک ءِ سر ءَ صدر شی جن پنگ ءِ منت گپت ءُ اے جزم ءِ پدا زور دات کہ پاکستان ءُ چین ءِ دیریں اسٹریٹجک کوآپریٹو شریکداری پاکستان ءِ دری پالیشی ءِ بنیاتی ستون اِنت۔ آئی ءَ گوشت کہ بدل بوھوکیں دمگی ءُ جھان ءِ تناظر ءَ دوئیں ملک آنی نیام ءَ آہنی دوستی ءِ اسٹریٹجک ارزشت ءَ را گیش گیش کتگ۔ مزن وزیر ءَ چین ءِ بنیاتی مفاد ، ھاسیں رنگ ءَ ’’یک چین پالیسی‘‘ ءِ واستہ پاکستان ءِ بے دروریں کمک ءِ یک رندے پدر کت ءُ پاکستان ءِ وت واجہی ، علاقائی یکوئی ، راجی دیمروئی ءُ اقتصادی استحکام ءِ واستہ چین ءِ برجاھیں کمک ءِ توسیپ کت۔ مزن وزیر ءَ یک روچ پیسر ہانگژو  ءِ وتی سوبمندیں تر ءُ تاب ءِ یات ءَ کنان ءَ صدر شی جن پنگ ءِ ژجیانگ صوبہ ءِ دیمروئی ءِ تہ ءَ کلیدی کرد ءِ توسیپ کت، اودا آ 2002 ءَ چہ 2007ءَ گورنر بوتگ۔ مزن وزیر ءَ دمگی امن ءِ واستہ چین ءِ کمک ءِ توسیپ کنان ءَ گوشت کہ صدر شی جن پنگ ءِ دمگی امن ءِ واستہ چار نکاتی تجویز ءَ را گیش ءَ چہ گیش منگ بوتگ۔ مزن وزیر ءَ گوشت کہ استیں بے وسی ءُ کش ءُ چیلیں جھان ءِ جاور ھال آنی تہ ءَ پاکستان ءُ چین ءِ دوستی ءُ کمک پڑ ءُ دگنیا ءِ تہ برجائی ءِ واستہ کلیدی کرد انت۔ آہاں صدر شی جن پنگ ءِ وژن ءِ سرا مبنی جہانی گامگیج آناں ساڑات کت کہ ایشی ءِ تہا بیلٹ اینڈ روڈ ءِ گامگیج، جہانی دیمروئی ءِ گامگیج، جہانی سیکورٹی ءِ گامگیج، جہانی تہذیب ءِ گامگیج ءُ جہانی گورننس ءِ گامگیج ھوار انت۔ مزن وزیر ءَ ’’بنی آدم ءِ واستہ یکجائی آیوکیں وھد ءِ گوما یک گلوبل کمیونٹی‘‘ ءِ وژن ءِ پاکستان ءِ سرجمیں حمایت ءِ ھم پدر کت۔ مزن وزیر ءَ دوئیں ملک آنی نیام ءَ وت مہ وتی یکوئی ءَ را گیش مھکم کنگ ءِ جزم ءِ درشان کت۔ آئی ءَ اسٹریٹجک رابطہ کاری ءَ را گیش مھکم کنگ، سی پیک ءِ دیمروئی ءَ را دیم ءَ برگ ءُ چین ءِ 15می پنچ سالی منصوبگ ءَ را ’’اُدان پاکستان‘‘ پروگرام ءِ گوما یکجا کنگ ءِ ضلورت ءِ سر ءَ زور پر دات تانکہ صنعتی کاری، رابطہ، سائنس ءُ ٹیکنالوجی، کشت ءُ کشاری، قابل تجدید ءُ ڈیجیٹل ٹرانسفارمیشن توانائی ءِ پڑ آنی تہ ءَ سرجمیں کمک ءَ را گیش دیمروئی دیگ بہ بیت۔ مزن وزیر ءَ گوشت کہ چین ءِ خلائی اسٹیشن پروگرام ءِ واستہ پاکستانی خلاباز آنی گچین کاری پاکستان ءُ چین ءِ کمک ءِ گیش بوھوکیں مھکم ءِ درشان اِنت۔ صدر شی جن پنگ ءَ گوشت کہ چین ءُ پاکستان ءَ وت مہ وتی بھروسہ، مفاہمت ءُ کمک ءِ بنیات ءَ ’’نا ٹوٹوکیں روایتی دوستی‘‘ جوڑ کتگ۔ آئی ءَ اے گپ ءِ سر ءَ زور پر دات کہ جھان ءِ جاور ھال آنی تہ ءَ بدلی آنی باوجود چین وتی ھمساھگی پالیشی ءِ تہ ءَ پاکستان ءِ گوما سیادی ءَ را مدام اولی رنگ ءَ دنت۔ دوئیں راہشون آں پاکستان چین دوستی ءِ راجدپتری پڑ ءَ را دیم ءَ برگ ءُ 75می سالروچ ءَ را اسٹریٹجک، عملی ءُ آیوکیں وھد ءِ ھاترا کمک ءِ نوکیں دور ءَ بدل کنگ ءِ سر ءَ تپاک کت۔