پاکستان اسہ وار ولدا جہانی کہول آ تینا کماشی ءِ امن، پامداری و زمواری نا چیدہ نا وڑ اٹ پیش کرے ، بنجائی وزیر ڈاکٹر طارق فضل چوہدری

اسلام آباد۔ 08اپریل (اے پی پی) بنجائی وزیر پارلیمانی امور ڈاکٹر طارق فضل چوہدری پارینے کہ پاکستان اسہ وار ولدا جہانی کہول آ تینا کماشی ءِ امن، پامداری و زمواری نا چیدہ نا وڑ اٹ پیش کرینے ۔ وزیراعظم شہباز شریف نا جیرت مندانہ و دور اندیش آ کماشی ٹی ملک ڈیہہ اٹی ودوک آ بے چیٹی ءِ کم کننگ کن اسہ گچین ءُ کڑد اس ادا کرینے۔چار شنبے نا دے آ”ایکس ” آ تینا اسہ بیان اسے ٹی او پارے کہ نائب وزیراعظم و وزیر خارجہ اسحاق ڈار نا پدریسہ ، سوگو و بیست ءُ چار گھنٹہ سفارتی کوشست آک جہانی کہول آ پاکستان نا موقف ءِ گچین وڑ اٹ پیش کرینو، وخت اس کہ فیلڈ مارشل سید عاصم منیر نا سوگو، ہم وزن و فیصلہ ئی حکمت عملی دا مچ آ عمل اٹی سوگوی و واک ءِ پین سوگو کرینے ۔او پارے کہ پاکستان پیدوار وڑ اٹ دا پک کرینے کہ او بیرہ تماشائی اس اف بلکن اسہ سرکڑدہ واک اسے ، ہرا نئے بیرہ تینا قومی فائدہ غاتا رکھ ءِ کیک بلکن مچ آ ڈیہہ اٹی امن، مذاکرات و سوگوی ءِ مون آ دننگ کن پبی گام گیج ہم کیک۔ ایران و امریکہ نا نیام اٹ جنگ بندی نا کوشست آتیٹی اونا کڑد اسہ زموار ریاست اسے نا عزم انا عکاسی ءِ کیک۔ دا اسہ ہندن ءُ کماشی اسے ہرا بھاز مشکل وخت اٹی کسر نا تعین ءِ کیک۔ دا اسہ ہندن ءُ عزم اسے ہرا امن کن دے و نن سخت خواری کیک۔ او پارے کہ پاکستان یکجہتی، سوگوی و دیرپاامن کن تینا عزم اٹی ثابت قدم ءِ ۔