عدالت ءِ توہین عدالت نا باندات آتے بِننگ و اوفتیا فیصلہ تننگ نا پورو اختیار دوئی ءِ، بنجائی آئینی عدالت

اسلام آباد۔ 08 اپریل (اے پی پی ) بنجائی آئینی عدالت پاکستان اسہ اہم آئینی فیصلہ ٹی گوندانے کہ عدالت ءِ توہین عدالت نا کارروائی نا بناءِ کننگ، اونا سماعت ءِ کننگ و اوڑآ فیصلہ تننگ نا پورو اختیار دوئی ءِ، چائے توہینِ عدالت آرڈیننس 2003ٹی دا عدالت نا پیدوار ذکر ساڑی مف۔ بنجائی آئینی عدالت نا کنڈآن رپورٹنگ کن منظور مروک نوشتہی  سرجم فیصلہ نا رداٹ جسٹس عامر فاروق نا کماشی ٹی اِراباسکی بنچ، ہراٹی جسٹس سید ارشد حسین شاہ اوار ئس، سی پی ایل اے نمبر 5312آف 2024نا رکھ فیصلہ ءِ بنفسا گوندا کہ توہین عدالت نا اختیار براہ راست آئین پاکستان 1973نا آرٹیکل 204 و 189 آن اخذمریک۔ عدالت تینا فیصلہ ٹی پیدوار کرے کہ توہین عدالت نا سزا تننگ نا اختیار آئینی عدالت اسے نا بنداوی و المی صفت ءِ، ہرااودے تینا آئینی فرض آتے گچین وڑاٹ سرتننگ نا قابل جوڑ کیک۔ سماعت اٹی درخواست گزار سراج احمد تینٹ پیش مرسا عدالت نا دائرہ اختیار آ اعتراض ہرفے۔اونا موقف ئس کہ سپریم کورٹ آف پاکستان نا رجسٹرار نا برخلاف توہین عدالت نا کارروائی زیر التواءِ۔ ہنداسوب آن بنجائی آئینی عدالت داباندات نا سماعت نا اختیارتخپک۔ ولے عدالت دااعتراض ءِ مسترد کرسا گوندا کہ آئین اٹ ترمیم آن پد بنجائی آئینی عدالت ءِ توہین عدالت نا باندات آتے بِننگ و اوفتیا فیصلہ تننگ نا پورو اختیار دوئی ءِ۔