امریکہ تون دہ ٹکی ایجنڈا غا مذاکراتی عمل جمعہ نادے آ اسلام آباد اٹی بناکیک، ایران

تہران۔ 08 اپریل (اے پی پی) ایران پک کرینے کہ امریکہ تون داسہ دہ ٹکی ایجنڈا غا مذاکراتی عمل 15 دے اکن اسلام آباد اٹی جمعہ نادے آن بناکیک، ہراٹی ضرورت تمنگ آ پین ودکی ہم کننگ مریک۔ بی بی سی نا رداٹ ایران نا سپریم نیشنل سیکورٹی کونسل تینا تازہ بیان اٹی پارینے کہ تدوک آ چِل دے اٹی ایرانی الس و سلہہ بند فوج مزاحمت ءِ برجاتخارو جنگ انا گیشتر ہدف دوئی مسنے۔ بیان نا رداٹ ایران بناآن ہی فیصلہ کریسس کہ جنگ ہمووخت اسکان برجاء سلک ہراتم اسکان ملک انا برخلاف مریس مدی خطرہ غاک چٹپس ۔ بیان اٹی پاننگانے کہ ایران امریکی صدر نا کنڈآن تروک آچندی ڈیڈ لائن تے مسترد کرے۔ سپریم نیشنل سیکورٹی کونسل نا رداٹ داسہ وخت ا س کہ ایران ءِ میدانِ جنگ اٹی برتری دوئی ءِ و امریکہ اونا گیشتر خواست آتے امنا کرینے، ہنداسوب آن فیصلہ کننگانے کہ مذاکرات جمعہ نادے آ اسلام آباد اٹی مریک تانکہ جنگ اٹی دوئی مروک آ سرسہبی تے سیاسی کہول آ ہم سوگو کننگ مرے۔ بیان نا رداٹ دامذاکرات 15 دے برجاء سلک و ضرورت تمنگ آ دامد اٹی ودکی ہم ممکن ءِ۔ بیان اٹی پاننگاکہ ایران تینا 10 ٹکی ڈٹ امریکہ ءِ پاکستان ناکمک اٹ پیش کرینے، ہراٹی آبنائے ہرمز آن کنٹرولڈ گزرگاہ، ڈیہہ اٹی مزاحمتی ٹولی تا برخلاف جنگ انا چٹفنگ، امریکی فوجی انا کشنگ، ایران ءِ مروک آ نسخان تا ازالہ، غٹ پابندی تا چٹفنگ، منجمد میرات آتا بحالی و دا غٹ امور نا سلامتی کونسل نا اسہ پابند قرارداد اسے ناکمک اٹ توثیق اوار ءِ۔