اے ڈی بی ءِ ملکی ڈائریکٹر ءَ توانائی ءِ وفاقی وزیر ءَ گوں گند ءُ نند کتگ، آیوکیں وھد ءَ کمک ءِ بابت ءَ گپ ءُ تران

اسلام آباد۔7اپریل  (اے پی پی): وفاقی وزیر  برائے توانائی سردار اویس احمد خان لغاری ءَ گوں  ایشیائی ترقیاتی بینک (اے ڈی بی)  ءِ  کنٹری ڈائریکٹر ایما ژاؤ چن فان  ءَ گوں گند ءُ نند کتگ ءُ بجلی ءِ شوبگ ءَ جاری گہتری ءُ آیوکیں کمک ءِ بابت ءَ گپ ءُ تران کتگ۔ پاور ڈویژن ءِ جارکش ءِ رد ءَ گند ءُ نند ءَ وفاقی وزیر ءَ گوشت کہ توانائی ءِ جھان ءِ چیلنج آنی باوجود پاکستان ءِ بجلی ءِ شوبگ استیں جاور آنی تہ ءَ مھکم اِنت۔ اے استحکام ءِ بنیاد ءَ دمگی وسیلگ آنی گیش بوھوکیں کارمرد کنگ ءِ سر ءَ اِنت، ایشی ءِ تہ ءَ دمگی کوئلہ، پن بجلی ءُ شمسی توانائی ھوار اَنت۔ آئی ءَ گوشت کہ بجلی ءِ نرخ آنی تہ ءَ گیشی ءِ گر ءُ دار ءِ واستہ حکومت بنجاہی ایندھن ءَ چہ بجلی ءِ پیداوار ءِ سر ءَ دلگوشی دیگ ءَ اِنت۔ ایما ژاؤ چنفان ءَ پاکستان ءِ حکومت ءِ نیمگ ءَ وھد ءِ سر ءَ چست کتگیں گامگیج آناں ساڑات ءُ گوشت کہ اے گامگیج ھاسیں رنگ ءَ بجلی ءِ شوبگ ءَ راجی معیشت ءِ مھکم کنگ ءَ ھاسیں کرد پیلو کتگ۔ آئی ءَ گوشت کہ ایشیائی دیمروئی بینک توان ءِ شوبگ ءِ ضلورت آناں سرجمیں رنگ ءَ چار ءُ تپاسی کنان ءَ ڈیجیٹلائزیشن، انٹیگریٹڈ پلاننگ، ڈیٹا گورننس، نجکاری ءُ ادارگی گہتری ءِ وڑیں گامگیج آنی تہ ءَ کمک ءَ را گیش کنگ ءِ واھشت مند اِنت۔ آئی ءَ گوشت کہ اے ڈی بی ایڈوانسڈ میٹرنگ سسٹم ءِ واستہ تکنیکی کمک کنگ ءَ انت وھدیکہ روف ٹاپ سولر ءُ بیٹری انرجی اسٹوریج سسٹم ءِ اثر آنی سر ءَ پٹ ءُ پول کنگ بوھگ ءَ انت۔ آئی ءَ صلاحیت سازی ءِ پروگرام آنی ھم ذکر کت، ایشی ءِ تہ ءَ کوریا ءَ بجلی ءِ شوبگ ءِ ماہرین آنی واستہ ھاسیں تربیت ھوار اِنت تانکہ نوکیں مہارت آنی وسیلگ ءَ گہتری آناں دیمروئی دیگ بہ بیت۔ وفاقی وزیر ءَ اے گپ ءِ سر ءَ زور پر دات کہ اے رنگیں پروگرام آنی واستہ گچین کاری ءِ عمل شفاف ءُ میرٹ ءِ بنیاد ءَ کنگ بہ بیت۔ آئی ءَ گوشت کہ یک نوکیں تربیت یافتہ کارکن ادارگ ءِ گہتری ءِ تہ ءَ مزنیں کردے پیلو کنت۔ وفاقی وزیر ءَ نیشنل گرڈ کمپنی ءِ ارزشت ءِ سر ءَ زور پر دیان ءَ ایشی ءِ نوکیں رنگ ءَ جوڑ کنگ ءِ واستہ لوٹوکیں کمک ءِ سر ءَ زور پر دات۔ آئی ءَ گوشت کہ حکومت ءَ ٹرانسمیشن ءِ شوبگ ءَ سرمایہ کاری ءَ را دیمروئی دیگ ءِ واستہ پاکستان بزنس کونسل متحرک کتگ۔ آئی ءَ گوشت کہ نجکاری ءَ چہ پد ٹرانسمیشن سسٹم ءَ را گیش مھکم کنگ ءِ سر ءَ دلگوشی دیگ بیت۔ ایما ژاؤ چنفان ءَ گوشت کہ اے ماہ ءَ اے ماہ ءَ اے ڈی بی ءِ نائب صدر ءِ پاکستان ءِ تر ءُ تاب ءِ امکان انت۔ گند ءُ نند ءَ فریقین ءَ پاکستان ءَ نوکیں، کارآمد ءُ پائیدار بجلی ءِ شوبگ ءِ دیمروئی ءِ واستہ نزیکیں کمک ءَ را برجاہ دارگ ءِ وتی جزم ءِ پدا زور دات۔\932