قازقستان ءِ سفیر ءَ وفاقی وزیر اورنگزیب خان کھچی  ءَ گوں گند ءُ نند کت، دود ءُ ربیدگی کمک ءِ دیمروئی ءِ بابت ءَ گپ ءُ تران

اسلام آباد۔7اپریل  (اے پی پی): راجی ورثہ ءُ دود ءُ ربیدگ ءِ شعبہ ءِ وفاقی وزیر اورنگزیب خان کھچی ءَ را پاکستان ءَ قازقستان ءِ سفیر یرژان کستافن  ءَ وتی کارگس ءَ گند ءُ نند کت۔ گند ءُ نند ءِ ساھت ءَ دوئیں نیمگ ءَ دود ءُ ربیدگ ءُ میراث ءِ شوبگ ءَ دو نیمگی کمک ءَ را گیش دیمروئی دیگ ءِ گامگیج آنی سر ءَ ھیال ریچی کنگ بوت۔ قازقستان ءِ سفیر ءَ مزن وزیر محمد شہباز شریف ءِ آستانہ ءِ آیوکیں تر ءُ تاب ءَ چہ پیسر یکجائی دود ءُ ربیدگی پروگرامانی ریہرسل کنگ ءِ واستہ پاکستانی دود ءُ ربیدگ ءِ ڈل ءَ را روان دیگ ءِ لوٹ کتگ۔ مزن وزیر ءِ آیگ ءِ سر ءَ استقبالیہ مراگش ءَ ڈل ءَ ساز ءُ زیمل ءِ  پرفارمنس پیش کنت۔ گند ءُ نند ءَ پنجاب ءَ چہ ایم پی اے جہانزیب خان کچی ھم ساڑی ات۔ سفیر ءَ گوشت کہ اے تر ءُ تاب قازقستان ءِ صدر ءِ گوستگیں تر ءُ تاب ءِ برجاہی بیت ایشی ءِ ساھت ءَ آئی ءَ پاکستان ءِ مزن وزیر ءَ را آستانہ ءَ دعوت داتگ ات۔ وفاقی وزیر ءَ دل یکیمی دات کہ گشندہ ءُ قوالی آنی سر ءَ ھواریں دود ءُ ربیدگ ءِ ڈل قازقستان ءَ روان دیگ بیت ءُ پاکستان ءِ دگنیا ءِ نامداریں قوالی اے موہ ءِ سر ءَ وتی ازمی صلاحیت آنی درشان کن اَنت۔ سیکرٹری راجی ورثہ ءُ دود ءُ ربیدگ ڈویژن اسد رحمان گیلانی ءَ اے موہ ءِ سر ءَ گوشت کہ وزیر ءِ پنت ءُ شون ءِ رد ءَ پاکستان جتا جتائیں ملک آنی تہ ءَ گندھارا ءُ موہنجو دارو ءِ وڑیں کوھنیں تہذیب آنی نمائندگی کنوکیں آرکیٹیکچر ءُ دستکاری ءِ سر ءَ چمشانک دیگ ءَ اِنت ءُ ایشی ءِ ضلورت ءِ رد ءَ آستانہ ءَ ھم پیش دارگ بیت۔ سفیر ءَ گیش گوشت کہ اسلام آباد ءَ وت مہ وتی شور ءُ سلاھ ءِ رد ءَ ’’ساز ءُ زیمل ءِ مرکز‘‘ جوڑ کنگ ءِ پیسلہ کنگ بوتگ۔ آئی ءِ لوٹ ءِ رد ءَ اے مرکز ءِ پاکستان نیشنل کونسل آف آرٹس ءَ جوڑ کنگ ءِ سر ءَ تپاک کنگ بوتگ وھدے کہ ایشی ءِ باقاعدہ منظوری وزارت ءِ بورڈ آف ڈائریکٹرز ءِ آیوکیں دیوان ءَ زورگ بیت۔ برجاھیں کمک ءِ سر ءَ زور پر دیان ءَ سفیر ءَ گوشت کہ وانگ ءُ زانگ ءِ شوبگ ءَ کمک ءَ را پیسر ءَ چہ دیم ءَ برگ بوتگ، وھدیکہ نوں دود ءُ ربیدگی شوبگ ءِ سر ءَ گیش دلگوشی دیگ بیت۔ وفاقی وزیر اورنگزیب خان کھیچی ءَ تپاک کتگیں روڈ میپ ءِ رد ءَ دود ءُ ربیدگی کمک ءَ را گیش دیم ءَ برگ ءِ جزم ءِ درشان کت ءُ دود ءُ ربیدگ ءِ پڑ ءَ دوئیں ملک آنی نیام ءَ دستخط بوتگیں مفاہمت نامہ آنی سر ءَ عمل کنگ ءِ دل یکیمی دات۔ سفیر ءَ لاہور میوزیم ءُ نیشنل میوزیم کراچی ءِ تر ءُ تاب ءِ واستہ ہم دلگوشی ءِ درشانی کت، اودا دوئیں ملک آنی ماہرین آستانہ ءَ برجم دارگ بوؤکیں نمائش ءِ واستہ یکجائی ءَ نمونہ آنی گچین کاری ءَ کن انت۔ وزیر ءَ اے رد ءَ سرجمی ءَ کمک ءِ دل یکیمی دات۔ گند ءُ نند ءِ ساھت ءَ سفیر ءَ وفاقی وزیر ءَ را آستانہ ءِ تر ءُ تاب ءِ دعوت ھم داتگ ات کہ آئی ءَ اے دعوت من اِتگ ات۔ وفاقی وزیر ءَ قازقستان ءِ دود ءُ ربیدگی ڈل ءَ را پاکستان ءَ آیگ ءُ وتی روایتی ساز ءُ زیمل ءُ ناچ ءِ پرمان پیش کنگ ءِ دعوت ھم داتگ ءُ گوشت کہ ترکی، تاجکستان ءُ ایندگہ ملک آنی دود ءُ ربیدگی ڈل آناں ھم پاکستان ءِ تر ءُ تاب کتگ۔ وفاقی وزیر ءَ گوشت کہ دود ءُ ربیدگی تبادلہ دو نیمگی کمک ءِ یک ھاسیں ستون اِنت، پاکستان ءِ حکومت میاں اوستمانی ملک آنی گوما سیادی ءَ را دیمروئی دیگ ءَ را ھاسیں ارزشت دنت۔