پاکستان ءُ یوریشیائی یونین ءِ تجارتی معاہدے ءِ سرا زوت گپ ءُ تران کنگ بیت، وفاقی وزیر ءِ تجارت

اسلام آباد۔7اپریل  (اے پی پی): یوریشین اقتصادی یونین ءَ پاکستان ءَ را جنوبی ایشیا ءِ تہ ءَ یک ھاسیں تجارتی شریک ءِ بستار ءَ جار جتگ۔ تجارت ءِ وفاقی وزیر جام کمال خان ءَ سئے شمبے ءِ روچ ءَ یوریشین اقتصادی یونین ءِ بورڈ ءِ باسک ءُ کمیشن انچارج تجارت ءِ وزیر آندرے سلپنیف ءِ گوما مجازی گند ءُ نند کت۔ ای اے ای یو ءِ کارندہ ءَ پاکستان ءَ را دمگ ءِ تہ ءَ یک ھاسیں ءُ نوکیں تجارتی شریک لیک اتگ۔ آئی ءَ گوشت کہ یوریشیائی یونین جنوبی ایشیائی ملک آنی گوما سیادی ءَ را گیش مھکم کنگ ءِ سر ءَ ھاسیں دلگوشی دیگ ءَ انت۔ جام کمال خان ءَ رسد، توانائی، ڈیجیٹل ٹریڈ ءُ صنعتی شوبگ آنی تہ ءَ کمک ءَ را گیش کنگ ءِ واھشت ءِ درشان کت۔ پاکستان ءُ یوریشین یونین ءِ نیام ءَ بیپاری معاہدے ءِ واستہ زوت گپ ءُ تران بندات کنگ بیت۔ آئی ءَ گوشت کہ یکجائی فزیبلٹی اسٹڈی ءَ چہ پد ترجیحی تجارتی رژیم بندات کنگ بیت ایشی ءِ سر ءَ دوئیں ملک آں یکجائی فزیبلٹی اسٹڈی گروپ ءِ جوڑ کنگ ءِ سر ءَ تپاک کتگ۔