رقابت، پیداوار ءِ حجم ءُ پالیسی ءِ رچ برآمدات ءِ پائیدار دیمروئی ءِ ھاتر ءَ بنیاتی عناصر اَنت، صنعت ءُ سرکاری ادارگ آنی نیام ءَ برجاہ رابطہ آیوکیں پالیسی جوڑ کنگ ءِ ھاتر ءَ ناگزیر اِنت، وفاقی وزیر خزانہ ءُ آمدنی

اسلام آباد۔6اپریل  (اے پی پی): وفاقی وزیر خزانہ ءُ آمدنی سینیٹر محمد اورنگزیب ءَ گوشت کہ برآمدات ءِ پائیدار دیمروئی ءِ واستہ مقابلہ کاری، پیداوار ءِ کساس ءُ پالیسی ءِ رچ بنیاتی عنصر انت، آیوکیں پالیسی جوڑ کنگ ءِ واستہ صنعت ءُ سرکاری ادارگ آنی نیام ءَ برجاھیں رابطہ المی انت۔ آئی ءَ اے گپ دو شمبے ءِ روچ ءَ ادا الیکٹرک فین انڈسٹری ءِ نمائندہ ڈل ءِ گوما ورچوئل گند ءُ نند ءِ ساھت ءَ کت۔ ڈل ءِ سروکی ءَ فیڈریشن آف پاکستان چیمبرز آف کامرس اینڈ انڈسٹری ءُ پاکستان الیکٹرک فین مینوفیکچررز ایسوسی ایشن ءِ باسک آں کتگ ات۔ گند ءُ نند ءَ اے شوبگ ءِ جیڈھ آنی سر ءَ سرجمی ءَ گپ ءُ تران کنگ بوت، برآمداتی آسراتی ءُ حکومتی کمک ءِ جتا جتائیں تک ءُ پھنات آنی سر ءَ گپ ءُ تران کنگ بوت۔ شریکیں مردم آناں وش آتک کنان ءَ وزیر ءِ ھزانگ ءَ لاہور ءَ ایف پی سی سی آئی ءِ کاروباری نمائندگ آنی گوما وتی گوستگیں گند ءُ نند ءِ حوالہ دات ءُ اے جزم ءِ پدا زور دات کہ حکومت جتا جتائیں صنعتی شوبگ آنی گوما براہ راست شور ءُ سلاھ ءَ برجاہ دار ایت تانکہ آوانی کاروباری جاور آناں شرتر سرپد بہ بنت ءُ آوانی دیمروئی ءَ کمک بہ کن اَنت۔ ڈل ءَ فین انڈسٹری ءِ ڈھانچہ ءُ معیشت ءِ تہا ایشی ءِ ارزشت ءِ سر ءَ زور پر دات۔ وزیر خزانہ ءَ را سرپد کنگ بوت کہ اے یک سرجمیں لوکل انڈسٹری یے کہ ایشی ءِ تہ ءَ نزیک ءَ 300 کارخانہ ھوار اَنت کہ گیشتر گجرات ءُ گجرانوالہ ءَ ھوار اَنت۔ اے صنعت روزگار ءِ لحاظ ءَ ہم مزنیں کردے پیلو کنت، ایشی ءَ چہ 40 ہزار ءِ نزیک ءَ مردماں براہ راست روزگار ءُ 150 ہزار ءَ چہ گیش مردماں بالواسطہ روزگار رسیت۔ صنعت ءِ مقامی سطح ءَ قدر ءِ اضافہ ءِ تہا ہم یک مزنیں کردے پیلو کنت۔ ڈل ءَ وزیر خزانہ ءَ را صنعت ءِ کارکردگی ءُ نوکیں رجحان آنی بابت ءَ ھم سرپد کت، ھاسیں رنگ ءَ میاں اوستمانی ءُ افریقہ ءَ برآمدات ءِ رد ءَ۔ دیوان ءَ توانائی ءِ موثر ڈی سی فین ٹیکنالوجی ءِ نیمگ ءَ صنعت ءِ ردوم ءِ سر ءَ ھم تران کنگ بوت۔ ڈل ءَ گوشت کہ صنعت ءِ تہ ءَ روایتی پنکھ آناں مزنیں کچے ءَ توانائی ءِ کارمرد کنوکیں پنکھا ءِ بدل کنگ ءِ سرجمیں صلاحیت است انت، ایشی ءَ چہ بجلی ءِ کارمردی ءَ را مزنیں کساسے ءَ کم کنگ بوت کنت۔ اے موہ ءِ سر ءَ وزیر ءِ ھزانگ ءَ گوشت کہ اے درگت ءَ اگاں چہ پالیسی فریم ورک است اِنت بلے ایشی ءِ جوانیں رنگ ءَ سرجمی ءِ واستہ الس ءِ سرپدی ءِ تہ ءَ گیشی ءُ مالیاتی ادارگ آنی گوما جوانیں رابطہ کاری المی اِنت۔ آئی ءَ عملدرآمد ءِ دیم ءَ رکاوٹ آناں دور کنگ ءِ سر ءَ زور پر دات تانکہ اے ٹیکنالوجی ءِ کارمردی ءَ را ترندی ءَ گوں گیشی بوت کنت۔ دیوان ءَ پیداواری ءِ تہ ءَ گیشی ءِ واستہ مالی وسیلگ آناں رسائی ءِ جیڈھ ءِ سر ءَ ھم ھیال ریچی کنگ بوت ءُ گوشگ بوت کہ توان ءِ کارآمد منصوبگ آنی چیر دستی ءَ بوت کنوکیں لوٹ ءِ پیلو کنگ ءِ واستہ پیداوار ءِ تہ ءَ گیشی کنگ المی اِنت۔ وزیر ءِ ھزانگ ءَ گوشت کہ مینوفیکچرنگ ءِ شوبگ ءَ سرمایہ کاری ءَ را آسراتی دیگ ءِ ضلورت انت، صنعت ءِ ضلورت آنی رد ءَ استیں مالیاتی آسراتی آناں گہتر کنگ ءِ واستہ چار ءُ تپاسی کنگ بیت۔ صنعت ءِ نمائندگاں لھتیں بنیاتی ءُ پالیسی ءِ جیڈھ آنی سر ءَ ھم چمشانک دات، ھاسیں رنگ ءَ تانبہ ءُ ایلومینیم ءِ وڑیں کلیدی خام مال آنی دستیابی ءُ کارمرد کنگ ءِ سر ءَ ھم چمشانک دات۔ وزیر خزانہ ءَ را گوشت بوت کہ اے خام مال آنی خام شکل ءَ برآمد کنگ ءِ تہ ءَ گیشی ءَ چہ بنجاہی ویلیو ایڈڈ صنعت ءَ را تاوان رسگ ءَ انت، ایشی ءِ سبب ءَ یک متوازن پالیشی ءِ ضلورت انت کہ ایشی ءَ چہ ملک ءِ اندر ءَ ویلیو ایڈڈ صنعت آناں دیمروئی رسیت۔ کسان ءُ میاں اوستمانی کاروباری ادارگ آناں دیم ءَ اتکگیں مالی جیڈھ آنی سر ءَ ٹیکس ءِ واپسی ءِ وھد ءِ سر ءَ دیگ، برآمدات ءِ آسراتی ءُ خام مال ءِ سر ءَ ٹیرف ءِ سر ءَ ھم سرجمیں رنگ ءَ گپ ءُ تران کنگ بوت۔ وزیر ءِ ھزانگ ءَ گوشت کہ برجاھیں اصلاحات آنی مول ءُ مراد پیداوار ءِ ھرچ ءُ درچ ءَ را کم کنگ ءُ کاروباری چاگرد ءَ را گہتر کنگ اِنت۔ وزیر خزانہ ءَ صنعت ءَ را پنت ءُ شون کت کہ آ وتی خاصیں جیڈھ آنی بابت ءَ حکومت ءَ گوں شیئر بہ کن انت تنکہ آہانی واستہ موثر گیواری ءِ شوہاز کنگ بہ بیت۔ گند ءُ نند ءَ بجلی ءِ سامان ءِ صنعت ءِ مقابلہ کاری ءَ را گیش کنگ ءُ نوکیں مارکیٹ آنی تہ ءَ سر بوھگ ءِ موہ پیداک کنگ ءِ راہ ءُ در آنی سر ءَ ھم تران کنگ بوت، ایشی ءِ واستہ حکومتی کمک ءُ جدت ءِ ھاتر ءَ المی لیکگ بوتگ۔ وزیر ءِ ھزانگ ءَ گوشت کہ برآمدات ءِ برجاھیں دیمروئی ءِ واستہ مقابلہ کاری، پیداوار ءِ کساس ءُ پالیسی ءِ یکوئی المی انت۔ آئی ءَ اے گپ ءِ پدر کنگ ءَ گوشت کہ ٹیکس پالیسی ءِ وھد ءَ المی اِنت بلے صنعتی دیمروئی ءِ واستہ مالی وسیلگ آناں رسائی، توان ءِ کارکردگی ءُ نوکیں مارکیٹ آنی پٹ ءُ پول یک پیم ءَ المی اِنت۔ آئی ءَ صنعت ءُ سرکاری ادارگ آنی نیام ءَ برجاھیں رابطہ آناں آیوکیں پالیسی جوڑ کنگ ءِ واستہ ناگزیر لیک اتگ۔ وزیر خزانہ ءَ توان ءِ بچت ءِ ٹیکنالوجی آناں دیمروئی دیگ ءِ سر ءَ ھم زور پر دات ءُ گوشت کہ استیں حکومتی گامگیج آنی سر ءَ سرپدی ءُ ایشانی جوانیں رنگ ءَ عمل کنگ لوٹ اتگیں نتیجگ آناں رسگ ءِ کلید اِنت۔ گند ءُ نند ءِ گڈ ءَ وزیر خزانہ ءَ ویلیو ایڈڈ مینوفیکچرنگ ءُ برآمد ءِ سرا مبنی صنعت آنی سرجمیں رنگ ءَ کمک کنگ ءِ حکومت ءِ جزم ءِ سر ءَ زور پر دات ءُ گوشت کہ صنعت ءِ نمائندگ آنی گوما برجاھیں شور ءُ سلاھ آیوکیں اقتصادی منصوبگ بندی ءِ یک ھاسیں بھرے ءِ رنگ ءَ مانیت۔ گند ءُ نند ءِ تہ ءَ ھزانگ ءِ وزیرِ مملکت برائے خزانہ بلال اظہر کیانی، وزارتِ خزانہ، فیڈرل بورڈ آف ریونیو  ءُ ایندگر  سیادی داروکیں ادارگ آنی اپسرگ آں بھرزوری کت ۔  دیوان  ءَ    نبیل احمد الیاس (چیئرمین پی ای ایف ایم اے )،    ایم اظہر اسلم (چیئرمین ایکسپورٹ کمیٹی پی ای ایف ایم اے)، یاسر احسان (ڈائریکٹر پاک فینز)،  عماد رفیق (ڈائریکٹر رائل فینز) ءُ  ایم فیصل افضل (سی ای او سپر ایشیا گروپ)  ءُ دگہ نمائندگاں بہر زرتگ۔