اسلام آباد سیف سٹی ءَ را “دارالحکومت اسمارٹ سٹی” ءَ بدل کنگ ءِ پیسلہ ، وزیر داخلہ ءَ 30 مئی ءَ ڈیڈ لائن داتگ

اسلام آباد۔6اپریل  (اے پی پی): وفاقی حکومت ءَ اسلام آباد سیف سٹی منصوبہ ءِ دائرہ کار ءَ را گیش کنگ ءُ ایشی ءَ را سرجمی ءَ ’’کیپیٹل اسمارٹ سٹی‘‘ ءَ بدل کنگ ءِ مزنیں پیسلہ کتگ، ایشی ءِ چیر دستی ءَ وفاقی دارالحکومت ءَ پولیسنگ، ٹریفک ءُ شہری آسراتی ءِ سرجمیں نظام یکیں ڈیجیٹل پلیٹ فارم ءَ دیم دیگ بنت۔ وفاقی وزیر داخلہ محسن نقوی ءَ سیف سٹی ءِ بنجاہی کارگس ءِ تر ءُ تاب کتگ ءُ مزن تک ءِ دیوان ءِ سروکی کتگ، ایشی ءِ تہ ءَ منصوبگ ءِ دومی بھر ءِ سر ءَ بوتگیں پیشرفت ءِ سر ءَ چار ءُ تپاسی کنگ بوتگ۔ گند ءُ نند ءَ وفاقی داخلہ سیکرٹری خرم آغا، ڈی جی ایف آئی اے، آئی جی اسلام آباد ءُ ڈی جی سیف سٹی ءِ ھوار دگہ مزنیں اگدہ داراں بہر زرتگ۔ گند ءُ نند ءِ ساھت ءَ وزیر داخلہ ءَ سیف سٹی ہیڈ کوارٹر ءِ نوکیں ڈیزائن ءِ منظوری دات ءُ پنت ءُ شون کت کہ دومی بھر ءِ سرجمیں کار 30مئی ءَ تاں سرجم کنگ بہ بنت۔آئی ءَ گوشت کہ اسلام آباد ءِ مرکزی کمانڈ اینڈ کنٹرول سسٹم ءَ را اپ گریڈ کنگ بوھگ ءَ انت تانکہ ٹریفک ءِ بندوبست ءُ جرم ءِ کنٹرول ءِ واستہ نوکیں ٹیکنالوجی ءَ را کارمرد کنگ بہ بیت۔ آئی جی اسلام آباد پولیس علی نصیر رضوی ءَ تہی کارانی وزیر ءَ را بریفنگ کنان ءَ گوشت کہ انوگ ءَ تاں فیز دومی ءِ سر ءَ 75درسد کار سرجم بوتگ۔ 152 کلومیٹر ءِ دراجیں فائبر آپٹک کیبل ءِ سرجمیں شہر ءَ ایر کنگ بوتگ۔ نوکیں کیمرہ ءُ مانیٹرنگ سسٹم ءِ ایر کنگ ءِ عمل گڈی تک ءَ انت ءُ 20 مئی ءَ چہ آزمائش بندات کنگ بیت۔اے موہ ءِ سر ءَ محسن نقوی ءَ گوشت کہ شہری آنی جان سلامتی ءُ آسراتی ءِ واستہ ھمک وسیلگ آناں کارمرد کنگ بوھگ ءَ انت۔ آئی ءَ اے گپ ءِ پدرائی کت کہ منصوبگ ءِ ٹھینگ بوتگیں وھد ءِ تہ ءَ سرجمی ءَ را ھرچ قیمت ءَ دل یکیمی کنگ بیت تانکہ اسلام آباد ءَ را جھان ءِ درجہ ءِ ایمن ءُ سمارٹ شہر جوڑ کنگ بہ بیت۔