وزارت اھوالکاری  ءُ شنگکاری ءِ وت سرئیں  افغان جارکش ءِ دروگیں ءُ گمراہ کنوکیں پروپیگنڈا ءِ پدر کنگ

اسلام آباد۔5اپریل  (اے پی پی): وزارت ءِ اھوالکاری ءَ  وت سرئیں  اوگان جارکش ءِ دروگیں ءُ گمراہ کنوکیں پروپیگنڈا ءِ پدر کنگ ءَ انت۔ یک شمبے ءِ روچ ءَ وزارت ءِ ھال ءُ اھوال ءِ نیمگ ءَ چہ سوشل نیٹ ورکنگ پلیٹ فارم ”ایکس“ ءِ سر ءَ یک پوسٹے ءَ گْوشگ بیتگ کہ نام نہاد اوگان جارکش حمداللہ فطرت یک رندے پدا دروگیں ءُ گمراہ کنوکیں بیاناں گوں دراتکگ۔ اے گپ ثابت اِنت کہ پاکستان ءَ اوگانستان ءَ ایوک ءَ فتنہ الخوارج ءُ افغان طالبان ءِ ناشرکاریں بنیاتی ڈھانچہ ءَ گوں سکیں زانتکاری ءَ نشانگ جوڑ کتگ۔ بیان ءِ تہ ءَ گوشت کہ اوگان طالبان رژیم ءُ فتنہ الخوارج ءِ کارندہ آنی بالی اُرش، چیک پوسٹ آنی تباہی ءُ گرگ ءِ ھوالگ ءَ راستیں اعداد ءُ شمار باقاعدگی ءَ اپ ڈیٹ کنگ بنت وھدیکہ اُرش آنی ویڈیو ھم شنگ کنگ بنت، اے گپ ءِ برخلاف اِنت کہ یک پروپیگنڈا ءِ نیمگ ءَ چہ حقیقت ءِ پٹ ءُ پول کنگ بوتگ۔ ایشی ءِ برعکس سرجمیں دگنیا ھما اُرشانی گواہ اِنت کہ ھندوستان ءِ کمک ءَ اوگان طالبان ءِ رژیم ءُ آئی ءِ ناشرکاریں پراکسی آں کتگ اَنت چوش کہ انوگیں وھد ءَ ڈومل، بنو ءَ بوتگیں بزدلیں اُرش کہ اودا زالبول ءُ چُکاں ھوار 10 شہری شھید کنگ بوتگ اَنت۔ پاکستان ءَ ناشرکاری ءِ کارانی واستہ اوگان شہری آنی برجاھیں کارمرد کنگ ءِ شواہد ھم پدر بوتگ اَنت ءُ سرکاری رنگ ءَ دست کپ اَنت، ایشی ءِ تہ ءَ مرچی 5 اپریل ءَ بلوچستان ءِ تہی کارانی وزیر ءِ دیوان ءَ پیش کنگ بوتگیں ھال ھم ھوار اَنت۔ دگہ یک ٹھوسیں گپے ایش انت کہ اوگانستان ءِ تہ ءَ ناشرکاریں سروکی ءَ را پناہ ءُ رکھینگ ءِ ھاتر ءَ رسگ ءَ انت ءُ اقوام متحدہ ءُ دگہ میان استمانی رپورٹاں اوگان طالبان ءِ رژیم ءِ چیردستی ءَ درجناں ناشرکاریں پراکسی ءِ ھست بوھگ ءِ تصدیق کتگ۔ بدقسمتی ءَ بلے بے شرمی ءَ حمداللہ فطرت ءُ اوگان طالبان ءِ رژیم ءِ دگہ جارکش باقاعدگی ءَ جعلی، پرانے ءُ انگت ءَ مصنوعی دروشم ءَ جوڑ بوتگیں پروپیگنڈا ویڈیو ءُ دعویٰ شنگ کن اَنت کہ ایشی ءِ سرپرستی ایوک ءَ وتی ہندی واجہ ءُ وتی پروپیگنڈا نیٹ ورک اِنت۔ دروگ ءِ سرا راستی مدام غالب اِنت۔