سینیٹ ءِ چیئرمین سید یوسف رضا گیلانی ءَ عیسائی کمیونٹی ءَ را ایسٹر ءِ سلام ءِ درشانی کتگ

اسلام آباد۔5اپریل (اے پی پی): سینیٹ ءِ چیئرمین سید یوسف رضا گیلانی ءَ ایسٹر ءِ وشیں موہ ءِ سر ءَ سرجمیں دگنیا ءَ نندوکیں عیسائی کمیونٹی ءَ را دل ءِ جہلانکی ءَ سلام پیش کتگ ءُ نیکیں واھگ آنی درشان ھم کتگ۔ یک شمبے ءِ روچ ءَ سینیٹ سیکرٹریٹ ءِ نیمگ ءَ چہ جاڑی بوتگیں وتی پیغام ءِ تہ ءَ چیئرمین سینیٹ ءَ گوشت کہ ایسٹر عیسائی کمیونٹی ءِ واستہ روحانی نوک کنگ، اُمیت ءُ مھر ءِ مزنیں میلہ اِنت، ایشی ءِ سر ءَ ھاسیں عبادت ءُ نماز ءِ مراگش برجم دارگ بنت۔ آئی ءَ گوشت کہ اے موہ نہ ایوک ءَ روحانی وابستگ ءَ را مھکم کنگ ءِ وسیلگ انت بلکینگ ءَ چاگرد ءِ تہ ءَ مہر، برداشت ءُ براتی ءِ دیمروئی ءِ یک ھاسیں کلوہ ءِ ھم دیئگ ءَ انت۔ سید یوسف رضا گیلانی ءَ عیسائی براتی ءَ گوں دزبندی کت کہ آ وتی حاصیں دعا آنی تہ ءَ پاکستان ءِ ایمنی، امن، مھکمی ءُ وشھالی ءِ واستہ دعا بہ کن اَنت ءُ ھمے وھد ءَ وتی مذھبی مچی آنی وسیلگ ءَ بین المذاہب ھمگرنچی، رواداری ءُ براتی ءِ کلوہ ءَ شنگ ءُ تالان بہ کن اَنت۔ آئی ءَ اے جزم ءِ پدا زور دات کہ پاکستان ءِ اقلیت سرجمیں مذہبی آجوئی ءَ چہ وشھال اَنت ءُ وتی عبادت جاھاں بے ترس ءُ بیم ءَ وتی مذہبی رسماں پیلو کنگ ءَ اَنت۔ چیئرمین سینیٹ ءَ گوشت کہ پاکستان ءِ آئین ءَ اقلیت آنی ھک آنی ضمانت داتگ ءُ اے ھوالگ ءَ جوانیں کانود جوڑ کنگ بوتگ تانکہ درستیں شہری یک وڑیں ھک آنی تہ ءَ سیت چست بہ کن اَنت۔ آئی ءَ گیش گوشت کہ پاکستان پیپلز پارٹی ءَ مدام اقلیت آنی ھک آنی رکھینگ ءُ آوانی توار ءَ را جوانیں رنگ ءَ برجا کنگ ءِ تہ ءَ کرد پیلو کتگ۔ پارلیمنٹ ءَ جوڑ بوتگیں جتا جتائیں کمیٹی آنی وسیلگ ءَ اقلیت آناں دیم ءَ اتکگیں جیڈھ آناں گیواری ءِ واستہ سنگین ءُ موثر گامگیج زورگ بوھگ ءَ انت۔ وتی کلوہ ءِ گڈسرا چیئرمین سینیٹ ءَ یک رندے پدا سرجمیں دگنیا ءِ عیسائی کمیونٹی ءَ را ایسٹر ءِ مبارکی دات ءُ آہانی واستہ امن، وشھالی ءُ سوبمندی ءِ دعا کت۔