حکومت مارکیٹ ءِ نظم ءُ ضبط، ساپ ءُ سلہ ائی ءُ مہلوک ءَ را ریلیف ءِ پجارینگ ءِ ھاترا سرجمی ءَ پابند انت، پروفیسر احسن اقبال

اسلام آباد۔5اپریل (اے پی پی): منصوبگ بندی، دیمروئی، اصلاحات ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ حکومت مارکیٹ ءِ نظم ءُ ضبط، شفافیت ءُ الس ءَ را ریلیف ءِ پجارینگ ءِ سر ءَ سرجمیں رنگ ءَ جزم انت، نرخ آنی تہ ءَ استحکام ایوک ءَ اقتصادی اولویت نہ انت بلکیں اے مئے الس ءَ گوں وعدہ انت۔ وزارت ءِ منصوبہ بندی ءِ رد ءَ وفاقی وزیر پروفیسر احسن اقبال ءَ گوشت کہ پٹرولیم ءِ چیز آنی نرخ آنی تہ ءَ گوستگیں روچاں گیشی ءِ رد ءَ راجی نرخ آنی نگرانی کمیٹی ءِ ھاسیں دیوان ءِ جار جنگ بوتگ ایشی ءِ مول ءُ مراد ایش اِنت کہ الس ءَ را غیر ضروری مالی دباؤ ءَ چہ رکھینگ ءِ واستہ موثر ءُ فیصلہ کنوکیں گامگیج آناں دل یکیمی کنگ بہ بیت۔ دیوان ءَ ٹرانسپورٹ ءِ کرایہ ءِ بنیاتی لوٹ آنی ھوار روچ مرزی زند ءَ را متاثر کنوکیں درستیں چیز آنی سر ءَ سرجمیں رنگ ءَ چار ءُ تپاسی کنگ بوتگ ءُ اے درگت ءَ سیادی داروکیں ادارگ آناں ھاسیں، بروقت ءُ کارروائی ءِ لائکیں ہدایت جاری کنگ بوتگ۔ وفاقی وزیر ءَ گوشت کہ ذخیرہ کاری ءُ ناجائزیں منافع ءِ حلاف ءَ صفر برداشت ءِ پالیشی ءِ سر ءَ سک باز عمل کنگ بوھگ ءَ اِنت۔ آئی ءَ گوشت کہ یوریا کھاد ءِ اسمگلنگ ءِ ھلاپ ءَ ترند ءُ جوانیں کارروائی ءِ ھم دل یکیمی کنگ بوھگ ءَ اِنت۔ پروفیسر احسن اقبال ءَ گوشت کہ این پی ایم سی ءِ دیوان ھپتگی نگرانی ءِ نظام ءِ چیر دستی ءَ ھمک جمعہ ءَ برجم دارگ بنت۔ آئی ءَ گیش کرتگ کہ پبلک ٹرانسپورٹ ءِ کرایہ ءِ سر ءَ نزیکیں نگرانی کنگ بوھگ ءَ اِنت تانکہ بے جاہیں گیشی ءِ دیم ءَ دارگ بہ بیت۔ حکومت ءَ صوبہ آناں ہدایت کتگ کہ آ اے گپ ءَ دل یکیمی بہ کن اَنت کہ کرایہ استیں سبسڈی ءِ رد ءَ ٹھینگ بہ بنت ءُ زوتیں وھد ءَ درستیں صوبگ آنی تہ ءَ کرایہ ءِ لسٹ جاری کنگ بہ بنت۔ وفاقی وزیر ءَ گوشت کہ ضلعی انتظامیہ ءَ را ہدایت کنگ بوتگ کہ آ باقاعدہ ضروری سامان آنی تھوک ءُ خوردہ نرخ آنی جار ءَ بہ جنت۔ پروفیسر احسن اقبال ءَ گوشت کہ وفاقی حکومت ءِ ھمگرنچیں گامگیج اے جزم ءِ درشان انت کہ حکومت نظم و ضبط، شفافیت ءِ دل یکیمی کنگ ءُ مارکیٹ ءَ الس آناں ریلیف ءِ پھجارینگ ءِ واستہ سرجمیں رنگ ءَ جزم انت۔ قیمتانی استحکام ایوک ءَ معاشی اولویت نہ اِنت بلکیں اے مئے راج ءِ گوما وعدہ اِنت۔