وزیر دیمپان خواجہ محمد آصف ءَ سیالکوٹ ءَ ارباں کلدار ءِ میگا ڈویلپمنٹ منصوبگ آنی بنگیج کت

سیالکوٹ۔ 05 اپریل (اے پی پی): وزیر دیمپان خواجہ محمد آصف ءَ سرجمیں ضلع ءِ واستہ ارباں کلدار ءِ میگا ڈویلپمنٹ منصوبگ آنی بنگیج کت۔ افتتاحی مراگش ءِ موہ ءَ میڈیا ءَ گوں تران کنان ءَ وزیر دیمپان خواجہ محمد آصف ءَ گوشت کہ پنجاب ءِ سر وزیر مریم نواز ءِ ھاسیں دلگوشی ءَ گوں شہر ءَ دیمروئی کار آنی پیکج دیگ بوتگ، ءُ آیوکیں سئے سال آنی تہ ءَ شہرب ءِ دروشم ءَ یک ھاسیں بدلی یے کیت۔ آئی ءَ گوشت کہ دیمروئی ءِ اے سفر مریم نواز ءِ سروکی ءَ برجاہ بیت، ءُ آیوکیں گچین کاری ءَ ما یک انچیں رپورٹ کارڈ ءِ آرگ ءَ ایں ایشی ءِ تہ ءَ ملک دیمروئی ءِ راہ ءَ روان بیت۔ وزیر دیمپان ءَ ہندوستان ءَ را ھاسیں کلوہ دات ءُ گشتگ کہ ہندوستان گھبراہگ ءِ حالت ءَ انت، ہندوستان ءِ ہوش گار بوتگ انت، ہندوستان پہلگام ءِ وڑیں دروگیں پرچم ءِ آپریشن بہ کنت گڈا ما کلکتہ ءَ سر بئیں ۔ وزیر دیمپان خواجہ محمد آصف ءَ دیمروئی منصوبگ آنی ھوالگ ءَ گوشت کہ اے پیکج ءَ اقبال منزیل ءِ کش ءُ گور ءَ 16ارب کلدار ءَ چہ گیش ءِ نوک جوڑی ءِ منصوبگ ھم ھوار اِنت وھدیکہ شہر ءَ صفائی ءُ نظام ءِ گہتری ءِ واستہ 640ملین کلدار ءِ نوکیں مشینری ءِ منظوری دیگ بوتگ۔ گوستگیں سال ءَ سیلاب ءِ سبب ءَ بوتگیں تباہی ءِ رد ءَ شہر ءِ نالہ آنی نوک جوڑیشت ءِ کار تیزی ءَ گوں برجاہ اِنت دانکہ سیالکوٹ ءَ را دائمی رکھینگ بہ بیت۔ سیالکوٹ قلعہ ءَ راجدپتری ورثہ ءِ بحالی ءِ ھاتر ءَ 300ملین کلدار ءِ ھرچ ءَ یک پارک ءِ ھرچ کنگ بیت وھدیکہ اقبال منزیل ءِ اپ گریڈیشن ءِ ھاتر ءَ 100ملین کلدار ھرچ کنگ بیت۔ شہر ءِ تہ ءَ 380 ڈسپوزل اسٹیشن ءِ جوڑ کنگ ءَ چہ ڈرینیج ءِ جیڈھ ھم گیش ءُ گیوار بنت۔ وزیر دیمپان ءَ میاں اوستمانی جاور آنی سر ءَ دلپدردی ءِ درشان کنان ءَ گوشت کہ ایران ءُ اسرائیل ءِ جنگ ءِ آسر آناں چہ بچگ ءِ واستہ مزنیں فنڈز ءِ ضلورت بیت۔