اسپیکر راجی اسمبلی ءَ شمالی وزیرستان ءَ بھارت ءِ سرپرستی ءَ ناشرکارانی ھلاپ ءَ سوبمندیں آپریشن ءِ ھاتر ءَ سیکورٹی فورسز ءَ را  توسیپ ءُ ستا

اسلام آباد۔2اپریل  (اے پی پی): راجی اسمبلی ءِ اسپیکر سردار ایاز صادق ءَ شمالی وزیرستان ءَ بھارت ءِ سرپرستی ءَ ناشرکار آنی ھلاپ ءَ سوبمندیں آپریشن ءِ ھاتر ءَ سیکورٹی فورسز ءَ را خراج تحسین پیش کنان ءَ گوشت کہ اوگان عبوری حکومت وتی ذمہ واری ءَ پیلو بہ کنت کہ آ وتی سرزمین ءَ را ناشرکاری ءِ کارمرد کنگ ءَ را بہ رکین ایت۔ پنچ شمبے ءِ روچ ءَ آئی ءَ وتی تران ءِ تہ ءَ سیکورٹی فورسز ءَ را ہندوستان ءِ حمایت کتگیں ہشت خوارج جنگول آنی کوش ءِ سر ءَ شگر ءُ منت گپت ءُ گوشت کہ سیکورٹی فورسز ءَ وھد ءِ سر ءَ ءُ موثر گامگیج زورگ ءَ خوارج ءِ نا شریں منصوبگ آناں ناکام کتگ۔ سرجمیں راج دژمن ءِ بدیں رھبندانی ناکام کنگ ءِ ھاترا بہادریں سپاھیگاں سلام پیش کنت۔ پاکستان ءِ سرزمین ءِ رکھینگ ءِ واستہ سیکورٹی فورسز ءِ قربانی شموشکار نہ بنت۔ قومی اسمبلی ءِ اسپیکر ءَ گوشت کہ سیم سر ءِ نگرانی ءَ را موثر جوڑ کنگ دمگی امن ءِ واستہ المی اِنت، پاکستان کدی ھم درملکی سرپرستی ءَ ناشرکاری ءَ را برداشت نہ کنت، ءُ برجائی ءِ جزم ءِ چیر دستی ءَ ناشرکاری ءَ را سرجمی ءَ ھلاس کنگ ءِ واستہ گامگیج برجاہ دارگ بنت۔ آئی ءَ گوشت کہ راج وتی بہادریں قوت آنی گوما اوشتاتگ ءُ دژمن ءِ ھرچ بدیں نیت ءَ ناکام کنت۔