حکومت سرجمیں ملک ءَ کوالٹی ءُ برابریں وانگ ءُ زانگ ءِ موہ ءِ پھجارینگ ءِ واستہ عملی گامگیج زورگ ءَ انت، وفاقی وزیر تعلیم

اسلام آباد۔2اپریل  (اے پی پی): وفاقی وانگ ءُ زانگ ءُ پیشہ وارانہ تربیت ءِ وزیر ڈاکٹر خالد مقبول صدیقی ءَ گوشت کہ وانگ ءُ زانگ راجی دیمروئی ءِ بُن ھشت اِنت، حکومت سرجمیں ملک ءَ کوالٹی ءُ برابریں وانگ ءُ زانگ ءِ موہ پجارینگ ءِ واستہ عملی گامگیج کنگ ءَ اِنت۔ آئی ءَ پنچ شمبے ءِ روچ ءَ اسلام آباد ماڈل کالج فار گرلز (پوسٹ گریجویٹ) جی 10/4 ءَ برجم داشتگیں کانووکیشن ءَ گوں گشتانک دیگ ءَ ات ایشی ءِ تہ ءَ ھاسیں مہمان ءِ رنگ ءَ بھر زوری کت ءُ گریجویشن کنوکیں نودربر آنی نیام ءَ سرٹیفکیٹ بھر ءُ بانگ کت۔ وفاقی وزیر ءَ نودربر آناں وانگی کامیابی آنی سر ءَ مبارک بات دات ءُ گوشت کہ اے کامیابی آوانی محنت، استاد آنی رھشونی ءُ مات ءُ پت آنی دعا ءِ آسر انت۔ آئی ءَ استاد ءُ ادارگ ءِ انتظامیہ ءِ کوشست ھم ساڑات۔ آئی ءَ گوشت کہ وانگ ءُ زانگ ھمک مردم ءِ بنیاتی ھک اِنت ءُ ایشی ءِ پھجاری ءَ بے تاوان کنگ حکومت ءِ اولی ترجی اِنت۔ آئی ءَ گوشت کہ راجی دیمروئی ءِ واستہ زالبول آناں یک وڑیں وانگ ءُ زانگ ءِ موہ پجاری کنگ المی انت چیاکہ وانندگیں زالبول یک مھکم ءُ وشھالیں چاگرد ءِ جوڑیشت ءِ تہ کلیدی کرد ءَ پیلو کن انت۔ ایشی ءَ پد میڈیا ءَ گوں تران کنان ءَ ڈاکٹر خالد مقبول صدیقی ءَ گوشت کہ وزارت وفاقی وانگ ءُ زانگ ءُ پیشہ وارانہ تربیت وانگ ءُ زانگ ءِ اصلاحات ءِ ایجنڈا ءِ سر ءَ عمل کنگ ءَ انت ءُ نوکیں لوٹ آنی رد ءَ وانگ ءُ زانگ ءِ دیمروئی ءِ واستہ گامگیج کنگ بوھگ ءَ انت۔ آئی ءَ گوشت کہ استاد آنی ہنر ءِ تربیت، دور وانگ ءُ پیشہ وارانہ تربیت ءِ سر ءَ ھاسیں دلگوشی دیگ بوھگ ءَ انت۔ آئی ءَ گریجویشن کنوکیں نودربر آناں پنت ءُ شون کت کہ آ وتی ھنر ءَ کارمرد بہ کن اَنت ءُ ملک ءُ راج ءِ دیمروئی ءِ واستہ جوانیں کردے پیلو بہ کن اَنت۔ مراگش ءِ گڈسرا نودربر آنی تہ ءَ داد ءُ سرٹیفکیٹ بھر ءُ بانگ کنگ بوت کہ آھاں جوانیں کارکردگی پیش داشتگ۔