بجلی ءِ کارمرز کنگ ءِ تہ ءَ کم کم ءُ مزنیں کساسے ءَ گیشی سرکاری پالیسی آنی سوبمندی ءِ ثبوت اِنت، سردار اویس احمد خان لغاری

اسلام آباد۔2اپریل  (اے پی پی): وفاقی وزیر توانائی سردار اویس احمد خان لغاری ءَ گوشت کہ ملک ءَ بجلی ءِ کارمرد کم کم ءَ ءُ مزنیں کساسے ءَ گیش بوھگ ءَ انت کہ اے حکومتی پالیشی آنی سوبمندی ءِ ثبوت انت۔ اے ھیالانی درشانی آئی ءَ ورلڈ بینک ءِ کنٹری ڈائریکٹر بولورما امگابازار ءَ گوں تران کنان ءَ کت آئی ءَ ادا گند ءُ نند کت۔ وفاقی وزیر ءَ گوشت کہ حکومت بجلی ءِ ٹیرف ءَ را مسابقتی جوڑ کنگ ءِ کوشست ءَ کنگ ءَ انت تانکہ ملک ءِ ھاسیں اقتصادی شوبگ ایشی ءَ چہ سیت چست بہ کن انت۔ آئی ءَ گوشت کہ صنعتی شوبگ ءِ واستہ رعایتی ٹیرف ءِ چار ءُ تپاسی ءَ پد پاور ڈویژن ءَ نوں ٹائم آف یوز ءِ تجویز آنی سر ءَ کار بندات کتگ تانکہ توانائی ءِ شوبگ ءَ گیش گہتری آرگ بوت کنت۔ مول ءُ مراد ایش انت کہ ملک ءِ شمسی توانائی ءِ توانائی ءَ چہ پائدگ چست کنان ءَ صنعت آناں رعایتی شرح ءِ پجارینگ بہ بیت۔ اے درگت ءَ درستیں اسٹیک ہولڈر آنی گوما مشورہ کنگ بوھگ ءَ انت۔ سردار اویس احمد خان لغاری ءَ گوشت کہ پاور ڈویژن بجلی ءِ پیداوار ءِ واستہ ملک ءِ بنجاہی وسیلگ آناں کارمرد کنگ ءِ ھوالگ ءَ ھاسیں پالیسی پیسلہ آنی سر ءَ ھم ھیال ءُ لیکہ کنگ ءَ اِنت۔ آئی ءَ گوشت کہ میاں اوستمانی تک ءِ استیں جاور ھال ءَ چہ بنجاہی وسیلگ آناں کارمرد کنگ ءِ واستہ حکومتی کوشست آناں گیش مھکم کتگ انت۔ وفاقی وزیر ءَ توان ءِ شوبگ ءَ برجاھیں کمک ءِ سر ءَ ورلڈ بینک ءِ شگر ءُ منت گپت ءُ برجاھیں منصوبگ آنی سر ءَ جوانیں رنگ ءَ کار کنگ ءَ را ساڑات۔ آئی ءَ پاکستان ءِ توان ءِ بنیاتی ڈھانچگ ءَ را گیش مھکم کنگ ءِ واستہ ورلڈ بینک ءِ گوما نزیکیں کمک ءَ برجاہ دارگ ءِ حکومت ءِ جزم ءِ درشان کت۔ ورلڈ بینک ءِ ملکی ڈائریکٹر بولورما امگابازار ءَ پاور ڈویژن ءِ اصلاحات ءِ ایجنڈا ءِ توسیپ کت ءُ ٹیرف ءِ اکلی کنگ، ٹرانسمیشن ءُ ڈسٹری بیوشن نیٹ ورک، ءُ قابل تجدید توانائی ءِ یکجا کنگ ءَ ھوار اولویت ءِ شوبگ آنی تہ ءَ وزارت ءِ گوما کمک ءَ را برجاہ دارگ ءِ وتی عزم ءِ پدا زور دات۔