میاں اوستمانی جیڈھ ءِ تہا پاکستان ءِ سفارتی کرد ءُ ذمہ واریں بن گپ ستا کرز انت، سعودی سفیر نواف سعید المالکی ءِ ویڈیو پیغام

اسلام آباد۔1اپریل (اے پی پی): پاکستان ءَ سعودی سفیر نواف بن سعید المالکی ءَ میاں اوستمانی تک ءِ استیں جاور ھال آنی تہ ءَ پاکستان ءِ جوانیں ءُ زانتکاریں سفارتی کرد ءَ را وشیں رنگے ءَ شگر ءُ منت گپت ءُ گوشت کہ سعودی عرب پاکستان ءِ ذمہ واریں موقف ءَ را ارزشت دنت۔ آئی ءَ وتی ویڈیو کلوہ ءِ تہ ءَ گوشت کہ پاکستانی حکومت ءِ نیمگ ءَ چست کتگیں گامگیج استیں بحران ءَ را ایمنی ءِ گوما گیواری ءِ کوشست آنی آدینک انت۔ سعودی سفیر ءَ میاں اوستمانی جاور ھال آنی سر ءَ گپ ءُ تران کنان ءَ گوشت کہ سعودی عرب ءَ ھوار خلیج ءِ ملک آنی سر ءَ اُرش مزنیں جیڈھ ءِ سوب انت ءُ وت واجہیں ملک آنی سر ءَ بے جاہ زوراکی میاں اوستمانی کانود ءُ اقوام متحدہ ءِ اصول آنی پدریں ھلاپ ورزی انت۔ آئی ءَ گوشت کہ اے اُرش آنی تہ ءَ نہ ایوک ءَ ارزشتی ایں تاوان بوتگ بلکینگ ءَ آمراہی دمگ، شہری آسراتی ءُ بالی پٹ آنی تہ ءَ ھم نشانگ جوڑ کنگ بوتگ۔ نواف بن سعید المالکی ءَ گوشت کہ تنگہ ہرمز ءِ سر ءَ اُرش آنی سلسلہ ءِ شنگ ءُ تالان بوھگ انتہائی نگرانی ءِ سبب انت پرچا کہ سرجمیں دگنیا ءِ اقتصادی مفاد ءُ توانائی ءِ ایمنی گوں اے دمگ ءَ بندوک انت۔ آئی ءَ اے گپ ءِ سر ءَ زور پر دات کہ دمگ ءِ برجائی مئے درست آنی یکجائی ذمہ واری اِنت کہ ایشی ءَ را ایوک ءَ زانت، جھان ءِ یکوئی ءُ میاں اوستمانی کانود ءِ احترام ءِ وسیلگ ءَ برجاہ دارگ بیت۔ آئی ءَ گوشت کہ انسانی اصول آنی سر ءَ پابند امن ءُ ایمنی ءِ رکھینگ ءِ یکیں ءُ جوانیں راہ اِنت۔